Elder Terence M. Vinson

No Elder Terence M. Vinson, tei pii-apî-hia i roto i te pŭpŭ piti o te Hitu Ahuru, aita oia i faaroo aʻenei i te taʻo ra Momoni hou a farerei ai oia ia Kay Anne Carden i te mau matahiti matamua o te matahiti 1970s i Sydney, Auteraria. Ua aparau raua i te parau no te faaroo e i te pae hopea ua rave i te hoê faaauraa. I te mau Sabati atoa e haere raua i te pureraa a Terence e i te pureraa i roto i te hoê amaa o Te Ekalesia a Iesu Mesia i te Feia Mo‘a i te Mau Mahana Hopea Nei. Hoê pŭpŭ e putuputu ratou i roto i te hoê fare rahi e te nehenehe, te tahi i roto ïa i te hoê fare naʻinaʻi tarahuhia mai e te tahi tau Feia Mo‘a i te Mau Mahana Hopea Nei.

Tera râ, i muri iho rii noa « ua huru haamâ rii te faaauraa », e ua hamata o Terence i te faaroo i te mau haapiiraa misionare. E rave rahi ta’na mau uiraa. I muri iho, a haere ai oia i te hoê amuiraa tĭtĭ, ua puta mai i roto ia’na te hoê poroʻi maramarama, mai te huru e, e mea parau-roa-hia mai. « Ua titauhia ia’u ia tomo i roto i te Ekalesia no te haere i mua. E tiʻa i ta’u mau uiraa atoa ia pahonohia », te na reira ra oia.

Ua bapetizohia oia i te hepetoma i muri iho.

Ua fanauhia o Terence Michael Vinson i Sidney Auteraria, i te avaʻe mati 1951 ia John Laurence e ia May Therese A. Vinson. E rave ohipa to’na metua tane ei taata tupohe auahi, e ua faatusia oia ia tiʻa i ta’na nau tamarii e hitu ia farii i te haapiiraa maitai.

E parau tuʻite « bachelor » ta Elder Vinson i roto i te numera, no te fare haapiiraa tuatoru no Sydney, e hoê parau tuʻite no te orometua haapii no roto mai i te fare haapiiraa tuarua no Sydney. Ua farii atoa oia i te hoê parau tuʻite no te faaineineraa faufaa no te fare haapiiraa tuatoru no Deakin e te parau tuʻite « master » i roto i te matuturaa moni no te fare haapiiraa tuatoru no Macquarie. I roto i to’na tau ohiparaa, ua itehia oia ei orometua haapii numera, ei taata paraparau, e ei taata faaaʻo i te pae faufaa, e ua faatere i te hoê taiete faaineineraa e faahoturaa faufaa.

Ua faaipoipo oia ia Kay Anne, te vahine tei faaite ia’na i te evanelia, i te 2 no me 1974, i Sidney, e ua taatihia raua i te 23 no atete 1975, i roto i te hiero no Hamilton New Zealand ; e ono ta raua tamarii. Aita i raeʻahia e toru matahiti i muri aʻe i to’na bapetizoraa, ua piihia o Elder Vinson ei episekopo. Ua tavini oia i roto e rave rahi peresideniraa tĭtĭ e ei tiʻa retioni e ei Hitu Ahuru Area.