Elder Timothy J. Dyches

Te hoê o te mau ohipa au roa na Elder Timothy Dyches i roto i te oraraa maori râ, « te riroraa ei ite » e te faaite-papû-raaʻtu ia vetahi ê, ma te tauturu ia ratou ia haere mai i te Mesia ra. Ei misionare anei, i roto anei i to’na utuafare, e aore râ, i roto anei i ta’na ohipa, te farii oaoa nei oia i taua ohipa ra e taua hopoiʻa ra e te tamata nei oia i te tauturu ia vetahi ê ia na reira atoa.

Ua fanauhia oia i te avaʻe tenuare 1951 i Muray, Utaha, te mau Hau Amui no Marite, ia Milo Fredrick raua o Mary Katherine Dyches, oia te piti i roto i na tamarii e hitu. I te tau a diakono ai oia, ua haere atu to’na utuafare e noho i Elko, Nevada, i reira oia i te raveraa i te ohipa i roto i te fare hooraa raau a to’na metua tane, i muri aʻe i te haapiiraa. A rave amui noa ai raua i te ohipa, ua haapii to’na metua tane ia’na i te faufaa no te rave-itoito-raa i te ohipa—na te reira i tauturu ia’na ia riro ei misionare maitai i roto i te misioni no Helemani Apatoa mai te matahiti 1970 e tae atu i te matahiti 1972.

« E misioni paari, tera râ, ua riro ïa ei misioni maitai roa noʻu », ta’na ïa parau. « Ua haapii au i te faufaa o te rave-itoito-raa i te ohipa e te haapaʻo e te oreraa e faaruʻe ».

Ua vai noa te reira huru to’na no niʻa i te parau no te ohipa i muri aʻe i te misioni, i roto i ta’na tau haapiiraa, e te ohipa toroʻa, e i roto i te mau ohipa a te Ekalesia. Ua farerei o Elder Dyches i ta’na vahine, Jill Dudley, i to’na haereraa i te haapiiraa i te fare haapiiraa tuatoru no Brigham Young University. Ua faaipoipohia raua i te 26 no eperera 1974, i roto i te hiero no Manti. E toru ta raua tamarii.

Ua roaa ia Elder Dyches te parau tuʻite « bachelor » i te fare haapiiraa tuatoru no Brigham Youn University, e ua tamau noa i te haapii e ua roaa mai ia’na te parau tuʻite no te ohipa taote tapu i roto i te fare haapiiraa tuaroru no Washington University Medical School. Ua rave oia i te ohipa naʻna iho ei taote tapu no te tariʻa, te ihu e te arapoa i Reno, Nevada.

I te taime a piihia ai oia i roto i te pŭpŭ piti no te Hitu Ahuru, te tavini ra ïa oia i roto i te pŭpŭ feia apî ei tauturu haamaramarama no te pŭpŭ diakono. Ua tavini oia i roto i te tahi atu mau piiraa e rave rahi, mai te Hitu Ahuru Area, peresideni no te misioni no Oregon Portland, peresideni tĭtĭ, tauturu i roto i te hoê peresideniraa tĭtĭ, melo apooraa teitei, rave ohipa no te hiero, peresideni no te Haapiiraa Sabati, e papaʻi parau no te paroisa.