Leai se Tulaga Tutusa: O Le Ala ua Faatosina ai i Tatou e Ala o Faalalalauga
E alala le tusitala i Iuta, ISA.
O lo tatou tiutetauave e le o le aloese atoatoa mai ala o faasalalauga pe tau ina teena ala o faasalalauga leaga ae ia filifili ala o faasalalauga aoga ma faagaeetia.
I lo tatou lalolagi o ona po nei, ua faatumuina i le tekinolosi, ua osofaia i tatou e filifiliga: maimoa i le mea lenei, faitau i le mea lena, faalogo i le mea lenei. O lo tatou atunuu ua lolovaia i ala o faasalalauga ma mea faafiafia, ma o lo latou faatosinaga i o tatou talitonuga, mafaufauga, ma faatinoga e tau le iloa ae malosi. O mea tatou te faatagaina e faatumu ai o tatou mafaufau e iu ina fausiaina ai lo tatou tagata—tatou te avea ma tagata tatou te mafaufau i ai. O au suesuega mo le faauuga na ave ai au i se sailiiliga o le faatosinaga o ala o faasalalauga, ma o le faaiuga matautia na ou maua e faapea o le ala o faasalalauga tatou te filifili e faaaoga o le a iu lava ina aafia ai i tatou, pe lelei pe leaga.
Na faamatala mai e Elder David A. Bednar o le Korama a Aposetolo e Toasefululua: “O le tekinolosi lava ia e le lelei pe leaga faalenatura. Ae, o faamoemoega e ausia i le ma e ala mai le tekinolosi o ni faamaoniga faaiu o le lelei po o le leaga.”1 O la tatou tiute e le o le teena o le tekinolosi ae nai lo lena ia faaaoga i auala na o le a faaoaina ai o outou olaga.
E mafai ona tatou faaaoga le mana o ala o faasalalauga mo lo tatou manuia, ia faaleleia ai o tatou mafaufauga ma amioga e ala i le:
(1) Faailoaina o lo tatou aafiaga i le faatosinaga o ala o faasalalauga ma iloaina pe faapefea ona ia faatosinaina i tatou.
(2) Faailoaina ma le filifilia o filifiliga lelei.
E Faapefea e Ala o Faasalalauga ona Aafia ai i Tatou?
E leai se tasi e le aafia i le faatosinaga a ala o faasalalauga. Tatou te le mafai ona faamoemoe e fiafia i ala o faasalalauga ua mamanuina e aafia ai i tatou faalemafaufau ma faalelagona e aunoa ma lana faatosinaga e faatumauina i o tatou mafaufau ae ua leva ona uma le ata tifaga, tapunia le tusi, pe faamutaina le pese. O i latou e talitonu o ala o faasalalauga e le aafia ai i latou e masani lava o tagata e sili ona aafia aua latou te teena le faatosinaga ma o le mea lea e le o puipuia ai. E pei lava o se vai o le a faaauau pea ona sinasina e ala i se mama i se vaa, pe tatou te iloaina le mama pe leai, e faapena foi ala o faasalalauga o le a faaauau pea ona tosina ai o tatou mafaufauga pe tatou te taulimaina lona aafiaga pe leai.
O ala o faasalalauga faafiafia e mafai ona tosina ai o tatou mafaufauga ao tatou liliu atu i ai mo se toomaga mai faanoanoaga o o tatou olaga i aso taitasi. E masani ona tatou sailia faafiafiaga o se fofo le tumau mai faigata o aso uma, pe ala mai ata tifaga, tusi, televise, mekasini, po o musika. E ui tatou te liliu atu i ala o faasalalauga o faafiafiaga e malolo i ai, e le tatau ona tatou faamalolo o tatou tulaga faatonuina. O le taimi tonu lava lena e tatau ai ona tatou faaeteete i mea tatou te faatagaina i o tatou mafaufau.
Ina ia olioli atoatoa i le aafiaga o faafiafiaga, o nisi tagata e masani lava ona taliaina soo se savali e ofo mai e ala o faasalalauga ma faatagaina ai loa manatu fautuaina e faatosina ai o latou manatu. O e faamasinoina tifaga na faamatalaina le aoga o lenei manatu i tifaga:
“O le talitonu e moni le tifaga e faalagolago i le vave ma le faamaonia atoatoa o le faatulagaga o se siosiomaga fou pe ofoofogia, lagona o se isi taimi, po o ni tagata foliga fou, ina ia tatou maua le agaga atoatoa o le tifaga, lagona, ma le siosiomaga. Afai e talenia le fai tifaga i le fatuina o lenei foliga moni, tatou te malilie ma le loto i ai e faagalo lo tatou le talitonu, ma tatou tuuese lo tatou le talitonu ma a tatou faamasinoga sao i tua ao tatou ulu atu i le lalolagi faalemafaufau o le tifaga.”2
Afai tatou te tuuese lo tatou le talitonu, tatou te masani lava ona sili atu le taliaina o tulaga faatonuina, faamoemoega, ma talitonuga ua faaali mai e ala o faasalalauga. O lea la, e mafai e ala o faasalalauga ona faatosina faatogafiti o tatou mafaufauga. Ae o lenei faatosinaga o le pagatia o le taliaina o manatu atonu e le ogatasi ma mataupu faavae o le talalelei.
Na faamanatu mai e Elder Jeffrey R. Holland o le Korama a Aposetolo e Toasefululua le galuega a ala o faasalalauga o faafiafiaga ina ua ia saunoa mai, “Pe na outou iloaina o le uiga muamua faaLatina o le upu faafiafiaga o se ‘faatosinaga ese o le mafaufau ina ia faaseseina’?”3 E i ai taimi tatou te saili ai le faatosinaga ese. Tatou te liliu atu i ala o faasalalauga e faatosina ese ai i tatou mai faafitauli o lo tatou lava lalolagi moni, ma tatou te faalagolago i ai e faamalosia i tatou e talitonu i soo se mea na te ofoina mai. O le tele lava ona talitonuina o faasalalauga, pe moni pe sese, o le tele foi lea ona tatou olioli i ai.
Na saunoa mai le tagata faapitoa o mafaufau o le vafealoai o Karen E. Dill: “Pe a tatou gauai atoatoa atu i le lalolagi o mea e le moni, o o tatou uiga faaalia ma talitonuga e suia ina ia sili atu ona ogatasi ma manatu ma autu na e maua i totonu o le tala. Tatou te tuuese lo tatou le talitonu ma o le faia o lea mea, tatou te faatagaina ai i tatou lava e taliaina ma le le manatu i ai le polokalama o le talitonu o loo faatinoina i le lalolagi o mea e le moni ma le faatinoina o na talitonuga ma manatu. O le tele o taimi o mea tatou te vaaia i le lau e faaosofia ai se suiga po o se tali i fafo atu o lo tatou malamalama. O le ala lenei e fausia ai e le lalolagi o mea e le moni o tatou tulaga moni.”4
E ala i le faatagaina o ala o faasalalauga e faataunuu lona faamoemoega i le faafiafiaina o i tatou, e mafai ona tatou suia la tatou faagasologa masani o mafaufauga e faamasino ai i ni mafaufauga ua tuuina mai e ala o faasalalauga, lea e iu ina taitai atu i suiga i o tatou talitonuga ma amioga. Na saunoa mai Elder David B. Haight (1906–2004) o le Korama a Aposetolo e Toasefululua, “Ao taitai atu le mafaufauga i le faatinoga, o le faailoaina e mafai ona taitai atu i le faatinoina o le mea na faafaileleina i le mafaufau.”5
Ina ia tumau i le puleaina o le faatosinaga o ala o faasalalauga i o tatou olaga, e taua lo tatou filifili o ala o faasalalauga e faagaeetia ma iloaina lo tatou afaina i le faatosinaga a ala o faasalalauga. O ala o faasalalauga e aafia ai o tatou mafaufauga ma e mafai ai ona faatosinaina a tatou faatinoga. O le fautuaga a le Tupu o Peniamina aoga ia i tatou i aso nei: “Vaavaaia outou lava, ma o outou mafaufauga, ma a outou upu, ma a outou galuega” (Mosaea 4:30).
E Faapefea Ona Tatou Filifili Ala o Faasalalauga e Lelei?
E ala i le malamalama i le faatosinaga a ala o faasalalauga i o tatou olaga, e mafai ona tatou talanoaina ma le mautinoa filifiliga i o tatou luma. O a tatou filifiliga e faia se eseesega tele i le filifilia o lo tatou gauai atu i le Agaga ma le lelei o siomia ai i tatou. O filifiliga uma tatou te faia e aumaia latalata atili ai i tatou pe taumamao foi mai lo tatou Tama oi le Lagi.
O le tusitala Kerisiano o C. S. Lewis na tusia: “O a tatou taimi paganoa, e oo lava i a tatou taaloga, o se mataupu e matua manatu i ai ma le faaeteete. E leai se malae e tupu fua mai i le atulaulau: o sikuea inisi uma, o sekone uma, e aia i ai le Atua ae fia aia foi i ai Satani.”6
O lo tatou tiutetauave e le o le aloese mai ala o faasalalauga atoatoa po o le na o le teena lava o ala o faasalalauga leaga ae ia matuai siosiomia i tatou lava i ala o faasalalauga aoga ma faagaeetia. Ae sili ai, i le maoae o filifiliga ua ofo mai e ala o faasalalauga, e tele mea lelei ma aoga, lea o loo i ai tulaga faatauaina masani e lelei ma faaaloalogia. E le mafaitaulia tusi, ata tifaga, pese, ma le tele lava faatasi ma savali o le faamoemoe ma le fiafia, alofa ma le agalelei, olioli ma le faamagalo atu.
Na saunoa mai Elder M. Russell Ballard o le Korama a Aposetolo e Toasefululua: “Talu ai ona o le ofoofogia o lona lautele, o ala o faasalalauga i aso nei o loo aumaia ai ni manatu se tele ma le maamaai. O le itu faafeagai mai ona aafiaga faatafuna ma le faatosina, o loo tuuina mai ai foi i ala o faasalalauga ia mea e lelei ma aoga. … Ae o lo tatou luitau sili o loo i ai o le filifili lea ma le atamai ia mea tatou te faalogo ma matamata i ai.”7
Atonu o se ata i le televise po o se faasologa o tusi na tatou olioli ai i se taimi ua faasolo ina le lelei i le fua faaleamio lelei ae peitai e faigata ia i tatou ona tuuese, pe atonu foi o se ata tifaga fou e faapitoa lava le lauiloa pe faatosina ma tatou te le vaai i se afaina e matamata ai. Ae ui i lea, o le suia laitiiti lava o o tatou tulaga faatonuina e faigofie ai ona taliaina sina vaega laitiiti i lalo o le ala seia tatou tuu atu i tatou lava atoa i fiafiaga na e faigata ona tatou toe faasaoina ai i tatou lava. Ae o le faatuina o tulaga faatonuina mo i tatou lava e faatagaina na o ala o faasalalauga aoga i o tatou olaga, tatou te faatagaina ai i tatou lava ia taliaina atili le Agaga.
E mafai ona tatou mulimuli i le fautuaga le iu na tuuina mai e Susanna Wesley i le 1725 i lana tama tama o John, o le na faavaeina le Metotisi: “Pe o le a e faamasinoina le faafiafiaina faatulafono po o le le faatulafono, [o le mama o faatinoga leaga? Mafaufau i le taiala lenei.] Soo se mea lava e faavaivaia lau filifiliga, e faaleagaina le maaleale o lou mafaufau, faanenefuina lou lagonaina o le Atua, pe aveesea lou olioli i mea faaleagaga: e faapuupuu ai, soo se mea e faateleina le malosi ma le pule i lou tino nai lo lou mafaufau; o lena mea o le agasala ia te oe, po o le a lava le mama o lona foliga mai.”8
O Le Mana e Filifili Ai
E ala i le filifili e auai i ala o faasalalauga e faagaeetia i le amio mama, tatou te valaaulia le Agaga ma faatagaina i tatou lava ia faamalosia. O le talalelei a Iesu Keriso ua aoao mai ia i tatou faapea e tuuina mai ia i tatou le mana e faatino ai mo i tatou lava (tagai 2 Nifae 2:26). O le saili mo na mea e mama, matagofie, logoleleia pe tauleleia “Mataupu Faavae o le Faatuatua 1:13) ua tatalaina ai o tatou loto ma mafaufau i le taliaina o mafaufauga ma uiga faaalia na e taitaia i tatou i amioga amiotonu. I nei taumafaiga, o le a faamanuiaina i tatou i le puipuiga agai i faatosinaga a le fili (tagai Helamana 5:12).
O le aoga maoae o tekinolosi o ala o faasalalauga ua faamanuiaina ai i tatou e le Alii e oo mai faatasi ma se tiutetauave mo i tatou e filifili pe faapefea ona tatou faaaogaina tekinolosi. E ala mai suesuega ma aafiaga, ua ou vaaia le aoga o ala o faasalalauga, pe tatou te filifili e faailoaina pe leai. Ua i ai i o tatou luma filifiliga o amioga paaa po o le aoga ma faagaeetia. Ua ia i tatou le filifiliga—ae o le mea e sili atu le taua, ua ia i tatou le mana e filifili ai.