Ko e Folofola Totonú ʻi he Taimi Totonú

Lolotonga ʻeku hoko ko ha tokoni faifekau ʻi he polokalama Falepōpula ʻo e Vahefonua Malikopá ʻi ʻAlesona, USA, naʻá ku ʻaʻahi mo vahevahe ai ha folofola pea mo lotu fakataha mo e kau nofo hopoate naʻa nau kole ke talanoa mo ha faifekau ʻo e Kau Māʻoniʻoni ʻi he Ngaahi ʻAho Kimui Ní. Naʻe fai mai ʻe ha finemui ha kole pehē ʻi ha taimi ʻe taha.

Naʻá ku ʻalu ki he feituʻu ‘okú ne ‘i ai he fale fakapōpulá, ʻa ia naʻe tuʻu ʻi mui ʻi ha ngaahi matapā naʻe lokaʻi. Naʻe ʻi ai ha ongo tēpile kai mo e sea lōloa ʻi he ongo tafaʻakí pea mo ha tēpile ʻe taha ʻoku nofo ai ha tangata leʻo ʻi he feituʻu talitalí. Ne u ʻoange e foomu kolé ki he tangata leʻó, peá u tangutu hifo ʻi he taha e ngaahi sea lōloá, ʻo tatali ki he finemuí.

ʻI heʻene hū mai ki he feituʻu talitalí, naʻá ku tuʻu hake ʻo fakafetaulaki kiate ia, mo fokotuʻu ange ke ma tangutu ʻi he tēpilé. Naʻá ne mata mamahi pea mafuefue hono ʻulú pea naʻe toe pē ke tangi. Naʻá ku fakakaukau ki ha folofola ke u vahevahe ʻi heʻene fakamatalaʻi e tūkunga ʻokú ne ʻi aí. Ne u fanongo fakalelei ki heʻene loto-hohaʻá, ʻi heʻene fakahā e faingataʻa kuó ne tofanga aí mo e tuʻunga kehekehe fakaʻulungaanga ʻokú ne moʻua aí mo e ngaahi fili kovi naʻá ne faí, pea ne u fakakaukau ki he folofola lelei taha ke tokoniʻi ʻaki iá: Mōsaia 3:19.

Naʻá ku fakaava ʻa e Tohi ʻa Molomoná kia Mōsaia 3:19, peá u tekeʻi atu ki ai, mo kole ange ke ne lau. Naʻá ne kiʻi taʻefiemālie pea kamata ke ne lau ʻi ha leʻo vave mo fakafasifasi ʻa ia ne hangē ʻokú ne ʻita ʻi hono kole ange ke ne lau e folofolá. ʻI heʻene fakaʻosi e kupuʻi leá, “He ko e tangata fakakakanó ko e fili ia ki he ʻOtuá,” ne u taʻofi siʻi ʻo fakamatalaʻi e ʻuhinga e “tangata fakakakanó.” ʻI he taimi naʻá ne ʻiloʻi ai hono ʻuhingá, ne hoko atu ʻene laú. Naʻe fakaʻau ke liliu hono leʻó, pea kamata ke māmālie hifo ʻi he kamata ke ʻuhingamālie kiate ia ʻa e ngaahi leá.

ʻI he taimi naʻá ne kamata ai ke lau e lisi ʻo e ngaahi ʻulungaanga fakatamasiʻi ʻo “ha tokotaha māʻoniʻoní,” naʻá ne toe māmālie ange. Ne lava ke u tala naʻá ne tokanga ki he ʻuhinga ʻo e ʻulungaanga taki taha naʻe lisi ʻi he vēsí. Naʻá ku ongoʻi e Laumālié ʻi hono ʻākilotoa kimaua lolotonga ʻene lau ʻa e “angavaivaí, angamaluú, loto-fakatōkilaló, faʻa kātakí.” ʻI heʻene lau e ngaahi lea ko e “fonu ʻi he ʻofá, pea loto-fiemālie ke fakavaivaí” naʻá ku fakamoʻoniʻi ha liliu ʻiate ia. Naʻe ulo hono fofongá pea hangē ne tākiekina ʻe he Laumālié hono ʻulungāngá, fasi ʻo hono leʻó, mo hono ʻulungāngá kotoa pē. Naʻá ku vakai atu ki he ʻamanaki leleí ʻi hono akoʻi kiate ia ʻe he Laumālié ʻa e ʻuhinga ʻo e ngaahi lea ko ʻení mo e founga totonu ke ne fai e ngaahi liliu ne fakamatalaʻi he folofolá.

Naʻá ku fai ha lotu peá u lulululu leva mo e finemuí. Naʻá ku mavahe mei he fale fakapōpulá ʻi ha tuʻunga fakalaumālie māʻolunga. Kuo teʻeki ke u mamata ki ha ngāue vave, mālohi, mo maʻongoʻonga pehē mei he folofolá. Naʻá ku ʻiloʻi ʻa e Mōsaia 3:19 koeʻuhi naʻá ku faʻa lau ia lolotonga ʻeku lau folofolá, ka ne teʻeki ke mahino kiate au e loloto ʻo ʻene ueʻi ha tahá.