Mensahe sa Unang Kapangulohan
Andam Na Ba Kita?
Ni Presidente Thomas S. Monson
Diha sa lugar diin ako nagpuyo ug nagserbisyo kaniadto, ang Simbahan naghimo og proyekto nga manokan, kadaghanan sa mga nagtrabaho mga boluntaryo sa lokal nga mga ward. Sa kasagaran maayo kini nga pagkadala nga proyekto, nagsangkap sa balay tipiganan sa bishop og liboan ka dosena nga mga itlog ug gatusan ka libras nga inihaw nga manok. Hinoon, dunay mga higayon, isip boluntaryo nga mga mag-uuma wala lang kini nagpasabut og mga kamot nga maluthan apan ang kawad-an usab og kadasig sa pagbati ug hunahuna.
Sama pananglit, kanunay gyud nakong mahinumduman ang panahon nga among gipundok ang batan-ong mga lalaki sa Aaronic Priesthood aron mag-spring cleaning. Ang among malipayon ug abtik nga grupo nagpundok para sa maong proyekto, ug paspas nga gipangibot, gipundok, ug gisunog ang daghang mga sagbot ug mga hugaw. Diha sa kahayag sa bonfire, kami nangaon og hotdog ug mipahalipay sa among mga kaugalingon sa trabaho nga maayong pagkahimo.
Apan, adunay usa lang ka makadaot nga problema. Ang kabanha ug ang kalayo nakadisturbo sa 5,000 ka mangitlogay nga mga himungaan nga kadaghanan niini nahiagom sa kalit nga pagpanglarot sa balhibo ug mihunong na sa pagpangitlog. Busa among gipasagdan ang pipila ka sagbut aron makakuha mi og mas daghang itlog.
Walay miyembro sa Simbahan kinsa mitabang sa pagsangkap niadtong nanginahanglan nakalimot o nagbasol sa kasinatian. Kakugi, pagdaginot, pagpaningkamot sa kaugalingon, ug pagpakigbahin ngadto sa uban dili na bag-o ngari kanato.
Kinahanglan natong hinumduman nga ang labing maayo nga paagi sa balay tipiganan anaa sa matag pamilya diha sa Simbahan sa pagtipig og tagana sa pagkaon, sinina, ug, kon mahimo, uban pang mga kinahanglanon sa kinabuhi.
Siyempre adunay mga panahon nga ang atong mga miyembro nagkinahanglan og tabang sa Simbahan. Ang balay tipiganan sa Ginoo naglakip sa panahon, mga talento, kahanas, kalooy, gipahinungod nga mga materyal, ug pinansyal nga mga pamaagi sa matinud-anong mga miyembro sa Simbahan. Kini nga mga kapanguhaan anaa sa bishop aron pagtabang niadtong nanginahanglan.
Kami nag-awhag sa tanang mga Santos sa Ulahing mga Adlaw nga magmabinantayon sa ilang pagplano, mahimong simple sa ilang pagkinabuhi, ug likayan ang sobra o wala kinahanglana nga utang. Daghang tawo ang nakalahutay sa kalisud sa pinansyal kon sila adunay pagkaon ug sinina ug walay utang. Karon atong makita nga daghan ang wala mosunod niini nga tambag: aduna silay supply sa utang ug walay sobrang pagkaon.
Akong balikon unsa ang gideklarar sa Unang Kapangulohan pipila ka tuig na ang milabay:
“Ang mga Santos sa Ulahing mga Adlaw gitambagan sulod na sa daghang katuigan sa pagpangandam alang sa kalisdanan pinaagi sa pagtagana og dyutang kwarta. Ang pagbuhat sa ingon makadugang pag-ayo sa seguridad ug kaayohan. Ang matag pamilya adunay responsibilidad sa pagsangkap sa iyang kaugalingong mga panginahanglan kutob sa mahimo.
“Kami nag-awhag kaninyo sa bisan asang dapit kamo nagpuyo sa kalibutan sa pagpangandam alang sa kalisdanan pinaagi sa pagtan-aw sa kahimtang sa inyong mga panalapi. Moawhag kami kaninyo nga magdaginot sa inyong mga galastuhan, disiplinaha ang inyong mga kaugalingon sa inyong pagpamalit aron sa paglikay sa utang. Bayri ang utang og dali kutob sa inyong mahimo, ug luwasa ang inyong mga kaugalingon gikan niining pagkaulipon. Pagtigum og dyutayng kwarta kanunay aron sa hinay-hinay makaugmad og pundong pinansyal.”1
Kita ba andam alang sa mga emerhensya sa atong kinabuhi? Hingpit na ba ang atong kahanas? Madaginuton ba ang atong pagkinabuhi? Kita ba adunay gireserba nga supply sa pagkaon? Kita ba nagmasulundon sa mga sugo sa Dios? Kita ba nagsunod sa mga pagtulun-an sa mga propeta? Andam ba kita sa paghatag sa atong pagkaon ngadto sa mga kabus, sa mga nanginahanglan? Kita ba matinuoron ngadto sa Dios?
Kita nagpuyo sa magubot nga panahon. Kasagaran ang atong umaabut wala mahibaloi; busa, kinahanglan gayud nga mangandam para sa walay mga kasiguroan. Kon moabut ang panahon sa pagdesisyon, milabay na ang panahon sa pagpangandam.
Pagtudlo gikan Niini nga Mensahe
Ikonsiderar ang mga panginahanglan niadtong inyong gibisitahan, paghunahuna og mga paagi nga kamo makatabang nila nga mahimong mas mapaningkamuton sa kaugalingon sa panarbaho, panalapi, pagtipig og pagkaon, o sa pagpangandam sa emerhensya. Paghunahuna og usa ka kahanas nga mahimo ninyong ipakigbahin uban kanila, sama sa pagpananom o pagdumala sa kwarta, nga makapahimo kanila sa pagsunod sa tambag ni Presidente Monson.
Alang sa mga ideya sa pagtudlo niini nga mensahe ngadto sa kabatan-onan ug mga bata, tan-awa sa pahina 6.