Elder Von G. Keetch

Ang panghitabo nga nakadala og dakong kausaban sa kinabuhi ni Elder Von G. Keetch miabut samtang siya nagkompleto og judicial clerkship uban ni Chief Justice Warren E. Burger ug Justice Antonin Scalia sa United States Supreme Court ug nangandam nga motrabaho isip full-time nga abogado.

Siya mahimo ra unta nga motrabaho sa bisan asa nga siyudad sa Estados Unidos ngadto sa dagkong mga law firm. Apan, siya ug ang iyang asawa, si Bernice Pymm Keetch, nag-ampo sa inspirasyon aron masayud unsay angay nilang buhaton. Human sa panahon sa pagsiksik, ang magtiayon mibalik sa Siyudad sa Salt Lake, Utah, diin siya nagtrabaho sa law firm ni Kirton McConkie.

Niining higayona, si Elder Keetch naghunahuna nga iyang gisakripisyo ang iyang abilidad sa pagtrabaho sa bag-ong mga kaso nga legal aron maduol sa iyang pamilya. Apan, isip chief outside legal counsel sa Simbahan, si Elder Keetch midebate sa mga isyu sa konstitusyon ug sa mga precedent-setting case bahin sa kagawasan sa relihiyon. Siya mirepresentar hapit sa tanang dagkong denominasyon sa nasud. “Ganahan kaayo ko nga makatrabaho niining talagsaong mga kliyente ug motrabaho niining dagko nga mga isyu,” miingon siya.

Natawo niadtong Marso 17, 1960, sa Provo, Utah, ngadto kang Gary ug Deanne Keetch, si Elder Keetch mao ang kinamagulangan sa upat ka anak. Ang iyang pamilya nagpuyo sa Orem, Utah, sa wala pa mobalhin ngadto sa Pleasant Grove, Utah—diin siya ug iyang umaabut nga asawa dungan nga nagserbisyo sa ilang high school seminary council.

Si Elder Keetch nagserbisyo sa Germany Dusseldorf Mission ug nahigugma pag-ayo sa mga German. Sa iyang pag-uli gikan sa mission field, iyang giminyoan si Bernice Pymm sa Salt Lake Temple niadtong Nobyembre 21, 1981; sila adunay unom ka anak. Si Elder Keetch migrawar sa Brigham Young University niadtong 1984 uban sa degree sa political science ug nakaangkon og degree sa abogasiya gikan sa unibersidad niadtong 1987.

Sa daghang katuigan, si Elder Keetch, kinsa gipaluyohan niadtong Abril 4, 2015, sa Unang Korum sa Seventy, nakaserbisyo sa bishopric, sa high council, presidente sa stake, ug Area Seventy.