Ko Rabwa Ibukin Kaotan te Euangkerio Nakoiu
Scott Edgar, Utah, USA
Kamataata n te Korotamnei iroun Stan Fellow
Ni moan te ririki 1980, au utu a maeka i Mainikun Tiaman, ao ngaira kain te Kaiserslautern Germany Servicemen Titeiki. N te tai anne, ara mataniwi n te tabo e kaota kakawakin te mwakuri ni mitinare. Ti tuangaki bwa ibuakora inanon ara kamronron ni iraorao, te Uea e a tia ni katauraoia natina n tamnei aika E a tia n rineia aika a ukoukoura ana euangkerio Iesu Kristo.
Kainnabau, Jenny, ao ngai ti kakoaua anne bwa e bon koaua. Ara mataniwi a kaungaira n tatabemaniira bwa ti na kinaia raoraora aika tiaki kain te aro ae iai nanoia ni kan ongora te euangkerio. Ti na karinani araia 10 aomata ao imwiina tina aki mamatam ao n tataro ibukiia rao akanne ao ni baireia bwa antai ae ti na kawaria moa. Ti baireia bwa ti na kawariia uoman mwaane aika raora ni mwakuri n au aobiti. I taetae moa nakon te ataeinimwane ae tuai iein ae arana Chris, ma e aki bati ni kan ongora n te tai anne. Imwiina, ti baireia bwa N na kawara Bruce Hamby, te mwane ae tikiraoi ae akoi ma ana utu.
E ngae n anne, tabeua te bong n nako ao I kunea bwa e a nako nanou n taetae ma ngaia ibukin te euangkerio. N tokina, te bong teuana Jenny e tarebon nakon te aobiti ao e titiraki, Ko a tia n taetae ngkai ma Bruce?” I taku, “I tuai, ma N na waekoa ni karaoia.” E titiraki ngkana iai n te aobiti Bruce n te bong anne, ao ngai I taku bwa iai. N te tai anne e taku, “Scott, katuka te tareboon. N na tataninga ngkai ko taetae ma ngaia!”
I katuka te tareboon ao n nako n taetae ma Bruce ma te nakon nano n titiraki, “Bruce, ko ataia ae ngai kain Ana Ekaretia Iesu Kristo Ibukiia Aika Itiakai ni Boong aika Kaitira?” E taku eng, ao ngai I taku, “Iai nanom ni kan reiakina riki taekan te Ekaretia?” E kaeka, “Eng, I kan ongora.”
Tabeua te wiiki ake imwiina, Bruce, kainnabana, Ella, ao natiia te aine, Tanya, a roko n ara auti n te katairiki ao a kaitibo ma mitinare. A reiakinaki n taian reirei, a iriira n nako n taromauri, ao a butimwaea te euangkerio, ao a bwabetitoaki. Bon te bong ae mimitong tamaroana ao te bong ni kakukurei. Bruce e kakaitau bwa ti kaota te euangkerio nakoia ana utu. Aron naba Chris, te ataeinimwane n ara aobiti, e ira te bwabetito ao e rang kukurei. Imwiina, Bruce ao Ella a kawara Chris n tuangnga taekan te euangkerio. Man aia iraorao, Chris e a reireinaki irouia mitinare ao e a kaina naba te Ekaretia.