Ol Kwestin mo Ansa
“?Olsem wanem bae mi filim oraet blong toktok long bisop blong mi abaot sam trabol, o sam poen?”
Maet bae yu filim i defren smol blong toktok long bisop blong yu long saed blong sam samting we yu stap traehad wetem, mo hemia hem i nomol. Plante taem, yumi filim defren long fored blong ol niu eksperiens o bifo yumi toktok wetem wan adalt.
Be bisop blong yu, God i singaotem hem. God i singaotem hem from se hem i wan disaepol blong Jisas Kraes we i komitim hem. Bae hem i mekem evri samting blong hem i stap kaen mo i andastanem man. Gol blong hem i blong helpem yu blong kam long Sevya blong mekem se yu save faenem pis. Long fas ples, bae yu filim sem smol blong toktok long hem long saed blong sam kwestin o sam sin, be bae hem i no save tingdaon long yu afta long hemia. Wanem i tru, bae hem i glad blong yu gat tingting blong wantem kam antap. Mo bae hem i kipim storian blong yu oli sikret.
Yu no nid blong tekem ol hevi samting blong yu, yuwan nomo. Bisop blong yu i save help blong faenem ol ansa long ol kwestin blong yu, mo sapos i nid, i helpem yu blong sakem sin mo winim, tru long Atonmen blong Kraes, winim ol filing blong rong, lusum hop o filing blong no stap klin inaf.
Taem yu toktok long bisop blong yu, bae yu filim lav we hem i gat long yu. Nomata hem i responsibol blong ful wod o branj, stamba wok blong hem i blong lukaot long gud laef blong ol yang man mo ol yang woman. Bae yu no hambak long hem sapos yu askem help.
Yu save prea long Papa long Heven blong kasem paoa mo strong paoa long tingting blong toktok wetem bisop blong yu. Hem i givim raet blong hem long bisop blong yu blong helpem yu mo bisop blong yu i wantem tumas blong mekem olsem. Sapos yu go wetem wan open hat mo wan tingting blong wantem kam gud moa, bae yu luk se taem yu aot long ofis blong hem yu filim i moa gud bitim bifo.
Bae Hem I No Save Tingdaon long Yu Afta
Bisop blong wod blong yu i kasem atoriti blong lidim yu tru long ol step blong fasin blong sakem sin. Samtaem, blong tanem yu i go long bisop i wan wei ia nomo blong yu sakem sin fulwan tru long Sevya. Taem mi nidim blong toktok long bisop blong mi, hem i helpem mi blong faenem Sevya mo winim bigfala soa we mi eva gat. Bisop blong yu i wantem helpem yu. Koling blong hem i blong tekem kea long yu, mo bae hem i no save tingdaon long yu from wan samting we yu nid blong luk hem from.
Madison D. 18 yia, Yuta, YSA
Bisop blong Yu I Glad blong Givhan
Mi tu bifo, mi filim i defren blong stap long intaviu, be afta, mi luksave se bisop blong mi, oltaem i glad blong helpem mi stretem ol problem blong mi. Trastem bisop blong yu; hem i wan man blong lukaot long sipsip, mo wod i grup blong sipsip blong hem.
Jemi R. 19 yia, Kojambamba, Bolivia
Bae Hem I No Spolem Tras blong Yu
Mi kam blong save se ating wan bisop, hem i wan adalt ia nao we wan yangfala i save askem help long hem. Bae Hem i neva spolem tras we yu gat long hem—evri samting we yu serem wetem hem i stap wetem hem long ofis blong hem. Samtaem, hem i had blong serem ol problem blong yu, be blong toktoktaem yu fesem wan man we i lavem mo kea long yu mo i wantem yu mekem gud, i moa isi.
Nikol S. 18 yia, Aedaho, YSA
Yu Save Dipen long Hem
Bisop o branj presiden blong yu i wan tru wokman blong Lod. Yu save dipen long hem blong hem i lidim yu taem yu stap lukaotem insperesen we i kam long Tabu Spirit mo ol skripja. Yu mas andastanem se bisop i stap ia blong helpem yu mo God nao i stap lidim hem.
Stanlislav R, 19 yia, Donetsk, Yukren
Tingbaot se Hem I Lavem Yu
Sapos yu rili gat wan samting yu wantem toktok raon long hem wetem bisop blong yu, bae i moa isi blong storian long hem long ol samting abaot skul o ol nara samting olbaot fastaem. Sapos yu filim defren from se yu nidim blong toktok long hem from sam samting blong yu sakem sin from, jes tingbaot se hem i lavem yu. Yu no nid blong filim defren long wanem nao bae hem i tingting long yu afta, from se, ?from wanem bae hem i lukdaon long yu sapos yu wantem kam kolosap moa long Kraes?
Asli D. 17 yia, Arisona, YSA
Prea blong Save
Askem yuwan from wanem yu filim defren blong toktok long bisop. ?Yu ting se bae hem i no save givhan blong stretem ol problem blong yu? Prea blong save se i tru se bisop i lavem yu mo God i singaotem hem blong helpem yu.
Adam H. 13 yia, Kalifonia, YSA
Iven Sapos Yu Mekem Wan Mistek
Yu save harem se i had mo yu sem blong konfesem samting long bisop blong yu, be taem yu kamaot long ofis ia, bae yu harem gud, mo bae yu save se Papa long Heven i lavem yu. Hem i wantem yu blong yu stap hapi, iven sapos yu mekem wan mistek.
Amanda W. 16 yia, Yuta, YSA
Hem I Stap Ia blong Givhan
Bisop i man blong lukaot long sipsip long wod blong yu. Tingbaot se bae hem i traem bes blong hem blong helpem yu mo hem i gat paoa blong God long saed blong hem. Sapos yu filim se yu fraet, yu save prea blong kasem paoa blong save toktok long bisop blong yu. Long en, bae yu glad se yu bin go luk hem—mo bae i gud inaf.
Samuel H. 14 yia, Aedaho, YSA