Ne u Ake Hake ʻo ʻIloʻi e Ongoongoleleí

Ne ohi hake au ʻe he ongomātuʻa taʻe tui ʻOtua pea ʻi heʻeku kei talavoú ne u ongoʻi ʻoku lelei pē ʻeku moʻuí taʻe kau ai e ʻOtuá. Naʻe liliu ʻeni he 1989, he taimi ne palopalema ai hoku foʻi ngākau lahí peá u tokoto ʻo ʻikai toe ʻilo ha meʻa ʻi ha ʻaho ʻe valu.

ʻOku ʻikai ke u fuʻu manatu lelei ki hoku taimi he falemahakí, ka ʻoku ou manatuʻi lelei haʻaku mamata ki ha tangata teunga hina ne tuʻu ʻi hoku tafaʻakí hili hoku tafá ʻo ne talamai kiate au kuo taimi “ke ke toe foki ki he moʻui fakamatelié pea ke u ʻā hake.” ʻI he ʻikai ke u talangofua ki heʻene fakahinohinó, naʻá ne toe pehē mai, “ʻE hoku tokoua, kuó ke ʻosi mate. Ko hoʻo foki ki he moʻui fakamatelié pe ko hoʻo nofo heni he maama ʻo e ngaahi laumālié.” Ne u fai e meʻa naʻá ne talamaí peá u ʻā hake ʻoku ou mamahiʻia.

Hili ʻeku ʻatā mei falemahakí, ne ʻi ai haʻaku ngaahi misi faikehe ʻoku kau ai ha kakai ne teʻeki ke mau feʻiloaki kimuʻa. Ne u ongoʻi ne u palōmesi ke fai ha meʻa, ka naʻe ʻikai ke u ʻiloʻi pe ko e hā e meʻa ko iá. Ne u kamata fekumi mo laukonga ki ha fakamatala kau ki ha ngaahi tui fakalotu kehekehe. ʻI heʻeku lau e Fuakava Foʻoú, ne u fakatokangaʻi kapau ʻoku ʻosi ʻi māmani e moʻoní, ʻe toki maʻu pē ia ʻia Sīsū Kalaisi.

Ne u fekumi mei he 1989 ki he 1994. Ne u ongoʻi liʻekina mo puputuʻu heʻeku fekumi ki he kakai ne u faʻa sio ki ai ʻi heʻeku misí. Ne fuʻu lahi ʻeku faingataʻaʻiá mo e puputuʻú, pea ne u lotua fakamātoato ha tali.

Hili e ngaahi lotu he founga ko ʻení, ne u feʻiloaki mo haku kaungā ngāue foʻou. Naʻá ne ʻilo ʻeku faingataʻaʻiá peá u talaange ki ai ʻeku fekumi ki he moʻoní. Naʻá ne ʻomi ha Tohi ʻa Molomona, ʻa ia ne u matuʻaki fakafisi ke tali. Ka naʻá ne fakalotoʻi au ke u ʻave ia, peá u lau kotoa ia he pō pē ʻe taha. Ne u ʻiloʻi he taimi pē ko iá kuó u maʻu e meʻa ne u fekumi ki aí.

ʻI heʻeku feʻiloaki mo e ongo faifekaú, ne u ʻohovale he sio ko e taha ʻo kinaua e tokotaha ne u sio ai heʻeku misí. Ne u kole ke papitaiso au, ka kuo pau ke tomuʻa akoʻi kotoa kiate au e ngaahi lēsoní.

ʻI heʻeku ako ki he ongoongoleleí mo ʻalu ki he lotú, ne u ʻilo kotoa ai e kakai heʻeku misí. Ne u ʻilo ko e ongoongoleleí e meʻa ne fie maʻu ke u ʻiloʻí. Ko e ʻaho fakafiefia taha ki heʻeku moʻuí e ʻaho ne papitaiso ai aú. Hili ha māhina ʻe ono, ne ui au ko ha palesiteni fakakolo. Ko e hili ʻeni ha meimei taʻu ʻe 20 mei ai, ʻoku ou kei ngāue fiefia pē he Siasí. Ko ʻeku koloa mahuʻinga tahá ʻa hoku fāmilí mo e ongoongoleleí.