?Huia Hiro blong Yu?

Eli i stap kakae fingganel blong hem. Mis Fits i stap wokbaot long medel blong ol tebol blong klas mo askem wanwan studen, wan afta wan:

“Huia hiro blong yu?” Mis Fits i askem Jeremi.

Jeremi i no westem taem blong ansa. “!Papa blong mi!” hem i talem wetem praod.

Mis Fits i smael. “?Mo yu Sara?”

Ansa blong hem i kam kwiktaem. “Ebraham Linkon.”

Eli i filim hat blong hem i pam taem Mis Fits i gohed blong wokbaot long medel blong ol studen. Oli bin tokbaot ol hiro ful dei, mo naoia, evriwan i mas talem huia hiro blong hem—!long fored blong klas!

Amba mo Jastin, tufala i talem se mama blong tufala i hiro blong tufala. Wolta i talem se i bubuman blong hem. Sam nara studen oli talem nem blong wan king o wan presiden.

Samfala studen nomo i stap mo Mis Fits bae i kasem Eli. Hem i mas tingting long wan hiro—kwiktaem.

Eli lukluk sus blong hem, i sem. Blong talem nem blong wan hiro i no wan problem. Hem i save finis huia hiro blong hem. Hem i Jisas Kraes Hem i bin hilim ol sikman, mekem ol dedman oli laef bakegen long ded, mo i bin pem praes blong sin blong evriwan. !Hem i hiro we i moa hae we i bin laef! Hem i fraet tumas blong talem.

Eli i kakae bigfala fingga blong hem taem hem i stap tingting se bae hem i talem long ful klas se Jisas Kraes i hiro blong hem. ?Olsem wanem sapos Jeremi i laf long hem? ?Olsem wanem sapos Sara mo Amba, tufala i tokbaot hem long brektaem?

Yes, hem i save se Jisas Kraes i hiro blong hem. Be hemia i no minim se evri narawan i mas save.

Mis Fits i stop long fored blong tebol blong Eli, i smael. “Mo ?huia hirao blong yu, Eli?”

Eli i lukluk long ol nara studen long saed blong hem, i go kasem Mis Fits. “Ebraham Linkon”, hem i talem sloslo.

Fes blong Mis Fits i laet. “!Gud!” hem i talem mo wokbaot i go long nekis studen long laen.

Taem hem i go, solda blong Eli i harem gud. O, i pas finis nao. Las samting we bae i hapen i we bae evriwan long klas bae i save huia hiro blong hem—

“Jisas Kraes,” wan voes i talem.

Ae blong Eli i open bigwan taem hem i lukluk i go. Longwe—daon long laen ia—i gat wan smol boe i sidaon wetem hea blong hem olbaot. Hem i bunbun mo i no tok tumas, mo oltaem, hem i sidaon long bak blong klasrum. Eli i no save nem blong hem. Hem i no tingbaot se boe ia i stap toktok—kasem naoia nomo.

Sam studen oli tanem raon mo lukluk boe ia, be hem i no luk olgeta. Hem i jes lukluk Mis Fits mo toktok bakegen. “Hiro blong mi i Jisas Kraes.”

Mis Fits i smael gud mo gohed i go long laen ia. Be Eli i lukluk long boe ia wetem sapraes. Hem i bin fraet blong talem evriwan long saed blong hiro blong hem, be boe ia i no fraet. !Hem i no stap go long Jos tu! Be hem i bin save olsem wanem i impoten blong stanap olsem wan eksampol blong Jisas Kraes, iven taem i had blong mekem.

Eli i smael long boe ia. Bae hem i nomo fraet blong talem huia i hiro blong hem bakegen. Yes, tufala tu nao.