Ko e Ngāue ʻi he Temipalé

ʻI he hoko hoku taʻu 17, naʻá ku kamata fakakaukau fakamātoato ki hoku kahaʻú, peá u lotu ki he Tamai Hēvaní ʻo kau ki he meʻa ʻe malava ke u fai ke teuteu ai ke u ʻalu ʻo ngāue fakafaifekau mo maʻu ʻa e Lakanga Taulaʻeiki Faka-Melekisētekí. Naʻá ku ongoʻi ʻoku totonu ke toe lahi ange ʻeku ʻalu ki he temipalé koeʻuhí ko e fale ia ʻo e ʻEikí pea ko e feituʻu ia ʻe lava ke u ongoʻi ofi taha ai ki heʻeku Tamai Hēvaní.

Ko ia ai naʻá ku fokotuʻu ha taumuʻa ke fakahoko ha papitaiso ʻe 1,000 ʻi he taʻu. Ne u ongoʻi moʻoni ʻa e fie maʻu ke u fokotuʻu ʻa e taumuʻá ni; ne u ʻaukai ke ʻiloʻi pe ko e meʻa ʻeni ʻoku totonu ke u faí. Naʻe ʻomai ʻe heʻetau Tamai Hevaní ha tali kiate au, pea kamata leva ke u ʻalu ki he Temipale Tamipiko Mekisikoú ʻi he Tokonaki kotoa pē.

Hili ʻeku fakahoko ha papitaiso ʻe 500, ne u fokotuʻu ha taumuʻa ke fakahoko ha fakatotolo ki he hisitōlia fakafāmili ʻo ʻeku ngaahi kuí, pea naʻá ku saiʻia ʻaupito ʻi he fakatotoló he naʻe aʻu ki ha tuʻunga naʻe ʻikai ke u lava ʻo mohe koeʻuhí ko ʻeku fekumi ki he ngaahi hingoá. Ne u maʻu ʻi hoku hisitōlia fakafāmilí ha ngaahi hingoa ʻe 50 mo ha toʻu tangata ʻe valu; ne u tokoni ke fai ʻa e ngāue fakatemipalé maʻanautolu kotoa.

Naʻe iku ʻo u fakahoko e papitaiso ʻe 1,300 tupu, peá u ʻosi mei he seminelí, maʻu e Lakanga Taulaʻeiki Faka-Melekisētekí, pea ʻoku ou lolotonga ngāue fakafaifekau taimi kakato, ʻa ia ko e taha ia ʻo ʻeku ngaahi taumuʻa fisifisimuʻa taha ʻi he moʻui ní.