Hola e fanga ʻAlapakasi!
Naʻe ʻikai ke teitei ngaue e ʻalapakā fakamuimui tahá ia. Ko e hā e meʻa te u faí?
“Tamai Hēvani ʻoku ou kole ke ke tataki mo maluʻi au he ʻaho kotoa pē” (“Heavenly Father, Now I Pray,” Children’s Songbook, 19).
Ne u ngāue he faʻahitaʻu māfana kuohilí ki hoku kaungāʻapí. Naʻe ʻi ai haʻane faama ʻalapakā lahi ne hoko atu pē ki hono fale foʻiʻakau ʻoku tuku ai e natí. Ko e ʻalapakasí ʻoku hangē pē ko e lamá ka ʻoku iiki ange ia he lamá.
Ko ʻeku ngāué ko hono fakamaʻa e lotoʻaá he ʻaho kotoa. Ne u saiʻia he ngāué, neongo ʻene faingataʻá.
Ne ʻi ai ha hoʻatā māfana ʻe taha ne u ʻalu ai ki he ngāué ka naʻe ʻikai ke ʻi ai hoku kaungāʻapí ia ʻoʻoku. Naʻe ʻikai foki ko ha palopalema ia. Naʻá ne ʻosi talamai te u lava ke fakamaʻa e lotoʻaá ʻi ha faʻahinga taimi pē te u loto ki aí, ʻo aʻu ai pē ki ha taimi ʻokú ne mamaʻo ai.
Lolotonga ʻeku fakamaʻa e lotoʻaá ne hanga ʻe ha ʻalapakasi ia ʻe taha ʻo haeʻi e matapaá. Ne taimi siʻi mei ai kuo hola kotoa e fanga ʻalapakasi ia ʻe 14 kituʻa pea ki he fale foʻiʻakaú! Ne ʻikai ke u tui ki he meʻa ʻoku hokó! Ne u ongoʻi puke. ʻE founga fēfē haʻaku fakafoki toko taha mai kinautolu ki he lotoʻaá?
Ne u kamata ngāue ʻi he vave taha te u lavá, ke fakaseʻeseʻe tahataha pe tautau toko ua mai kinautolu. Hili ha miniti ʻe hongofulu mā nima ne u fuʻu helaʻia he lele takai holó, ka kuo faifai pea hū mo e ʻalapaka fakaʻosí ki he lotoʻaá. Hōi!
Ne u tafoki hake ʻo sio ki ha ʻalapakā feitama ʻoku tokoto mai ia mei ha fuʻu ʻakau ʻoku fute ʻe 30 hono mamaʻó. Ne u puputuʻu. ʻOku kei toe ha ʻalapakā ʻe taha ke fakahū ki loto. Ne u feinga ke fakailifiaʻi ia ke hū ki he lotoʻaá, ka naʻe ʻikai pē ke teitei ngaue ia. Ne u feinga ke u fusi ʻaki ia ha maea ne u maʻu mei he fale tauʻanga meʻalelé. Ne ʻikai pē ke ola lelei ia. Ne tokoto maʻu pē ia ʻo hangē ha fuʻu fokotuʻunga pilikí. Ne u māfulu heʻeku ʻitá. Ko e hā mo ha toe meʻa te u fai?
Ne u manatuʻi hake ʻoku ʻi ai maʻu pē ha founga ke fai ai ha kole tokoni, ʻo tatau ai pē pe ko e fē ha feituʻu te u ʻi ai. Ne u tūʻulutui leva ʻo lotu. Hili ʻeku lotú, ne u ʻāʻā hake pea ʻikai meimei tui ki he meʻa ne u mamata ki aí. Naʻe foki atu pē e ʻalapakaá ia ʻiate ia ki he lotoʻaá. Ne u fakaava e matapaá ʻo ne hū ki loto.
Ne u malimali pē heʻeku foki ki ʻapí. Ne u ʻilo naʻe tali mai ʻe he Tamai Hēvaní ʻeku lotú.