Susume!

Kana nga pulong nahimong usa ka motto alang kanako: “Padayon sa unahan! Mahimong positibo! Atubanga ang umaabut uban sa hugot nga pagtuo! Kini ang sama nga mensahe nga gihatag ngadto sa mga kabatan-onan sa Simbahan diha sa panapos nga seksyon sa Alang sa Kalig-on sa Kabatan-onan. Human giribyu ang mga panalangin nga moabut gikan sa pagkamasulundon sa mga sumbanan sa Ginoo, diha sa seksyon nga giulohan og “Padayon uban sa Hugot nga Pagtuo,” kini nag-ingon: “Samtang kamo mohimo niining mga butanga, ang Ginoo mohimo og daghan sa inyong kinabuhi kay sa inyong mabuhat sa inyong kaugalingon. Siya modugang sa inyong mga oportunidad, mopalapad sa inyong panan-aw, ug molig-on kaninyo. Siya mohatag kaninyo sa tabang nga inyong gikinahanglan aron sa paglahutay sa inyong mga pagsulay ug mga hagit. Makaangkon kamo og mas lig-on nga pagpamatuod ug makakaplag sa tinuod nga kalipay samtang kamo makaila sa inyong Amahan sa Langit ug sa Iyang Anak, nga si Jesukristo, ug mobati sa Ilang gugma alang kaninyo” ([2011], 43).

Ang ebanghelyo nagtudlo kanato nga magpadayon uban sa hugot nga pagtuo. “Pangita, ug kamo makakaplag; pagtuktok, ug kamo pagaablihan.” (Mateo 7:7). Alang kanako, kini nagpasabut og susume.

Ang samurai mao ang halangdon nga militar sa medieval ug sayo nga bahin sa modernong Japan. Ang mga Hapon maghisgut gihapon mahitungod sa usa kanila, si Ryoma Sakamoto, kinsa namatay niadtong 1867. Ang usa sa mga rason nga inila gihapon siya kaayo tungod kay siya kanunayng adunay positibo nga kinaiya. Siya wala mahadlok ni bisan kinsa o bisan unsa nga butang. Miadto siya sa bisan asa diin siya gikinahanglan. Nadasig sa sumbanan nga ang tanan nga mga tawo gimugna nga patas, naningkamot siya og maayo sa pag-establisar og usa ka bag-o nga gobyerno. Apan siya gipatay, ug gani sa dihang siya gidunggab makadaghan pinaagi sa espada sa laing samurai, siya wala mohunong. Siya misulay sa pagbarug ug paglakaw sa unahan. Kini nabantug kaayo nga istorya sa Japan.

Ako nakasabut nga kitang tanan adunay mga hagit ug mga pag-antus, ug usahay kita mobati nga kita giatake sa atong mga kaaway. Si Satanas motintal kanato nga mahimong negatibo sa atong hunahuna ug mawad-an sa paglaum.

Apan ako mopamatuod kaninyo nga ang ebanghelyo naghatag kanato og kalig-on sa pagsulti og susume ug pagpadayon. Ang ebanghelyo dili mohatag kanato og negatibo nga mga mensahe. Kita kinahanglan nga mobarug ug molakaw sa unahan uban sa hugot nga pagtuo, kay ang Ginoo nagsaad kanato nga kita dili mabuntog. “Ug ang Ginoo mao ang magauna kanimo; siya magauban kanimo, ikaw dili niya pasagdan, ni pagabiyaan ka niya: dili ka magmahadlok, dili ka magmaluya” (Deuteronomio 31:8).

Akong minahal nga mga higala, gusto nako nga kamo magmalipayon. Ang tinuod nga kalipay kinahanglang natukod diha sa kahibalo nga ang atong Langitnong Amahan buhi. Siya nahigugma ug nakaila sa matag usa kanato. Siya nasayud sa tanan mahitungod kanato — atong mga kahuyang, kalig-on, maayo nga mga punto, ngil-ad nga mga punto, mga hagit, ug pag-antus. Tungod sa Iyang gugma alang kanato, Siya mipadala sa Iyang Anak aron sa pagluwas kanato. Si Jesukristo mao ang akong Manluluwas. Siya ang Manluluwas sa akong pamilya. Siya mao ang inyong Manluluwas. Siya naggiya kanato. Siya nangulo kanato. Ako nasayud nga kini nga Simbahan mao ang Iyang Simbahan, ug ako nasayud nga si Presidente Thomas S. Monson mao ang atong buhi nga propeta.

Mosaad ako kaninyo nga kon kamo magbaton og positibo nga kinaiya ug magtinguha og maayong mga butang, makabaton kamo sa Espiritu Santo uban kaninyo. Kon kamo maghunahuna sa Dios ug sa maayong mga butang, ang Espiritu Santo mogiya kaninyo. Makahimo kamo sa pag-awhag sa inyong kaugalingon sa “pagpadayon sa unahan”, ug bisan pa sa inyong mga pagsulay, uban sa hugot nga pagtuo kamo magpadayon.