Nagpatubo ba Ko og mga Bata o mga Bulak?

Imahe

illustration with young girls holding flowers

Niadtong gagmay pa among mga anak, mibalhin mi sa gamay nga balay nga may nindot nga nataran. Sa isig ka kilid sa atubangang pultahan adunay duha ka walay sulod nga mga tamnanan og bulak, ug bisan tuod ang akong kasinatian sa pagpanamon limitado lang, naghinam-hinam ko sa pagtanom og mga bulak niini. Mipalit ko og mga libro sa pagpanamom ug mi-order og mga katalog sa mga tanom ug binhi ug gitun-an kini pag-ayo.

Sa misunod nga pipila ka bulan giplano na nako ang akong pagtanom, giandam ang yuta, ug mitanom og sobra sa 200 ka mga saha. Nasayud ko nga molanat pa og pipila ka bulan sa dili pa nako makita ang resulta, apan kanunay gihapon nakong gisusi ang tanaman kon aduna nay nanubo. Sa sayo sa tingpamulak misugod na og bukhad ang akong mga bulak, nagsugod sa gagmayng purple nga irises ug dayon mga daffodil. Sa tunga-tunga sa tingpamulak ang akong mga kinahon nga tamnanan og bulak napuno sa nindot kaayo nga mga tulip. Ganahan kaayo ko sa akong tanaman, ug kanunay kong naglingkod sa atubangan aron lang magtan-aw sa mga bulak.

Usa ka hapon ang among kwatro anyos nga anak nga babaye, si Emily, adunay kadula nga higala. Sa wala pa moabut ang inahan sa iyang higala aron kuhaon siya, ang mga babaye naglisud og agi sa pultahan sa kusina, napuno ilang bukton og mga tulip. “Tan-awa unsay among gidala para nimo,” malipayon silang misulti. Ilang gikutlig hapit kada bulak.

Ang mga tulip mamukhad kausa lang matag tuig. Nasubo ko og maayo—ang tanan nakong kahago, tanan nga paghulat. Gipuno namo ang akong mga plorera og mga bulak ug ang sobra gipadala sa higala ni Emily. Wala madugay, misumbong ko sa akong inahan kabahin sa nahitabo, siya miingon, “Nan, maayo na lang nga nagpatubo ka og mga anak ug dili mga bulak.”

Nakaamgo ko nga kinahanglan nakong usbon akong panglantaw. Akong nahinumduman ang kanta sa Primary nga akong gikanta ngadto sa akong mga anak kabahin sa pagpundok sa mga bulak:

Akong nakita ang pagkaguba sa akong tanaman, apan duha ka kwatro anyos nga batang babaye nakakita sa pagpadayag og gugma.

Ang pagtanom og bulak nanginahanglan og pailub, ug ang pagsabut sa sitwasyon sumala sa panglantaw sa akong anak mas nagkinahanglan og pailub. Apan ang pagkat-on og pailub isip inahan mas nakapaduol nako ngadto sa Ginoo.