Raet Rod
I Kam long Elda Klodio D. Sivik
Blong Olgeta Seventi
I kam long “Bae Yumi No Tekem Rong Rod,” Jeneral Konfrens, Epril 2014.
Harem ol toktok blong God ia we i mekem yu (luk long D&C 43:23).
Plante yia i pas, famle blong mi mo mi i visitim Ark Nasonal Pak long Yuta, YSA. Wan long ol naefala ark we man i savegud long pak, hem i Deliket Ark, mo mifala i disaed blong klaem long maonten blong kasem.
Mifala i smaet long stat, be afta sam oli wantem spel. Mi bin wantem kasem ples ia, mekem se mi gohed miwan. Mi no lukluk long rod we mi mas folem, nao mi stat blong folem wan man we mi luk se hem i save weaples hem i stap go.
Rod ia i kam had moa blong klaem. Mi save stret se famle blong mi bae i no save mekem. Wantaem nomo, mi luk Deliket Ark ia, be long sapraes blong mi, mi no save kasem. Rod we mi tekem i no lidim mi i go long ark.
Mi kros smol mo i tanemraon i gobak. Mi wet kasem taem mi mitim grup blong mi bakegen. Oli talem long mi se oli bin folem ol saen we oli soem raet wei, mo wetem kea mo hadwok, oli kasem Deliket Ark. Sore tumas, mi bin tekem rong rod. !O Mi lanem wan lesen!
No mekem ae blong yu i lusum rod i go long laef we i no save finis wetem Papa blong yu long Heven. Folem olgeta prinsipol mo komanmen blong gospel we yu lanem, mo bae yu stap long raet rod blong laef wetem Hem blong oltaem.