Iango Ibukin Bootakin te Utu n te Tairiki
Rongorongo aikai iai inanona taekan ao waaki ni kakukurei ake a kona ni kabonganaaki ibukin bootakin te utu n te tairiki. Aikai uoua katooto.
“N aron te Aine ae Mate Buna mai Tarebata: Te Kakai n te Angabwai n Aki Mamatam,” iteraniba 24: Iangoia ni wareka te rongorongo aei ni bwanin n aron te utu ao imwiina kamatebwaia rongorongon te aine mai Tarebata ae mate buna n 1 Uea 17 Ko kona ngkanne ni kaekai titiraki akana imwiina: E kanga te aki mamatam ni kakabwaiaira n tatabemaniira nako ao n aron te utu? Antai ae e na kakabwaiaaki man ara angabwai n aki mamatam? Baikara kakabwaia ake ti na noori inanon mweengara man ara angabwai riki n aki mamatam? Ko kona ni maroroakina te bwai ae kona ni karaoaki n te angabwai riki n aki mamatam ke kawai tabeua ake ko kona ni buokiia ake a kainnano ao ake a rarikin n aron te utu.
“Ana Buraeki te Mataniwi ae Moronaai,” iteraniba 76: Ko kona ni wareka rongorongon te Mataniwi ae Moroni n te rongorongo aei n aron te utu. Ngkanne ko kona ni wareka Aramwa 46:11–14 ao ni maroroakina taekana bwa tera are e kaunga nanon te Mataniwi ae Moronaai ni kataniia ana aomata—“Atuara, ara aro, ma inaomatara, ara rau, buura, ma natira.” Bwaai akanne naba a teimatoa ni kakawaki ao n teimatoa ni buakanaki n te bong aei. Iangoia ni karaoa oin ana bwai am utu “te buraeki n inaomata” ao ni maroroakin kawai ni katan bwaai akana a korakora riki uaaia nakoim.