Laka Atu Kimuʻa

Kimuʻa peá u ʻosi mei he ʻunivēsití, ne u fakakaukauʻi mo hoku uaifí ha foʻi fehuʻi ʻe ua: ko e fē e taimi ʻoku totonu ke maʻu ai haʻama fānaú mo e feituʻu ke ʻalu ki ai he ʻosi ʻa e akó. Naʻá ma fakaʻaongaʻi ha ngaahi houa lahi ke talanoaʻi ai e ngaahi meʻa mahuʻingá ni ka naʻe teʻeki pē ke ma fai ha tuʻutuʻuni aofangatuku.

ʻI ha ʻaho Sāpate ʻe taha, ne kamata ke mafuli māmālie ʻema talanoá ki ha alea, pea fakalalahi ʻo ma fakakikihi. Ne tatangi mai e matapaá he taimi ko iá. Naʻá ma ʻohovale he sio ki heʻema ongo faiako fakaʻapí he matapaá.

Naʻá ma fakaafeʻi mai kinaua ʻo fanongo ki heʻena pōpoakí. Ne kamata fai ʻe ha taha ʻo ʻema ongo faiako fakaʻapí e talanoa kia Mōsese mo e fānau ʻa ʻIsilelí heʻenau hola mei ʻIsipité. ʻI he aʻu ʻa e fānau ʻa ʻIsilelí ki he matāfanga ʻo e Tahi Kulokulá, naʻe ʻikai lava ke toe hoko atu ʻenau fonongá, pea ʻoku vave mo e ʻoho mai ʻa e kau ʻIsipité. ʻOku pehē ʻe he folofolá naʻe “manavahē lahi” e fānau ʻa ʻIsilelí (ʻEkesōtosi 14:10). ʻI he lotu ʻa Mōsese ke maʻu ha fakahinohinó, ne tali mai ʻe he ʻEikí, “Ko e hā ʻokú ke tangi ai kiate aú? lea ki he fānau ʻa ʻIsilelí ke nau ʻalu atu pē” (ʻEkesōtosi 14:15).

Hili hono lau ʻe he faiako fakaʻapí e folofola ko iá, ne mole atu e ongoʻi puputuʻú mo e manavaheé. Ne u fakatokangaʻi mo hoku uaifí ne ma nofo pē ʻo fifili ki he meʻa ʻoku totonu ke ma faí ʻo hangē pē ko e fānau ʻa ʻIsilelí ka ʻo ka fie maʻu ke ma “sio ki he fakamoʻui ʻa [e ʻEikí]” (ʻEkesōtosi 14:13), kuo pau ke ma ngāue kimaua.

ʻI homa tuʻungá, ko e laka kimuʻá ʻoku ʻuhinga ia ki hono fai ha fili fakapotopoto ʻo fakatefito he fakamatala kotoa ʻokú ma lolotonga maʻú, ngāue faivelenga, mo falala ki he ʻEikí. Kuo pau ke taʻofi ʻema aleá pea kamata ngāue ʻi he tuí. ʻI heʻema muimui ki he tataki ʻa e ʻEikí, ne mahino leva e meʻa ke faí pea lava ke ma fai ha meʻa ne ma fiefia ai. ʻOkú ma houngaʻia he ngaahi tāpuaki ne ma maʻu mei heʻema laka ki muʻa ʻi he tuí mo ha ongo faiako fakaʻapi naʻá na ueʻi fakalaumālie kimaua ke fai e fuofua laká.