Talagsaong mga Lalaki

Nakadawat ko og sulat gikan sa usa ka misyonaryo sa California. Siya miingon nga usa sa mga organisasyon sa kababayen-an nagpapaniudto sa hotel. Ang babaye nga nagdumala mibutang og sobra nga plato sa lamesa, ug siya miingon, “Kon moagi ang sunod nga sundalo, ato siyang dapiton nga molingkod niini nga dapit sa lamesa.” Nan, nahitabo nga siya usa ka Mormon.

Sa dihang gisilbi nila ang kape, wala siya moinom niini. Sayon ra unta kaayo alang niining batan-ong lalaki sa pag-ingon, “Ah, wala bitaw si Mama dinhi. Si Papa wala dinhi. Ang akong bishop wala dinhi. Ako lamang ang bugtong lalaki uban niini nga mga babaye. Usa ka gamay nga tasa sa kape dili makadaut kanako.”

Apan kinahanglan niyang mahimong ehemplo sa mga pagdayeg sa Ginoo kinsa mitawag kaniya gikan sa kangitngit ngadto sa talagsaong kahayag, ug wala siya moinom niini. Sila mitanyag kaniya og tsa, ug mibalibad siya niini. Dayon sila gusto nga masayud sa tanan mahitungod kaniya. Kini ang naghatag og oportunidad aron makasulti siya kanila kon giunsa siya pagpadako. Ug dayon sa dihang nahuman na sila og kaon, gidagkutan nila ang ilang mga sigarilyo ug nanghatag sa palibut. Siyempre, ang batan-ong sundalo mibalibad niini. Nan, dihadiha dayon usa niadtong mga babaye mihukom, ‘Kon ang mga Mormon elder mobisita sa akong balay, ako silang pasudlon. Gusto kong mahibalo pa sa usa ka katawhan kinsa makapadako og batan-ong lalaki sama niadtong lalaki nga milingkod sa among lamesa karong adlawa.”

Laing batan-ong lalaki nga Mormon gipadala sa silangan ngadto sa usa ka eskwelahan sa pagbansay og mga opisyal. Usa ka bag-ong commanding officer miabut ngadto sa kampo, ug miandam sila og usa ka salo-salo sa pagpasidungog kaniya. Didto, tupad sa matag plato, mao ang usa ka baso sa ilimnong makahubog. Sa dihang miabut ang tukma nga panahon, ang matag usa niadtong potensyal nga mga opisyal mibarug bitbit ang iyang baso sa bino aron sa pag-toast nianang bag-ong opisyal. Ang tanan gawas sa usa ka batan-ong lalaki, ug siya miisa sa usa ka baso nga gatas.

Nan, ang opisyal nakakita niini. Diretso niyang giadto kadtong batan-ong lalaki pagkahuman sa kalingawan, ug siya miingon, “Nganong mi-toast man ka nako og usa ka baso nga gatas?”

“Nan, opisyal,” siya miingon, “Wala pa gayud ko sukad makainom og bino. Dili ko gustong moinom niini; ang akong mga ginikanan dili gusto nga moinom ko niini; ug wala ko magtuo nga buot nimo nga moinom ko niini. Ug gusto nakong mo-toast nimo, busa naghunahuna ko nga igo na kanimo nga mo-toast ko nimo gamit ang naandan nakong imnon.”

Ang opisyal miingon, “Report ngadto sa punoang buhatan inig ka buntag,” ug misulti kaniya kon unsang orasa.

Nagtuo ko nga wala katulog nianang gabhiuna kadtong batan-ong lalaki, apan sa dihang miadto siya sa buhatan sa opisyal pagkasunod buntag, ang opisyal mi-assign kaniya og luna diha sa iyang staff uban niini nga pagpasabut: “Gusto ko nga libutan ang akong kaugalingon sa mga tawo nga adunay kaisug sa pagbuhat sa unsay ilang gihunahuna nga sakto dili igsapayan ang mga hunahuna sa uban mahitungod niini.”

Dili ba nindot kana! Talagsaon siya komon nga batan-ong lalaki, dili ba? Manghinaut ko nga kamong tanan dili komon. Manghinaut ko nga kon kamo anaa sa samang sitwasyon himoon ninyo ang husto nga desisyon.