Sara blong Wan Narawan

Mi faenem i had tumas blong yusum bilif blong mi olsem ansa blong wan simpol kwestin olsem “?From wanem yu no dring kofi?” Bifo, mi stap talem ol smol eskius olsem “I konkon tumas,” o “mi no laekem tes blong hem.”

?From wanem mi sem? ?From wanem mi fraet tumas blong stanap from wanem mi stap biliv long hem? Naoia we mi lukluk i gobak, mi no andastanem stret wanem nao mi stap fraet long hem. Be mi tingbaot stret taem ia we mi stop blong haed biaen long ol eskius.

Wan dei, long Inglis klas long hae skul, tija i anaonsem se bae mifala i luk wan pat blong wan TV program we mi bin save se mi no sapos blong lukluk. Ol narafala studen oli singaot we oli glad, nao fren blong mi, Sara, i leftemap han blong hem mo askem sapos hem i save aot.

Taem tija i askem se from wanem, Sara i ansa wantaem nomo se “From se mi Momon, mo mi no stap lukluk ol program ia we i gat tumas rabis toktok ”

Strong paoa long tingting blong hem blong stanap long fored blong klas i mekem mi sapraes. From Sara, mi tu mi stanap mo wet aotsaed wetem wan klia tingting, kasem taem program ia i finis.

Sara i jenisim mi blong oltaem. Mi stat blong eksplenem ol bilif blong mi, be i no blong mi ronwe long topik we i stap. Mo long en, mi faenem se mi gat tras long miwan mo mi bin tekpat long moa aktiviti long Jos mo long skul.

Mi neva talem long Sara hamas nao eksampol blong hem i bin impoten long mi. Be mi traem blong mekem folem eksampol blong hem blong gat tras long miwan. Naoia, mi luksave se blong stap olsem wan memba blong gudfala mo tabu Jos blong God i no wan samting nating blong stap sem from. Mi hop se, tru long eksampol blong mi, bae mi save kam Sara blong wan narawan.