Wan Narafala Grup blong Sipsip mo Wan Man blong Lukaot long Sipsip

Wan ples we fanis i raonem we oli putum wan grup blong ol sipsip insaed long hem i stap tijim yumi abaot kea we Sevya i gat long ol pipol blong Hem.

Grup blong Ol Sipsip blong Bifo

Wud Stik

Man blong Lukaot long Sipsip

Ston wol

Doa

Sipsip

Sling

Longfala Stik

Wanem hemia: Wan simpol fanis, wan ples we wol i raonem

Stamba Tingting: Blong protektem wan grup blong ol sipsip agensem ol nara animol we i wantem kakae olgeta, mo tu, ol stilman, speseli long naet.

Ol Tul mo olsem wanem oli bildim: Ol ston, we plante taem, oli putum ol smol branj wetem nil antap long ol stonwol ia. Ol tik nil branj, oli bin stap yusum olgeta tu blong mekem fanis blong sot taem. Samtaem oli stap yusum ol hol blong ston blong putum sipsip long hem, wetem ol smol ston mo smol bus we oli putum long fored blong hol blong ston ia.

Tru Samting long Baebol

Ol sipsip, oli bin impoten tumas from mit, melek, gris, wul, skin mo hon blong olgeta, mo oli yusum plante olsem animol blong mekem sakrifaes.
Long Isrel, ol waeldog, ol waelpuskat, ol kaen taega, mo ol jakal we bae oli save kakae ol sipsip. Long taem bifo, ol laeon mo ol bea tu oli bin stap laef long ol ples ia (luk long Fas Samuel 17:33–37).
Ol man blong lukaot long sipsip oli yusum longfala stik blong lidim ol sipsip mo wan wudstik mo wan sling blong difendem olgeta.
Wan man blong lukaot long sipsip i lidim ol sipsip blong hem blong go kakae mo dring wota long deitaem (luk long Ol Sam 23:1–2) mo oli kambak long fanis long naet taem. Man blong lukaot long sipsip bae oli kaontem ol sipsip taem oli stap kambak, mo stap lukaotem olgeta we oli mestem rod sapos sam oli no stap. Afta, bae hem i slip long fored blong doa blong fanis blong protektem olgeta.
Jisas Kraes i singaotem Hem Gudfala Man blong Lukaot long Sipsip (luk long Jon 10:11–15) from se Hem i givim laef blong Hem from yumi. Hem i komperem Hemwan long doa blong fanis (luk long Jon 10:1–9) from se tru long Hem nao yumi kasem kakae long saed blong spirit, spel, pis, fasin blong sevem man, mo fasin blong kam olsem wan god.
Aposol Pol i komperem Jos ia long wan grup blong ol sipsip (luk long Ol Wok 20:28).

Wanem Nao Yumi Save Lanem

Fanis blong Sipsip oli:

Ples we grup blong animol i kam tugeta long hem. Olsem ol memba blong Jos, yumi stap serem wan strong yuniti tru long fet mo kavenan blong yumi, mo tu, tru long fasin blong kam tugeta long wan ples. Presiden Henri B. Aering, Fas Kaonsela long Fas Presidensi i tijim:“Glad blong yuniti we Papa long Heven i wantem tumas blong givim i no stap hemwan. Yumi mas lukaotem mo kwalifae from wetem ol narawan. I no wan sapraes we God i askem strong long yumi blong kam tugeta wanples blong mekem se Hem i save blesem yumi. Hem i wantem yumi blong kam tugeta insaed long ol famle. Hem i setemap ol klas, ol wod, ol branj, mo i givim oda long yumi blong mit tugeta plante taem. Long ol kam tugeta ia … yumi save prea, mo wok from yuniti we bae i givim glad long yumi, mo bae i dabdabolem paoa blong yumi blong givim seves” (“Our Hearts Knit as One,” Liahona, Nov 2008, 69).

Wan ples we i gat sefti mo spel. Long Jisas Kraes, yumi faenem spel long sol blong yumi (Matthew 11:29). Jos blong Hem i wan ples blong difendem yumi, mo i wan ples blong haed (luk long D&C 115:6). Mo olsem we Presiden Boed K. Peka, Presiden blong Kworom blong Olgeta Twelef Aposol i tijim: “Yumi faenem sefti mo sekiuriti blong yumiwan taem yumi ona long ol kavenan we yumi bin mekem, mo taem yumi stap mekem ol aksen blong stap obei we ol man we oli stap folem Kraes oli mas mekem” (“These Things I Know,” Liahona, Mei 2013, 7).

Man we i lukaot long sipsip i lukaot long hem. Jisas Kraes i Gudfala Man blong Lukaot long Sipsip ia we i sevem yumi. Hem i bin safa mo i bin ded blong mekem se yumi save winim sin mo ded mo gobak long Papa blong yumi long Heven. Taem yumi kam long Kraes mo stap obei long olgeta komamnen blong Hem, Hem i blesem, gaedem, mo protektem yumi wanwan, mo tu, yumi olsem ol kavenan pipol blong Hem.