O Le Ala e Fatu ai se Fuafuaga Saogalemu Mai le Pule i le Ola

E mafai ona e fatuina se fuafuaga pe afai e i ai ni ou manatu e faatiga ia te oe lava ia, e mafai ona e amata i le laasaga 1 ma faaauau laasaga seia oo ina e lagona le saogalemu. O le taimi sili e fatuina ai lau fuafuaga o le taimi ae e te lei oo i se tulaga faigata. Tuu lau fuafuaga i se nofoaga e mafai ona e maua gofie ai, e pei o lau telefoni feaveai. E i ai uepisaite ma polokalama na e i ai fuafuaga aoga e faatumu, pe mafai ona e fatuina se fuafuaga faatasi ma le fesoasoani a se tagata faapitoa (tagai i le laasaga 6 i lalo) pe faia e oe lava ia e faaaoga ai nei fautuaga:

1. Iloa faailoga o lapataiga.

O a ituaiga o mafaufauga, lagona, ma amioga e tau atua ia te oe o se mea faigata e ono tupu mai? Tusi i latou i au lava upu. Mo se faataitaiga: “Pe a ou tolopoina au gaoioiga uma lava ma na o le manao lava e moe.” “Pe a ou faaauau pea ona maua mafaufauga o le avea ma se avega.” “Pe a ou lagona le faaosoina, e pei ua ou manaomia e fai se mea vave lava e faatea ai le tiga.” O le iloaina o nei faailoga lapatai o le a fesoasoani ia te oe e iloa ai e te manaomia e faagaoioi lau fuafuaga.

2. Taumafai e faatoafilemu ma faamafanafanaina oe lava ia.

Fatu se lisi o gaoioiga e faatoafilemu ai ma lagona ai le mafanafana e mafai ona e faia pe a oo mai na mafaufauga po o uunaiga e faaleaga oe lava. O faataitaiga e ono aofia ai le alu e savali, faia o se taelega mafanafana, faamalositino, tatalo, pe tusitusi i lau api o talaaga.

3. Mafaufau e uiga i au mafuaaga mo le ola.

I nisi taimi, e ono faatoilalo e le tiga lagona lelei. Fatu se lisi e faamanatu ai ia te oe lava tagata e te alofa i ai, mea e te manao e fai, ma faamanuiaga na e maua ai le lagona faafetai.

4. Aapa atu i isi ma fesili atu mo se fesoasoani.

Lisi ni nai tagata (faatasi ma numera o telefoni) e mafai ona e talanoa i ai ma e mafai ona naunau mai ma avanoa e fesoasoani ia te oe i le taimi o totoe o lau fuafuaga o le saogalemu i se taimi faigata. O nei tagata e mafai ona aofia ai uo, tagata o le uarota, ma tagata o le aiga.

5. Ia mautinoa o loo e i ai i se siosiomaga saogalemu.

O lenei mea e ono aofia ai le fesili i se tasi e fesoasoani e aveese ni aitema e foliga mai e mafai ona e faaaoga e faatiga ai oe lava, pe alu i se isi nofoaga seia faaleleia ou lagona. Fai se lisi o nofoaga faafiafia—e pei o paka, fale faamalositino, fale tifaga, ma isi—na e saogalemu ma le faatosina ese ai oe.

6. Afai o loo e lagonaina pea le fia faaleagaina o oe lava, faafesootai se tagata faapitoa atamai.

Lisi igoa, numera, ma nofoaga o falemai, potu o faalavelave faafuasei, ma laina telefoni o faafitauli. Suicide.org/international-suicide-hotlines.html o loo lisiina ai laina telefoni o faafitauli mo le tele o atunuu. Mo se faataitaiga, o le numera a le Iunaite Setete o le 1-800-273-TALK.

7. A uma ona fai uma nei mea, afai e te le o lagonaina pea le saogalemu, valaau auaunaga o faalavelave faafuasei pe alu i lau falemai e sili ona lata ane ma fesili atu mo se fesoasoani.