ʻOku ʻIkai ko e Meʻa Ia ne Akoʻi Mai kiate Aú
ʻAilini Taniekulā, Filipaini
ʻI ha ʻaho ʻe taha he ngāué, ne u mavahe ʻi ha ngaahi houa siʻi ke fai ha ngaahi ngāue mahuʻinga maʻa ʻeku fineʻeikí. Ne u ʻalu ki he ʻōfisí he pongipongí ʻo talaange ki haku kaungā ngāue te u mavahe mei he ngāué he hoʻataá. Naʻá ne fafana mai kiate au he taimi mālōloó, “Te u lava ʻo tokoni kiate koe ʻi he taimi ʻo e ngāué.”
Ne u pehē ange, “ʻIkai, mālō pē.”
ʻI heʻeku mavahe mei he ʻōfisí ke heka he pasí, ne muimui mai hoku kaungāmeʻá ki he uasi ʻoku taimiʻi ʻaki e ngāué. Naʻá ne lea leʻo siʻi mai, “Fēfē ke ke tā hoʻo taimi ngāue ki he hoʻataá, peá u toki tā ʻe au he tukú naʻá ke ngāue taimi kakato pē?”
Kimuʻa peá u leá, naʻá ne toe pehē mai, “Sio mai, ʻoku siʻisiʻi ʻeta kiʻi vahé pea ʻe sai pē ke fai e meʻá ni. Ko ha kiʻi paʻanga siʻisiʻi pē. Pea ko e tahá, ʻoku ʻikai ko kitaua pē ʻoku fai peheé.”
Ne u kamata fakakaukau ki he meʻa naʻá ne talamaí. ʻOku ongo lelei ʻene ngaahi fakakaukaú, pea ne u ʻiloʻi naʻá ne ʻuhinga lelei pē. Ka ʻoku ʻikai ko e meʻa ʻeni ne akoʻi mai kiate au ʻe he Siasí.
Ne u fakapapauʻi hoku lotó e meʻa ke faí ʻo u lea leʻo siʻi ange ki ai, “ʻE hoku kaungāmeʻa, ʻoku angalelei e ʻEikí, pea kapau te Ne tāpuekina kitaua, ʻe lahi ange ʻe meʻa te ta maʻu meiate Iá he kiʻi paʻanga ko ʻená.”
Naʻá ne ʻalu taʻe fiemālie ʻi he ʻikai ke u tali ʻene fokotuʻú. ʻI heʻeku lue ki he tauʻanga pasí, ne u hohaʻa ʻi he mahino ʻe siʻisiʻi ʻeku vahé. Ne u ʻiloʻi ʻe siʻisiʻi e meʻakai te mau kumi he māhina ka hokó, koeʻuhí he ʻe siʻisiʻi e paʻanga ʻe maʻu he ʻaho ní.
ʻI heʻeku lué, ne u manatuʻi e ngaahi lea ʻo ha himi ʻe taha ʻoku pehē: “Faitotonu ʻi ho lotó; pea ʻe ʻofeina mo tāpuekina mo tokoniʻi koe ʻe he ʻ Otuá.”1 Ne u toe manatuʻi ha kupuʻi lea ʻo ha himi ʻe taha: “Fili ʻa e moʻoní! Pea ʻe tāpuekina maʻu pē koe ʻe he ʻOtuá.”2
Naʻe hanga ʻe he ngaahi laine ko ʻení ʻo fakamālohia ʻeku fili ke ʻoua naʻa tukulolo ki he ʻahiʻahí kae falala ki he ngaahi talaʻofa ʻa e ʻEikí.
Kuo ʻosi ha taʻu ʻe tolu mei he meʻa ko iá, pea ʻoku ʻi ai ʻeni haʻaku ngāue foʻou. Kuo tāpuekina moʻoni au ʻe he ʻEikí. Ne kiʻi fuofuoloa, ka naʻe hoko e talaʻofa ʻi he himí, pea ʻoku ou lava ʻo ongoʻi ʻe hokohoko haʻaku maʻu ha ngaahi tāpuaki lahi ʻi he hokohoko atu ʻeku fili ki he totonú. ʻOku ou houngaʻia he himí, he naʻá ne ʻomi kiate au ha loto-toʻa ke tuʻu maʻu he meʻa ʻoku totonu ʻi he ʻao ʻo e ʻOtuá.