Karinean te Atua man Karinean Ara Berita Aika Tabu
Iroun Unimwaane Joseph W. Sitati
Man te Itingaun
Te kabanea ni kakawaki ni kakabwaia n ara onimaki iroun te Atua a kuneaki ni Karineakina man kawakinan ara berita aika tabu.
N 1985, Titia Sitati ao Ngai ti kaitibo ma te mwane ae arana Roger Howard i Nairobi, Kenya. Ngaia ao buuna, Eileen, a mwakuri ni katabeaia taanga tiinia mitinare. A kaoiira ni iira te taromauri ae uarereke are karaoki ni mweengaia. Bon te moan tai are ti iira te botakin n taromauri ake iai kain te aro n ana Ekaretia Iesu Kristo ibukia Aomata aika Itiaki ni Boong aika Kaitira. Ti namakina te Tamnei ni moan ara taromauri, ao imwina anne ti iriira te taromauri ni katoa Taabati.
Tabeua namakaina imwiin, Roger e bwabetitoira, ni ikotaki ma natira te mwane ae ruaiwa ana ririki. Imwiin anne, Roger ao Eileen a okira mwengaia n tokin aia mition. Ti teimatoa n rereitaki ma ngaiia ni katoa tabeua te ririki.
Ni moan 2010, Titita Sitati ao Ngai ti manga noora riki Roger. N te tai anne e a roko n ana ririki ae 90 te ririki. Mwamwaningana ma ana ririki ae e a kara ao aki taun marurungina, e raraa n tinebu iaon ana bwai n nakonako. Ngke ti kaitibo ni itaramata ibukin te moan tai ni manin mwaitin te ririki, ti namakina te reitaki n riaon kukureira. Ti korakai n tang ngke ti irabwati ni kukurei. Ti namakina te kakaitau ae korakora n tatabemaniira nako ao ibukin tamaroan bwaintangira n te euangkerio. Ti reitaki n aroia rao bwa kain te aba n abanuean te Atua.
Ngke I karekea te kukurei n tai anne, koroboki aika tabu a roko n au iango: “Uringa kakawakin te tamnei e korakora imatan te Atua; … .
“Ao ngkana ngaia bwa ko riai n mwakuri ni bongin maiu n tatakarua te rairannao nakoia aomata aikai, ao uotiia, kamaeua temanna te tamnei nakoiu, ai batira korakoran kukureim ma ngaia n abanuean Tamau!” (D&C 18:10, 15).
Tabeua korakoran ana kakabwaia te Atua a beritanaki nakoia koraki ake a uotiia tamnei nakon Abanueana. Te Tia Kamaiu e kamatoa: “Kam aki rineai, ma I rineingkami, ao I motiki bukimi, bwa kam na nako ni kariki uaa, ao ba a na aki mauna uaami: bwa E na anganingkami te Tama ane kam butia n arau, e na anganiko” (Ioane 15:16).
Roger e motirawa imwina n te ririki anne. I karekea te namakin ae mataata bwa reke irouna ana rau te Atua. E karekea rotaakin maiura man tibwauaan te euangkerio. Ana banna ni katooto n ana mwakuri ni anganano nakoia raraona mwaane, ni ikotaki ma korakoran mwaitiia mitinare ataei ao mitinare kaara ni mwakuri n te Ekaretia, ni kaotanako te kawai teuana ni karinea te Atua.
Ara Berita aika tabu n Reitaki ma te Atua
Kakaitau nakoia kain te aro n ana Ekaretia Iesu Kristo ae kaokaki, ngaira n tatabemaniira nako iai kabaeara boni ngaira ma Tamara are i Karawa rinanon berita aika tabu. Tatabeua berita aika a tabu a bon kamatoaki n te otenanti, n aron kukureira n kariaia ao nanora ni kawakina te berita. Iesu Kristo, n rinanon Ana mwakuri ni Kamaiu, e anganiira ni kakoroa katabeara n tatabeua berita aika tabu n aron kamwakuran ara onimaki Nakoina.
Ti karinea Tamara are i Karawa ngkana ti kamatoai kaniiakira ma Ngaia man karaoan ao kawakinan ni kabane berita aika tabu ao otenanti. E kakabwaiaia kora ake a kawakina aia berita aika tabu ma Tamneina ni kawakiniia ao ni kakorakoraiia. Akana imwiina a moan berita aika tabu aika kakawaki are ti kona n kateia ma Tamara i Karawa.
Berita aika Tabu n te Bwabetito
Te bwabetito e uotiira nakon te moan berita ae tabu ni reitiira ma te Atua. Ti kororaoi ibukin berita aika tabu ngkana ti “nanorinano [ngaira] imatan te Atua, … nakomai ngkami ake a uruaki nanomi ao rawawata tamneimi, ao kakoaua imatan te ekaretia bwa [ti] karekea te rairannano ni koaua ni kabane [ara] bure, … ao kaoti raoi man [ara] mwakuri bwa [ti] karekea Tamnein Kristo nakon kabwaraan [ara] bure” (D&C 20:37).
Ngkana ti kaotia man ara mwakuri are ti karaoi “katoka [iaora] aran Iesu Kristo, n tia ni kamatoa ni beku ibukina ni karoakoa te tokin” (D&C 20:37), “uota rawawataia tabeman, bwa aonga ni bebete; … taang ma ake a tang; … ao ni karaua nanoia ake a kainnanoa karauan nanoia, ao n riki bwa taan kakoaua ibukin te Atua n taainako ao ni bwaai nako, n taabo nako ake [ti] nako iai, ni karokoa matemi” (Motiaea 18:8–9), ti kawakin berita aika tabu.
Ni kaboana, E anganiira te Atua ma ana bwaintangira te Tamnei ae Raoiroi, n aron ti karekea n aki toki raoraonakira n te Tamnei ae Raoiroi, are e anga kawakinara ao kawaira n ara waaki, kairara nakon te maiu ae akea tokina (traa Motiaea 18:9–10).
I namakina te nano ni kukurei ae korakora ao riki ni kaonaki ma te Tamnei imwin au bwabetito, are I reitinako n namakina te taneiai riki ni kaan ma te Atua.
Te Berita ao Berita aika Tabu n te Nakoanibonga
Aomata ake a kawakina te berita ni bwabetito e tauraoi n rin n te berita ao te berita aika tabu n te nakoanibonga. Ti karekea rinanon te ontenanti ni katoka bwai. Te berita n te nakoanibonga bon te berita ni mwakuri ibukin kamaiuaia natina te Atua. Ti karinea te Atua ngkana ti kaotia man weteara (taraa D&C 84:33) ao “beku ibukina ni kabne [ma] nanora, konaa, iango ao korakorara” (D&C 4:2) ao ma “onimaki, kantaninga, kororaoin te tangira ao tangira, ma temata teuana nakon mimitongin te Atua” (D&C 4:5).
Ana kakabwaia te Uea are e roko nakoia nakoanibonga ake a kakaonimaki ni botaki n tabu “mairoun te Tamnei nakon kabouan rabwataia” (D&C 84:33). A riki bwa taan taua te kakabwaia are mairoun Mote ao Aberaam (taraa D&C 84:34). Burabeti aika maiu ao abotoro bon banna ni katooto nakoia koraki ake a kaotaa aia nakoanibonga. Maeuiia bon te kakoaua are te Uea e karineia.
Otenanti n te Tembora ao Berita aika tabu
Mwaane ake a kororaoi n taua te nakoanibonga ae rietaata ao aine ake a kororaoi ni kona ni karekea otenanti aika tabu ao ni karaoa berita aika tabu n tembora. N rinanon otenanti n te tembora ao berita aika tabu, ti reiakinna n ata bonganan te maiu aei ao n riki ni katauraoi ibukin te maiu ae akea tokina. Ti karekea te ontenanti ao ni kona karaoi berita aika tabu n te mare ao te kababae ma ara utu ae akea tokina. Ti tauraoi n anga maiura nakon te Atua ao nakon te mwakuri ni kamaiu ibukiia Natina ni kabane Kakaonimaki ni kawakin berita aika tabu aikai ti tau ni karekea ana kairi te tamnei ao te mwaaka ni konai kataakira n te maiu ae mamate ao ni karekea te tabekakirake, te kabanea ni korakora ni kakabwaia are e na anganiia natina te Atua (taraa D&C 14:7). Tabekakirake, ke te maiu ae akea tokina, bon nakoraoi kukurein maiun te utu ni maiun Tamara i Karawa.
Te Toa
Te Kabanea ni Kakannato Mai Buakoia, by Del Parson
Ibukiia kain te Ekaretia, kanakin te toa ni kororaoi ni katoa bongin te Taabati koraki e kakawaki. Man te ontenanti aei, ti kamatoa reitinakora ni kukurei ni katoka iaora aran Iesu Kristo ao ni kaboua arora ni kawakini ni kabane berita aika tabu ake ti karaoi. Ti kainanoa mwaakan ana Mwakuri ni Kamaiu Iesu Kristo ni buokiira n teimatoa ni karokoa te toki n te etieti. Ngkana ti karaoi, ti tau ibukin te kakabwaia ni kabane n te berita ae tabu ake ti karaoi.
Tangiran te Etieti
Uruakakin berita aika tabu e urua nanon te Atua ao anga te berita ni kakabwaia ae akea mwina (taraa D&C 82:10).
N te 1 Tamuera 2:12–17, 22–34, ti reiakina te buakaka ake a karaoi natin Eri mwaane are te ibonga. A anaa rakaia man nakoan tamaia n urua te berita ae tabu n te nakoanibonga. A ukora kakoroan tangiran te wene ni bure ma aine ake taan nebonebo ao ngke a anai iriko i bon ibukiia are aia bwai n angakarea natin Iteraera. Te Uea e kanakoa te moti ae matoatoa ibukiia natin Eri mwaane ao Eri naba ibukin aki boakiia natina.
Aron tangiran te rabwata e kona n tokanikai ni kawakinan are berita aika tabu ma te Atua, n aron kaotakina iroun Iotebwa are i Aikubita ngke e imanonoaki iroun te tia kan wenenibure aki kakoaua (tara Karikani Ba’i 39:9, 12). Te Atua e karinea Iotebwa ao ni buokiia n tokanikai iaon kaitaraan babairen te buakaka nakoina. E tei n rikirake ni kauoman ni moa ni kakannato i Aikubita ao te bwai ni mwakuri iroun te Atua ibukin kamaiuakiia tibun Iteraera (taraa Karibani Ba’i 45:7–8).
Ngkana ti tokanikai iaon te kaririaki, tangiran kaokan reitakira ma Tamara are i Karawa e na kairiira nakon te rairannano ni koaua. Ana Mwakuri ni Kamaiu Iesu Kristo ngkanne e na buokiira n riki ni manga kororaoi riki.
Ririmwia tenaan Burabeti
Ngke e katea Ana Ekaretia Kristo, E rineia abotoro, burabeti, tia tataekina te euangkerio, bwatita, ao taan reirei “ibukin kakoauan rabwatan Kristo:
“Ti roko ni kabane inanon te reitaki n te onimaki, ao ataakin Natin te Atua, ibukin karaoiroaia ake a itiaki nakoni mwakurian nakoaia, nakon katean rabwatan Kristo” (I-Ebeto 4:12–13).
Ara burabeti aika maiu ao abotoro a reirei bwa “kukurein maiun te utu e na bobonga man te korakora man karekean ana reirei te Uea Iesu Kristo. Tokanikain maare ao utu a kateaki ao kamatoaki iaon reirein te onimaki, tataro, rairannano, kabwarabure, karinerine, tangira, nanoanga, beku, ao ni kabane waaki ni katabetabe aika karaoaki” (“Te Utu: Te Katanoata Nakon te Aonaaba,” Riaona, Nobembwa 2010, 129).
Mweengara ao ara utu a karekei aan kateitei aika matoa ni irekereke ma te Atua ni waaki iaon berita aika tabu. Touan mwin aia reirei ara burabeti aika maiu e na buokiira ni kamatoatoa te utu, anganiira te mwaaka ni kawakin ara berita aika tabu, ao n taurabwai korakoran kakabwaiaan ara onimaki.