ANGA REIREI N ANA KAWAI TE TIA KAMAIU
“Nooria Ami Ataei”: Reiakinna n Reireiniia Ataei
“Ao e anai aia ataei ake a uarereke, temanna imwiin temanna, ao e kakabwaiaiia, ao e tataro nakon te Tama i bukiia. “Ao e taetae nakoia aomata ake a uanao, ma n taku nakoia: Nooria ami ataei” (3 Nibwaai 17:21, 23).
Ngkana te karo ngkoe ke n tia ni weteaki bwa ko na reireiniia ataei, ko a tia n anganaki te bwaintangira ae korakora. E reirei Unimwaane M. Russell Ballard man te Kooram n Abotoro n te Tengaun ma Uoman, “[Ngkami] ake e a tia n rineiia te Atua bwa kam na mwaneiia ataei ma te tangira ao te onimaki ae korakora ao ataakiia bwa antai ngaiia.”1
Ataei a na anganiko te kimwareirei ao ni karikiko bwa te katooto. Ngkai ko a noora aia kakaonimaki, aia tangira, onimaki, ao aia kantaninga ataei, ko na uakaan riki ma te Uea ao ni mataata riki n Ana tua n “riki bwa ataei aika a uarereke” (Mataio 18:3).
Aikai waniua bwaai aika a na uringaki ibukiia ataei ngkai ko kataia n reireiniia n aron are e karaoia te Tia Kamaiu.
1. Iai aia kakoaua ataei. A kakai tauraoi nakon te koaua. Reireiniia tua aika a eti ma ni beebete ao ni mataata, ma te taetae ao katooto ake a kona n ota iai.
2. Ataei a kona ni kinaa uaan te Tamnei. Reireiniia bwa namakinan te rau, te tangira, ao te kimwareirei are a karekea ngkana a taetae ke n anenea taekan Iesu Kristo ao Ana euangkerio mairoun te Tamnei ae Raoiroi. Buokiia bwa a na ataia bwa namakin aikai bon mwakoron te kakoaua.
3. Ataei a atai iango aika a koaua. Kabwarabwara aika a rang kaangaanga a na mangaongao iai. Ngkana ko reirei, kaeti ma bwaai aika a kinaaki ao waaki n takakaro: te mweenga, utu, ao te aonaaba are e katobibiia.
4. Ataei a ingainga ni kan reiakinaki. A kukurei n reiakinaki rinanon taneiai aika a kakaokoro ao namakin aika a mwaiti. A kaekaeka raoi ai moararariki nakon bwaai n ibuobuoki aika a nooraki ao iriiriia n taian reirei. A kariaia bwa a na mwamwaingiing, n neweaba, ao ni katai bwaai aika a boou.
5. Ataei a ingainga n ibuokanbwai ao n ibuobuoki. Iai irouia bwaai aika a kona n reireiniia iai tabeman ao ngkoe. Kaoiia bwa a na tibwai bwaai ake a reiakin. Anganiia aia tai ni wareki booki aika a tabu, n taui tamnei, ni kaekai titiraki, ke ni koroboki iaon te burakibooti.
6. Ataei a tatangiriia tabeman ao a kan tatangiraki. Tarai taai ni kaunga te akoi ao katei n tatangira are a kaoti nakoia. Kamatoaa onimakinaia man kaotiotan am tangira ao am kakaitau ao man ongoongoram nakon bwaai ake a taekin.
7. Ataei a iriiri am katooto. Ko reirei n taainako, e ngae ngke ko aki ataia. Ataei a na ataa aron maiuakinan taian reirei ake ko reirei iaona. Am katooto ae raoiroi e kona n iai mwiina iaon aia kakoaua ae rikirake.
8. Ataei aika a uarereke e karako aia kakauongo n aron ae a taneiai iai. Anuaia ni bakaea te aki ongora nanona a kua ke a baki, are a bon aki ataa te bwai are ko taekinna, are a tanigiria ni kakamwakuri, ke a botu. A kukurei n reiakinaki rinanon te bwai ae kaokiokaki, ae a kakaokoro, karaki aika a beebete, anene, ao waaki ni kakukurei. Kaungaiia bwa a na iriiri n taian reirei.