Mga Timailhan sa Espiritu

Nagserbisyo og full-time nga misyon sa Dominican Republic, bag-o lang ko nga na-transfer sa bag-o nga area nga nahibaloan nga dapit nga lisud ang pagpangita og mga tawo nga katudloan. Sa akong pag-abut, usa ra ang among investigator. Ang iyang ngalan si Oriviades. Nakasimba na siya kaniadto, apan tungod kay bungol ug pakigsultihan pinaagi sa sinyas o sign language, ang nag-unang mga misyonaryo wala makatudlo kaniya.

Usa ka adlaw ako ug ang akong kompanyon nakahukom sa pagpuasa ug sa pag-ampo alang sa usa ka milagro nga magtugot kanamong makatudlo kang Oriviades. Naghimo kami og appointment uban niya sa panahon kon usa sa sakop sa iyang pamilya may higayon sa pagtambong aron makatabang sa paghubad, tungod kay ang akong kompanyon ug ako dili mahibalo og sinyas.

Sa among pag-abut sa pakigkita kang Oriviades, bisan pa, wala didtoy sakop sa iyang pamilya. Sa dihang mibiya og kadiyot si Oriviades sa pagkuha og lingkuranan, ang akong kompanyon ug ako mipahimulos sa higayon sa pag-ampo nga ang Espiritu mogiya kanamo. Bisan gani sa wala pa mahuman ang pag-ampo, akong gibati ang kusog nga presensya sa Espiritu.

Si Oriviades nagsugod na sa pagsinyas, apan dili kami makasabut kaniya. Mipahiyom lamang kami kaniya ug nagtinan-away, naningkamot sa paghunahuna kon unsa kahay among buhaton. Mihukom kami sa pagsulat naghimo og iskedyul alang sa sunod nga appointment, nanghinaut nga sa sunod makakuha kami og tighubad. Apan sa kalit kaming duha may kusog nga pagbati nga kinahanglan kaming magpabilin ug mosulay sa pagtudlo kaniya. “Atong sulayan—ang Espiritu motabang kanato,” miingon ko sa akong kompanyon.

Among gisulayan ang paggamit og mga drowing ug yano nga mga pagsinyas sa kamot samtang nagtudlo kami sa leksyon. Sa hinay-hinay nagsugod kami sa pagkasabut sa mga sinyas ni Oriviades ug nakahimo sa pagbalos agi og tubag kaniya. Maingon og nakasabut siya kanamo sa hingpit.

Among gibati ang aghat sa pagpaambit sa among mga pagpamatuod ngadto kaniya. Among gipakita kaniya ang litrato sa Unang Panan-awon, ug akong gisulat sa papel ang, “Nasayud ako nga tinuod kini.”

Dayon, gamit ang sinyas, si Oriviades mitubag, “Nasayud ako nga tinuod kini—ang Dios miingon kanako. Nag-ampo ako ug nasayud nga kini tinuod.”

Ang akong kompanyon ug ako mibiya sa sabut [appointment] nga nanglugmaw ang mga luha sa among mga mata. Nasayud ako nga ang Dios mitugot kanamo sa pagpamatuod kabahin sa gipahiuli nga ebanghelyo niini nga investigator ug ang Espiritu Santo midala sa among mensahe diha sa iyang kasingkasing (tan-awa sa 2 Nephi 33:1). Akong nakat-unan nga wala kinahanglana nga hingpit o larino ang atong pagkasulti kon magpaambit kita sa ebanghelyo—usahay, dili kinahanglan nga mosulti pa kita.

Lisud tuohan kon sa unsang paagi ang yano nga mga butang sama sa pagpuasa, pag-ampo, ug hugot nga pagtuo magmugna og dagkong milagro sa atong kinabuhi ug sa kinabuhi sa atong mga giserbisyuhan.