Elder Kevin S. Hamilton

Te faaau nei Elder Kevin Scott Hamilton ia’na ei « hotu no te hoê faafariuraa e no te hoê faaoraraa ».

Na roto i to’na fanauraahia i te avaʻe mati 1955 i Wenatchee, Washington, USA, ua tupu mai te tahi mau uiraa i roto i to’na metua vahine, Kay, no niʻa i te auraa o te oraraa. Ua paraparau oia i te hoê hoa melo no te Ekalesia, o Richard Pratt, tei faaite ia’na i te mau misionare.

Ua faaite ta’na tane o Norman Russell Hamilton e, e melo aʻena oia no te Ekalesia, noa’tu e, aita oia e haapaʻo faahou nei mai to’na apîraa mai â. Ua itoito faahou mai oia i roto i te Ekalesia i te taime a tomo mai ai ta’na vahine i roto i te Ekalesia.

« E mau melo faahiahia to’u na metua tei patu i te faaroo ta matou e mau nei i teie mahana », te parau ïa a Elder Hamilton.

Tera râ, ua faaite papû oia e, na ta’na misioni i Farani e i Herevetia i taui i to’na oraraa. « Ua faatupu te reira i roto ia’u i te hoê hinaaro rahi tei ore roa’tu i mou faahou », te na reira ra oia.

Ua faaipoipo oia i te hoê â varua, Claudia Keysor, i te 27 no tiurai 1978, i roto i te hiero no Los Angeles. A aupuru ai raua i ta raua nau tamarii e ono i California, ua faariro raua i to raua fare ei pû no te feia ratere.

« Ua parau ratou e, e nehenehe ta outou e apo i te aʻoraa mamu noa i roto i to outou fare, e no reira, ua tapiri maua i teie mau faahitiraa parau na roto i te fare taatoa », te na reira ra te tuahine Hamilton. Ua î te uputa tomoraa o te fare i te mau Buka a Moromona, te mau buka iti No te Puai o te Feia Apî, e i te tahi atu mau buka na te Ekalesia, o te faaî-noa-hia ia pau anaʻe te reira i te ravehia e te taata ratere.

I roto i te hinaaro rahi o Elder Hamilton ia tavini, ua matara mai te mau taime taviniraa ei episekopo, ei peresideni tĭtĭ, e ei peresideni no te misioni no Beretita, Bruxelle mai te matahiti 2003 e tae atu i te matahiti 2006. Hou a piihia ai oia i roto i te pŭpŭ piti o te Hitu Ahuru, e raatira oia no te Apooraa Haaparareraa Parau na te Ekalesia no California Apatoa, e 64 tĭtĭ i roto i te tuhaa no Los Angeles.

E parau tuʻite « bachelor » ta’na no te fare haapiiraa tuatoru no Brigham Young University, e te parau tuʻite « master » no te fare haapiiraa tuatoru no Washington, e piti atoa ra parau tuʻite no niʻa i te ohipa putu faufaa ; te tuhaa rahi o ta’na tau ohiparaa, i roto ïa i te ohipa o te niuniu paraparau, e rave rahi taime ua tavini ei tiʻa faatere rahi.