Pikja

illustration of firefighters

Ol pikja oli kam long Julia Yelo

I wan kwaet dei long wokples blong mi olsem wan volontia faeaman, mekem se mi disaed blong ridim Buk blong Momon. Taem wan fren long wok i luk mi stap rid, hem i askem sapos mi save olsem wanem blong putum klos blong faet blong God long taem blong yumi tedei. Taem mitufala i bin stap toktok, alam i ring. I gat wan faea long wan stoa kolosap.

Kwiktaem mifala i putum faea klos blong mifala mo go stret long ples ia. Ol laet blong faea oli bigwan, mo taem mifala i stap kam kolosap long stoa, wan samting i faerap i kam long mifala. Ol laet blong faea oli raonem mifala. Wanem i bin faerap ia i bin mekem tingting blong fren blong mi mo mi i lus smol taem. Be tangkyu long tul blong mifala mo klos we i protektem mifala, mifala i no kasem kil.

Taem mifala i gobak long faea stesen afta we mifala i kilimdaon faea, mi askem fren blong mi sapos hem i tingbaot kwestin blong hem long saed blong klos blong faet blong God. Hem i talem se yes, mo mi eksplenem se klos blong faet blong God i semmak olsem faea klos we i protektem mifala. Yumi mas werem oltaem blong mekem se yumi save stanap agensem ol strong atak blong enemi. Sapos yumi obei long ol komanmen, bae yumi gat blesing blong paoa blong proteksen we i kam long klos blong faet blong God, mo Tabu Spirit i lidim yumi.

Fas Samuel 16:7. “From we fasin blong mi blong lukluk man i no olsem fasin blong man. Man i stap lukluk long bodi blong man nomo, be mi mi stap lukluk long tingting blong hem.”

Bifo mi joenem Jos, oltaem mi stap lukluk miwan olsem wan man olbaot wetem ol paoa we i nomol nomo. Mi filim se no gat wan samting we i impoten blong givim. Mi fraet blong soem long ol pipol huia stret mi from se mi fraet se bae oli sakemaot mi mo mekem nogud long mi. Mi ting se evriwan raon long mi i moa strong, i moa smat, mo i moa gud bitim mi.

Be evri tingting ia oli jenis taem mi kam wan memba blong Jos blong Jisas Kraes blong Ol Lata-dei Sent. Mi lanem se yumi evriwan i ol pikinini blong God mo yumi kasem ol tabu kwaliti. Naoia, mi andastanem se i no gat kompetisen long huia i moa smat, i moa rij, o i luk gud moa. Long ae blong Lod, yumi evriwan i stap long wan ikwol ples, mo Hem nao i stap jajem yumi—i no folem se bodi blong yumi i gud o no, be folem fasin blong yumi blong stap obei mo sapos yumi wantem folem rod ia we Hem i putum i stap.

Pikja

illustration of men loading a truck

Ol pikja oli kam long Julia Yelo

Taem mi gat 15 yia, mi kasem wan strong testemoni long saed blong gospel blong Jisas Kraes mo mi hapi tumas blong joenem Jos. Long tetaem ia, mi bin stap wok blong help blong sapotem famle blong mi. I no longtaem afta we mi bin baptaes, mi lusum wok blong mi.

Mi nid blong faenem wan niu wok from se famle blong mi i stap dipen long mi, be evri wok we mi askem, i nidim se mi mas wok long ol Sandei. Mi no akseptem fulap wok from se mi bin save se mi nid blong stap long jos long Sandei (luk long D&C 59:9–10).

Afta tu manis we mi lukaotem wok, mi stil no faenem wan wok yet. Mama blong mi i no wan memba blong Jos, mo nomata hem i no biliv long God, hem i kros tumas we mi no stap akseptem ol wok ia.

Wan naet, hem i lukluk mi wetem wota long ae mo askem: “?From wanem God i letem hemia i hapen long yumi taem yumi stap fetful nomo blong mekem wanem we hem i raet?”

Mi ansa: “Mama, mi no save from wanem samting i stap hapen long yumi, be mi save se mi stap mekem raet samting, mo mi save se God bae i blesem yumi from.”

Long nekis moning, wan i glad blong givim wan bigfala mane long mi blong spendem tu dei blong muvum sam hevi kago i aot long wan haos i go long wan nara haos. Wok ia i wan strong wok, be taem mi kasem mane, mi go stret long haos mo talem wan prea blong tangkyu. I no longtaem afta, mi faenem wan gudfala wok we mi no nid blong wok long Sandei, mo stat long tetaem ia, mi nomo stap we mi nomo gat wok.

Mi mi glad se mi jusum blong kipim Sabat dei i tabu. I gat fulap jalenj long laef, be mi save se sapos yumi traehad blong stap strong nomata ol jalenj we oli kam, bae Lod i blesem yumi.