Stephen W. Owen

Sa dihang si Stephen W. Owen 14 anyos pa, ang iyang silingan misuhol kaniya sa pagputol sa mga sagbut sa iyang lapad kaayo nga nataran ug sa pag-ibot sa mga sagbut sa iyang tanaman kada semana. “Milungtad og tulo ka adlaw para nako sa pag-mower nianang lawn,” miingon nga nagpahiyom si Brother Owen, kinsa gipaluyohan niadtong Abril 4, 2015, isip kinatibuk-ang presidente sa Young Men.

Sa dihang nahuman na ang batan-ong Stephen, ang iyang maalamong employer mihangyo kaniya nga kuyugan siya nga maglakaw sa tanaman aron ipakita ang usa ka sagbut o duha nga wala maibut.

“Iya ko nga giingnan nga kinahanglang ibton nako ang tanang sagbut,” miingon siya. “Mao kadto ang akong unang trabaho ug kini nakatabang nako nga makasabut unsay kahulugan nga mahimong responsable sa trabaho.”

Si Brother Owen nakakat-on og mga leksyon nianang tuiga nga sobra pa sa pag-atiman sa nataran ug tanaman. Usa niini, iyang nadiskobre nga ang katagbawan makaplagan sa pagkugi og maayo sa hustong paagi. Iya usab nga nakat-unan ang bili sa mga mentor.

Ang silingan naglaum sa unsay pinakamaayo para kang Stephen. “Sama ra nga siya nag-ingon kanako, ‘Nasayud ko kon unsa ka sa umaabut, ug gusto ko nga motabang nimo.’”

Ang matag batan-ong lalaki sa Simbahan, siya midugang, nagkinahanglan og mga mentor aron pagtabang kaniya nga mahimong pinakamaayong tighupot sa priesthood. “Dako kaayo ang akong pagbati sa mga batan-on,” miingon siya. “Gihigugma nako sila ug nasayud ko nga kini ang kritikal nga panahon nga mahimo nilang sundanan sa ilang tibuok kinabuhi.”

Si Brother Owen nagserbisyo sa Texas San Antonio Mission ug sa wala madugay miserbisyo isip Scoutmaster, presidente sa Young Men sa ward, bishop, high councilor, ug presidente sa stake.

Ang lumad nga taga-Holladay, Utah, nagdumala usab sa California Arcadia Mission gikan 2005 hangtud 2008, diin siya miserbisyo uban sa iyang asawa, si Jane Stringham Owen. Naminyo sila niadtong Disyembre 28, 1979, sa Provo Utah Temple. Sila adunay lima ka mga anak.

Siya natawo niadtong Marso 22, 1958, sa Siyudad sa Salt Lake, Utah, ngadto kang Gordon ug Carolyn Owen. Siya migradwar sa University of Utah nga may finance degree ug mao ang presidente sa Great Harvest Bread Company sa Provo, Utah.