Ko ʻEku Lotu Fakamātoato Tahá

ʻI hoku taʻu ʻuluaki he kolisí, ne ʻi ai haʻaku kiʻi ngāue fakataimi ʻi ha falekoloa ʻi ha kiʻi kolo siʻisiʻi. Ne u ngāue he fakaʻosinga ʻo e ʻahó ʻo tāpuni e falekoloá he 11:00 poʻuli. Neongo e tuʻunga malu ʻo e koló, ka ne u faʻa manavahē ʻi hono tāpuni toko taha e falekoloá.

Ne ʻi ai ha pō ʻe taha ne u fuʻu ilifia ai. Hili ʻeku fakamaʻa e falekoloá ne u lue ke tamateʻi e meʻa tānaki paʻangá, ka ne u fuʻu ongoʻi manavahē. Ne ʻikai ke u ʻilo ha ʻuhinga ke u ilifia ai, ka naʻe ʻikai lava ke tuku ʻeku ilifiá. Ne ʻikai ke u loto ke telefoni ki he kau polisí, ka ne u loto ke maluʻi au kapau ʻoku ʻi ai ha faʻahinga fakatuʻutāmaki ʻe hoko.

Ne u tūʻulutui ʻo lotu. Ne u fakahā ki he Tamai Hēvaní ʻoku ou ilifia mo ʻikai ʻilo e meʻa ke faí. Ko e lotu fakamātoato taha ia kuó u faí.

ʻI heʻeku tuʻu haké, ne u fakatokangaʻi ha meʻalele ʻoku tau hake ki he pausa ofi taha mai ki he falekoloá. Ne u ʻohovale mo fiefia he ko ha ʻōfisa polisi. ʻI heʻene ʻutu ʻene meʻalelé, ne u fai fakatoʻotoʻo ʻeku ngaahi ngāue ki hono tāpuni e falekoloá. Ne u loto ke ngāue ʻaonga ʻaki e ongoʻi malu ʻo ʻene ʻi aí ke fai e lahi taha ʻe lavá kimuʻa pea ʻosi ʻene ʻutú. Hili ʻene ʻutú, naʻe fai haʻane telefoni pea tangutu pē heʻene kaá ʻo fai ai ʻene talanoá. Naʻá ne kei ʻi ai pē he taimi ne u lokaʻi ai e falekoloá peá u heka ki heʻeku kaá. Ne ma mavahe mei he falekoloá he taimi tatau.

ʻI heʻeku fakaʻuli atu ki ʻapí, ne u ofoofo pē ʻi hono tali vave mai ʻeku lotú. Ne u fakamālō ʻi he loto fakatōkilalo ki he Tamai Hēvaní heʻene fanongo mai kiate aú. Naʻe ʻosi akoʻi ko ha ʻofefine au ʻo e ʻOtuá, ka ne u toki ongoʻi pē he pō ko iá e ofi pe moʻoni ʻo ʻEne ʻofa ʻiate aú. He ʻikai lava ha lea ʻo fakamatalaʻi e nonga ne u ongoʻi ʻi hoku lotó. ʻOku ou ʻilo ʻe tāpuakiʻi au ʻe he ʻEikí kapau te u tui mo kole ʻEne tokoní.