Naʻá ku nofo mo ‘eku kui-fefine ‘i heʻeku kei taʻu 13 nai. Naʻe ai ha ‘aho ‘e taha naʻá ku ‘ilo ai ha ngaahi makasini motuʻa peá u kamata ke lau ia. Naʻe kau ai ha ngahi talanoa mei ha kakai ‘i he ngaahi tapa kehekehe ‘o e māmaní, ‘oku fakamatala ki he ngaahi mana naʻe hoko ‘i heʻenau moʻuí. Ko e ngaahi makasini ko ‘ení ko ha ngaahi Liahona ia; ‘a e tokoua ‘o ‘eku faʻeé, ‘a ia naʻe kau ki he Siasí, pea naʻá ne tuku ‘a e ngaahi makasiní ‘i he fale ‘o ‘eku kui-fefiné.

Naʻe maʻu ‘e he ngaahi talanoa ‘a ‘eku tokangá, pea naʻá ku maʻu ha ongo makehe ‘oku moʻoni ia. Naʻá ku papitaiso ‘i he ‘osi ha taʻu ‘e taha mei ai, pea naʻe talu mei ai mo ‘eku maʻu fakamāhina ‘a e makasini ko iá. Naʻe hoko ‘a e makasiní ko hoku fakahinohino mo hoku tāpuaki. Naʻá ku lau ia ko e fakamoʻoni kiate au ‘oku ‘ofa ‘a e ‘Otuá ‘iate kitautolu pea ‘okú ne kei fakahā mai ‘a ‘Ene ngaahi meʻa fufuú ki Heʻene kau tamaioʻeiki ko e kau palōfitá (vakai ki he ʻĀmosi 3:7).

‘Oku ou manako ke lau ‘a e makasini ko e Liahoná—‘okú ne tokoniʻi fakatuʻasino mo fakalaumālie au. ‘Okú ne fakamālohia ‘eku tuí, pea fakatupulaki hoku ngaahi talēnití mo e ngaahi potó, pea ‘okú ne fakamaʻa hoku ‘atamaí mo e ngaahi fakakaukaú ‘o fakafou mai ‘i he faleʻi fakatupulekina ‘a e kāingalotu ‘o e Siasí mo hotau kau palōfita moʻuí.