Yumi Tokbaot Kraes
Paoa blong Fet
Woman we i raetem hemia i stap long Arisona, YSA.
Sapos Papa long Heven i mekem yumi fri long olgeta jalenj blong yumi from nomo yumi askem, nao bae Hem i karemaot ol stret eksperiens ia we yumi nidim blong Jisas i sevem yumi.
Long wan yia, taem mi stap long kolej yet, mi stap mekem wan tes mo nek blong mi i stat blong soa. Soa ia i no go lus iven taem we strong taem blong tes i pas finis. Mi go luk dokta mo ol speselis, mo mi traem sam tritmen, be stil, soa ia i bon gohed. Ova long nekis yia, taem mi bin traehad blong gohed wetem soa ia, mi bin stap traehad tu blong leftemap fet blong mi. Mi spendem plante taem blong prea; mi stadi long ol skripja, mo mi askem blong kasem ol prishud blesing. Mi bin filim se sapos mi gat inaf fet, bae mi kam gud bakegen.
Jisas Kraes i hilim ol sikman, olgeta we oli no save luk, olgeta we oli no save wokbaot, mo olgeta we oli gat sik leprosi—folem “bilif blong olgeta” (Matiu 9:29). Mi bin save se Hem i gat paoa blong hilim mi olsem we Hem i bin mekem long plante narafala man long taem we Hem i laef long wol ia. Nao mi talem long miwan se, from se mi no gat inaf fet, hemia nao Hem i no hilim mi, mekem se mi traehad strong moa. Taem mi bin stap gohed wetem tritmen blong mi long bodi, mi bin prea mo mi bin livim kakae mo mi bin stadi mo mi bin biliv. Be yet, soa ia i gogohed nomo.
Olgeta skripja oli tijim yumi se wetem fet, yumi save wokem ol merikel (luk long Matiu 17:20), be yet, mi no kam oraet long smol soa ia. ?Wehem nao paoa long fet blong mi? Nao laswan, mi kwaet nomo mo mi akseptem situesen blong mi, mi faenem ol wei blong gohed nating mi harem i soa, mo mi kam blong stap glad blong kasem ful save abaot fet mo hiling long wan nara taem long fiuja.
Sam yia afta, mi bin stap storian wetem wan fren we i stap traehad wetem wan sik we i mekem hem i wantem traot; sik ia i sendem hem i go long hospital moa long wan taem, long taem we hem i gat bel. Erin i wantem gat wan narafala bebi, be hem i fraet tumas se bae hem i filim nogud olsem fas taem we hem i gat bel. Hem i talem long mi se hem i bin stap livim kakae mo stap prea mo hem i biliv tru se Papa long Heven bae i no save askem hemia long hem long nambatu taem.
Taem mitufala i stap toktok i go, mi tingbaot skripja ia: “Yufala i stap kwaet; yufala i mas save we mi mi God” (Ol Sam 46:10). Mi tingting long eksperiens blong miwan blong lanem blong stap kwaet long medel blong ol hadtaem, mo mi talem gud long Erin blong gohed blong gat fet, be i no blong mekem fet blong hem i dipen long sapos yes o no bae hem i sik long nekis taem we bae hem i gat bel.
Taem mi gohed blong stadi long prinsipol ia blong fet, mi tanem i go long toktok blong Alma long saed blong fet, we hem i stap tijim se “sapos yufala i gat fet, yufala i hop long ol samting we yufala i no save luk, we oli tru” (Alma 32:21).
Taem mi tingting hevi long skripja ia, mi faenemaot se fet i no wanem we mi tingting long hem. Alma i tijim yumi se, fet, i blong hop long ol tru prinsipol. Blong gat fet i no minim se bae yumi bilivim se Papa long Heven bae i givim yumi, oltaem, wanem we yumi askem long taem we yumi askem. Blong gat fet se Kraes bae i hilim nek blong mi, o blong wantem se bae Hem i mekem Erin i nomo sik long taem we hem i gat bel, i no blong gat fet long ol tru prinsipol. Be, yumi save gat fet se Kraes i gat paoa blong hilim man, se Hem i save mo lukluk long yumi, se bae Hem i mekem yumi kam strong moa, mo sapos yumi stap strong gud, bae yumi save kwalifae blong kasem laef we i no save finis.
Lod i promesem: “Eni samting we bae yu askem wetem fet, bilivim se bae yu kasem long nem blong Kraes, bae yu kasem samting ia” (Inos 1:15). Mi biliv se paoa long promes ia i stap long kaonsel blong biliv “long nem blong Jisas Kraes.” Insaed long Baebol Diksonari long saed blong prea, i stap tijim yumi se yumi prea long nem blong Kraes taem tingting blong yumi i olsem tingting blong Kraes, mo ol samting we yumi wantem i olsem ol samting we Kraes i wantem—taem ol toktok blong Hem oli stap long yumi (Jon 15:7). Nao bae yumi askem ol samting we i posibol blong God i givim long yumi. Plante prea, oli no gat ansa from se oli no mekem long nem blong Kraes nating; oli no ripresentem nating tingting blong Hem, be i kamaot long selfis fasin blong hat blong man.”
Taem yumi askem wan samting wetem fet, we i go wetem tingting blong God, bae Hem i givim long yumi folem tingting blong hat blong yumi. Papa long Heven i save yumi, i lavem yumi, mo i wantem se yumi gat evri samting we i nid blong yumi gobak long ples blong Hem. Mo samtaem, ol samting ia oli ol tes, ol trabol, mo ol jalenj (luk long Fas Pita 1:7). Sapos Papa long Heven i mekem yumi fri long olgeta jalenj blong yumi from nomo yumi askem, nao bae Hem i karemaot ol stret eksperiens ia we yumi nidim blong Jisas i sevem yumi. Yumi mas lanem blong trastem plan we God i gat blong yumi, mo blong mekem tingting blong yumi i folem tingting blong Hem. Taem yumi stretem ol samting we yumi wantem wetem ol samting we Hem i wantem, fasin ia blong yumi dipen evriwan long Hem bae i save mekem yumi kwalifae blong kasem risal blong fet blong yumi, we i blong God i sevem sol blong yumi (luk long Fas Pita 1:9).