Prea mo Katedral

Dani lukluk i go antap be i no save luk top blong naesfala katedral. Ol pipol we oli blong wan defren Jos oli stap kam long ples ia. Dani i no andastanem from wanem famle blong hem i stap visitim jos ia long wan Fraedei, be Papa i talem se oli stap go long wan samting we oli singaotem Ivensong.

“?Wanem ia?” Dani i askem.

“Hem i wan miting we ol pipol oli stap singsing, ridim skripja, mo prea tugeta,” Papa i talem. “Semmak olsem wan famle long en blong dei.”

Dani i laekem tingting ia. Hem mo famle blong hem oli stap visitim Inglan. Las Sandei, oli bin go long wan wod long wan siti we nem blong hem i Yok. Long Praemeri, evri pikinini oli bin save ol semfala skripja mo singsing we Dani i save. Hem i save se wod we hem i visitim i pat blong tru Jos blong Jisas, semmak olsem wod blong hem long homples blong hem.

Be katedral ia i defren evriwan long wanem hem i stap luk oltaem. Hem i luk wan smol tebol wetem ol kandel. Dani i lukluk wan boe we i stap laetem wan kandel.

“?From wanem yu stap laetem kandel?” Dani i askem hem.

Boe ia i smael. “Mi laetem wan kandel taem mi stap prea from ol spesel samting. Taem laet blong kandel i stap bon i go, mi stap hop se prea blong mi, bae God i gohed blong harem.”

Long Dani, i luk se oli ol nomol kandel nomo. Hem i konfius smol, be hem i gat kaen fasin. Hem i smael long boe.

Dani mo famle blong hem i sidaon, mo i no longtaem afta, Ivensong i stat. Hem i luk semfala boe ia i sidaon i no longtaem tumas. Afta, hem i luksave se hem i no save ol singsing we evriwan i stap singsing long hem. Taem oli prea, oli stap ridim wan smol buk. Evri samting i defren long wanem we hem i save.

Be miusik i naes tumas, nomata we hem i no save gud. Nao wan man i girap blong ridim ol skripja. Hem i werem wan longfala dres, be i no wan sut mo tae olsem bisop blong Dani. Be taem hem i stat blong rid, !Dani i luksave stori ia! Hem i stap ridim stori we Jisas i hilim 10 man we oli gat leprosi.

Dani i talem slo: “Papa, mi laekem stori ia.”

Papa i smael. “Mi tu.”

Man ia we i werem longfala dres i talem wan prea. Hem i askem God blong blesem olgeta we oli sik mo olgeta we oli stap long nid. !Semmak olsem Dani! Hem i askem wan spesel blesing from ol lida blong jos. Dani i tingbaot olsem wanem famle blong hem i stap askem oltaem long Papa long Heven blong blesem Presiden Tomas S. Monson mo ol kaonsela blong hem.

Wan gud filing i kam long hat blong Dani. Hem i bin save se Papa long Heven i stap talem long hem se Hem i lavem evriwan long ol pikinini blong Hem, mo i stap harem evriwan long ol prea, iven sapos oli stap go long wan defren jos mo oli no gat gospel we i fulwan.

Taem oli girap blong aot, Papa i jekem fon blong hem. Hem i no luk gud taem hem i stap ridim ol mesej blong hem. Hem i talem: “Sista Monson i ded.”

“!O no!” Dani i talem wan kwik prea insaed long hat blong hem se Presiden Monson bae i oraet.

Wan i askem: “?Yufala i oraet?” Hemi boe ia we hemi toktoklong hem bifo. Hem i harem Dani mo i luk se hem i wari.

Dani i talem: “Sista Monson i ded.” “Hem i waef blong profet blong mifala, Presiden Monson.”

“Sore tumas.” boe ia i talem long kaen fasin. “Bae mi laetem wan kandel blong hem.”

Dani i smael mo talem tangkyu. Hem i ting se i naes blong boe ia i talem wan spesel prea blong Presiden Monson. Hem i save se Papa long Heven bae i harem prea we hem i talem long hat blong hem, mo tu, prea ia we boe i talem.