E taui te aamu utuafare i te mau aau

E rave rahi mau pû aamu utuafare i te mau tau i muri nei o te faatupuhia i te utuafare noa, te tohuraa ïa a Elder Bradley D. Foster no te Hitu Ahuru, i roto i te hoê aʻoraa tei horoʻahia i te 23 no mati, ei tuʻatiraa i te amuiraa no te RootsTech 2013 Family History and Technology [te aamu utuafare e te raveʻa aravihi] tei tupu i Roto Miti, Utaha, te mau Hau Amui no Marite.

E raatira tauturu o Elder Foster i roto i te mau tuhaa faatereo te Aamu Utuafare, e ua parau oia e, fatata te taime e taeʻahia ai e iva miria taata i niʻa i te fenua nei, e ua faaineine te Fatu i te raveʻa aravihi e tiʻa ai « ia natinatihia e ia tuʻatuʻatihia te mau utuafare taatoa ».

Ua haapapû oia i te faufaa no te raveraa i te aamu utuafare, te haapiiraa i te mau aamu o to tatou mau tupuna—eiaha râ te tuatapaparaa noa, ma te imi noa i te iʻoa e te taiʻo mahana. I niʻa iho i te mau ofaʻi menema atoa i te ao nei, te vai ra hoê iʻoa, hoê taiʻo mahana fanauraa, hoê reni iti, e hoê taiʻo mahana poheraa, te na reira ra oia. « Taua reni iti naʻinaʻi ra i ropu i te taiʻo mahana fanauraa e te poheraa, e reni iti naʻinaʻi roa ïa e te faufaa ore, tera râ, tei roto ïa i te reira reni iti to tatou aamu no te oraraa taatoa » ta’na ïa parau. « No reira a imi ai tatou i te reira mau taiʻo mahana, e matara mai to tatou here i to tatou mau tupuna—te faafariuraa i to tatou aau i to tatou hui metua—na roto i te imiraa i taua reni iti naʻinaʻi ra »

E tahoê te aamu utuafare ia tatou mai te mea e, e faaite tatou i te mau aamu e e rave amui tatou i te ohipa, ta’na ïa parau. « No reira, e taui te tuatapaparaa tupuna i ta tatou mau hoho‘a păpăraa ; e taui te aamu utuafare i to tatou aau ».