Reirei bwa Ko na Riki bwa te Ota nakon te Aonaaba

Tamnei

missionary and candle

I bungiaki n te Dominican Republic ao I ikawairake inanon te Ekaretia. I ikawairake ibuakoia taan kairiiri aika korakora ka e a kataia ni buokai n toua te kawai ae eti. I mii bwa I karaoa au mition ao I buokiia aomata.

Ibukina bwa tamau a mwaing nakon te United States bwa a na kataia ni kakaea te maiu ae tamaroa riki ibukira, tinau e kaikawaia mwaneu ao ngai n tii ngaia. N tabetai I namakina te maroa, ma I bon aki kona n taekinna ibukina bwa I aki kona n taekina au kanganga inanon maiu ma au mataniwi n te Ekaretia.

Ngke ti mwaing nakon te United States, a waaki kataakiu aika korakora. Ti iriira te mwaanga ae uarereke ao iai au mataniwi aika korakora ake a tangira ni buokai, ma raraou n te reirei a kataia ni katikai nako man kawain te euangkerio. Ma e ngae n anne, I a taetae nakon tinau n aro aika aki riai ao n angiin te tai I aki ongora n ana reirei.

I nanako n taromauri ni katoa Tabati, ma bon akea nanou ni kan nako, ao I aki ataia ngkana I kan nako ni mitinare.

N te moaningabong teuana, I kauka Ana Boki Moomon, ao ea bon uki naba nakon te iteraniba are e mena iai au kibu ae I tatangiria, 3 Nibwaai 12:14–16:

“E koaua, e koaua ae tuangkami, I rinei ngkami bwa ootaia te botanaomata aio. Te kaawa ae bubura ae kateaki iaon te tabuki e bon aki kona n raba.

“Nooria, a aki kaura te taura te bae aomata ma ni kakia iaan te bwaketi? Tiaki, ma a katoka i aoni nnena, ao e anga ootana nakoia ake a mena n te bata;

“Ngaia are kaotai ami taura imataia te botanaomata aio, bwa a na noori ami mwakuri aika a raraoi ma ni karaoiroa Tamami are i karawa iai.”

E anganai te kimwareirei ae bati ni wareka aio bukina bwa e buokai ni kauringai te bwai are I reiakinna n te tieminari ao tamaroan ana babaire Tamara. Ngaia are I a baireia bwa N na riki bwa te ota nakon te aonaaba.

I kaoiia uoman ai tariu nakon te Ekaretia. Temanna e aki bati ni kakaonimaki, ao e aki roroko. Are temanna bon tiaki kain te Ekaretia, ao I a kona ni bwabetioia.

Teuana te ririki imwiina e a roko te wewete nakoiu bwa N na mwakuri i California, USA. Ngke I mwakuri, I nooria ae akea te nanououa bwa bon aio ana euangkerio ni koaua Iesu Kristo. Ngke I buokiia aomata, au koaua e a ririkirake riki, ao ni katoa tai are I wareki koroboki aika a tabu, I aki toki n taekina te kibu are n 3 Nibwaai ni matenikuna n riki bwa te ota nakon te aonaaba.