Elder Ulisses Soares

Ua haamata o Elder Ulisses Soares i te tavini i roto i te peresideniraa o te Hitu Ahuru i te avaʻe tenuare 2013, e ua ite oia i te tupuraa vitiviti o te Ekalesia i roto e rave rahi tuhaa o te ao nei.

Ua fanauhia o Elder Soares i São Paulo, Beresilia, i te avaʻe atopa 1958. O Apparecido e o Mercedes Soares to’na na metua, tei tomo mai i roto i te Ekalesia i te paeraa o to’na matahiti. E haere ratou i te mau pureraa i roto i te hoê piha i niʻa o te fare tunuraa faraoa. Te haamanaʻo ra o Elder Soares i te oaoa tei roaa ia’na, hoê tamarii e vaʻu matahiti, i te taime a faatiahia ai te tĭtĭ matamua i Amerika Apatoa i São Paulo i te matahiti 1966. Ua tupu vitiviti te Ekalesia i Beresilia e tae atu i te 50 tĭtĭ i te matahiti 1990 e hau atu i te 200 tĭtĭ i te matahiti 2000.

Ua roaa ia Elder Soares te parau tuʻite no te ohipa matutu moni e no te faaravaʻiraa faufaa i roto i te fare haapiiraa tua toru katorika no Pontificia e te hoê MBA no roto mai i te National Institute of Postgraduate Study, e te rave ra oia i te ohipa i roto i te hoê taiete rahi hamani huira pereoo a piihia ai oia i niʻa i te hoê tiʻaraa i roto i te Ekalesia. Ua tihepuhia oia i roto i te Tuhaa Haapaʻo faufaa, e aita i maoro ua riro mai oia ei raatira no te mau ohipa pae tino i roto i te piha ohiparaaa no te area no Sao Paulo, ma te tauturu i te peresideniraa Area 10 matahiti te maoro. Ua tavini atoa oia ei peresideni matamua no te tĭtĭ no São Paulo Brazil Cotia.

Ua tavini oia ei peresideni no te Misioni no Portugal Porto mai te matahiti 2000 e tae atu i te matahiti 2003 e ua piihia i roto i te pŭpŭ matamua o te Hitu Ahuru i te avaʻe eperera 2005. Ua tavini oia i roto i te mau peresideniraa Area no Beresilia e no Afirita Apatoa Hitia o te râ.

« Na teie mau iteraa i horoʻa mai ia’u i te iteraa e, e nehenehe i te Ekalesia e faati‘ahia i te mau vahi atoa tei reira te hoê nunaa haapaʻo maitai », ta’na ïa parau, « e te iteraa eaha te tiʻa ia’u ia haapii mai no te tavini maitai aʻe ».

Ua faaipoipohia o Elder Soares e ta’na vahine o Rosana Fernandes Morgado, i te avaʻe atopa 1982 i roto i te hiero no São Paulo Brazil. E iva tamarii ta raua.

Ua tavini o Elder Soares i te hoê misioni rave tamau i roto i te misioni no Beresilia Rio de Janeiro. Ua tavini atoa oia ei peresideni no te pŭpŭ peresibutero, ei tauturu i roto i te episekoporaa, melo apooraa teitei, papaʻi parau faatere no te tĭtĭ, e ei tiʻa retioni no te ohipa totauturu.