Te hinaaro nei te Ekalesia i te paari e i te iteraa o te mau misionare faaipoipo

Na roto i te maraaraa te rahiraa misionare taureʻareʻa no te faatoparaahia te matahiti e haamata ai i te tavini, e hinaaro-rahi-atoa-hia te mau taata faaipoipo i roto i te mau misioni na te ao atoa nei. Na roto i te faati‘araahia e 58 misioni apî, e rahi atoa ïa te mau taata faaipoipo e hinaarohia no te horoʻa mai i to ratou ite i te pae faatereraa e i te tahi atu huru tautururaa faufaa rahi no te hoê misioni manuïa maitai.

I roto i te amuiraa no eperera 2013, ua paraparau mai te peresideni Thomas S. Monson no te maraaraa vitiviti o te rahiraa o te mau misionare, e ua faaite mai i to’na here i te feia e tavini nei i te Fatu i roto i te misioni (a hiʻo i te mau api 4, 66). Ua faaitoito taa ê o Elder Russell M. Nelson no te Pŭpŭ no te Tino Ahuru Ma Piti Aposetolo, i te mau taata faaipoipo ia tavini. « O outou te taata faaipoipo paari, a opua i te mahana e haere atu orua i ta orua misioni. Papû maitai, e mauruuru ihoa matou no ta outou taviniraa », te na reira ra oia (a hiʻo i te api 45).

I te omuaraa o te amuiraa rahi no atopa 2012, ua parau te peresideni Monson e : « Te hinaaro tamau noa nei â matou i te mau misionare tane e vahine faaipoipo paari. Mai te mea te vata nei outou, e ua faatuhaahia, e mea maitai to outou ea, te faaitoito nei au ia outou ia haere e tavini ei misionare rave tamau. E oaoa rahi to te tane e te vahine a tavini amui ai raua i te mau tamarii a to tatou Metua i te Ao ra » (« Manava i te amuiraa », Ensign e aore râ Liahona, Novema 2012, 5).

E rave rahi matahiti to te feia faatere o te Ekalesia faaitoitoraa i te feia faaipoipo ia tavini. Ua parau o Elder M. Russell Ballard, no te Pŭpŭ no te Tino Ahuru Ma Piti Aposetolo : « Te titau nei te mau misioni i te mau fenua atoa e rave rahi atu â mau taata faaipoipo. Na roto i to ratou paari e to ratou mau iteraa, ua riro ïa ratou ei mau misionare maitai roa aʻe no tatou. No to ratou mau aravihi taa ê… ua tiʻa ia ratou ia haapii maitai i te feia faatere no te fenua iho, ia haapuai e ia faaitoito i te mau melo, e ia arataʻi mai i te mau melo ore i te Mesia ra » (« Missionary Couples—Trading Something Good for Something Better », Ensign, Tiunu 1988, 9, 11).

Te feia faaipoipo e hinaaro nei e tavini ei misionare, te faaitoitohiaʻtu nei ratou ia faaite i te reira hinaaro to ratou i to ratou episekopo. Mai te 6 avaʻe e tae atu i te 23 te roaraa o ta ratou tau taviniraa.

Mai te mea e, e uiraa ta outou no niʻa i te misioni a te feia faaipoipo, a niuniu atu ïa i te 1-800-453-3860, ext. 2-6741 (e aore râ, 1-801-240-6741), e aore râ, te imere SeniorMissionaryServices@ldschurch.org no te farii i te pahonoraa i te mau uiraa taa ê.