Filifili e Ola: Faatoilaloina o Mafaufauga e Pule i le Ola
O le malamalama o le Lalolagi na fesoasoani ia te au e sao mai le pogisa o lou faavauvau faavaitaimi.
Ata na pueina e © iStock/Thinkstock
O lau tauiviga ma mafaufauga e pule i le ola na amata i lou faatoa see atu i se aai malulu i Iceland, lea e oso ai faaletonu faalemafaufau faavaitaimi (FFF) matuia ona o le leai o se susulu o le la i le taimi o le taumalulu. Ao faateteleina naua lou tiga mo au e taulimaina ai, na ou mafaufau loa e pule i le ola.
I le tausaga muamua ou te lei taliaina faapea o au sa faavauvau. Sa ou fefe e tau i se tasi, e oo lava i lou toalua, e uiga i ou mafaufauga. E leai se tasi i lou aiga po o le lotu na iloaina na ou puapuagatia mai se mai e aafia ai le ola; na latou vaai ia te au o se tagata toaga i le Ekalesia ma se molimau malosi e leai ni luitau faigata. Na ou tatalo soo, ma aioi atu mo se toomaga, ma na faamalosia au e le Tama Faalelagi. Na sili atu lou faaeteete i au meaai, faamalositino soo, faagotoina au lava i tusitusiga paia, auauna atu i isi, ma tausia uma poloaiga. Ae na le lava lena.
Na fafati mai le faavauvau ia te au pei se galu maoae. O lea na ou tamoe ai e sili atu le saoasaoa ma tatalo atili, ae sa le mafai ona ou manumalo i taimi uma i le galu. Na ou taumafai e taofi lagona o le faavauvau, tatalo ia ou ola seia o mai lau fanau i le fale mai le aoga pe sei oo i le aiga o le aoauli. O nisi aso ou te ola mai lea minute i lea minute, e faaaoga ai sina naunautai itiiti e faatoilalo ai ou mafaufauga ma uunaiga.
Ou te manatua le lagonaina o le tiga matautia faalemafaufau i le taimi muamua na toeitiiti lava a ou pule ai i lou ola. Ou te lei fuafuaina pe mafaufau i luma—na le maua mo se taimi se malosiaga e mafaufau sao ai. Mulimuli ane na ou iloaina ai lou matuai latalata atu lava i le pule i lou lava ola. Na ou tau mafaufau po o le a le mea na sese ia te au. Na ou tau ia te au lava ia faapea sa le tatau ona i ai ni ou mafaufauga e pule i le ola, ma na ou faataga faapea e lei i ai lava na mafaufauga. Sa ou folafola ia te au lava o le a ou le toe maua lava ia mafaufauga.
Ae o mafaufauga e pule i le ola na faaauau pea ona oo mai i lou mafaufau i le taimi ou te lei faamoemoeina ai. O le faaosoosoga e faamuta lou tiga matautia na matuai malosi mai lava. Ae na ou manao ia faamaloloina. E ui ou te lei malamalama i le taimi lea faapea na ou puapuagatia mai se mai tuga (o se mai e faigata ma faafuasei), na ou iloa lava e mafai ona faamaloloina au. O lea na ou talosagaina ai se faamanuiaga faaleperisitua.
O lou toalua, ma le le iloaina o au tauiviga, na tau maia le tele o mea i le taimi o le faamanuiaga lena na tau mai ai ia te au na silafia e le Tama Faalelagi au. Na ia folafola mai ia te au o le a ou taulimaina ou luitau. O le faamalologa faafuasei e le o le fofo, ae na ou taliaina faapea o le a fesoasoani mai le Tama Faalelagi ia te au e manumalo i lau tauiviga.
Na oo mai le taumafanafana, tumu i le la susulu ma aso uumi. Sa le pogisa lava, e oo lava i le vaeluaga o le po. Na ou fiafia ma lagona lou toe foi i lou tagata masani. Ae ao vave lava ona pupuu aso ia Setema, na toe foi mai lou faavauvau ma o mafaufauga e pule i le ola na faatumulia lou mafaufau. Sa ou fefe. I le taimi muamua, na ou taumafai le mea na ou faia i le tausaga talu ai: tatalo atili, faamalositino atili, ma taumafai atili i mea uma. Ae o uunaiga e pule i le ola na faateteleina ma sili atu le tuga. Na ou tauivi mo le lua masina ma na iu ina ou iloaina o le a le mafai ona ou ola mai le isi taumalulu na o au lava. Na ou iloaina na faamanuiaina i matou e le Tama Faalelagi i vailaau fou ma fomai. Ina ia toe malosi, na ou manaomia ia naunau e talanoa atu e uiga i lou faavauvau ma asiasi atu i se fomai.
O le fesili atu mo se fesoasoani o le mea e sili le faigata faatoa ou faia. Na tau le mafai ona ou tautala i lou tagi ina ua ou tau atu i lou toalua e uiga i lou faavauvau ma na ou manaomia le fesoasoani. Sa le mafai ona ou tau atu leotele le upu pule i le ola. Na fai e lou toalua se taimi faatulagaina ma se fomai o le mafaufau mo au.
Na tusi mai e lou fomai ni vailaau, ia na fesoasoani ia te au e sao ai mai le taumalulu. E pei o le tele o tagata, na ou tauivi e sue le inumaga sao ma taulimaina aafiaga e tutupu mai ai. O lenei mea na aumaia le faavauvau faaopoopo i lau faaipoipoga ma lou aiga, ae na lagolagoina au e lou toalua ma lau fanau.
Ina ua oo mai le tautoulu, na faaleleia lou faavauvau, ma na le toe manaomia ai vailaau. Na matou see atu i se aai e susulu ai le la. Na ou manatu ua lelei mea uma ma na ou tuua lou mai faalemafaufau i tua. Ae na lei faamaloloina atoatoa au. O lagona o le nofosala na tutupu mai mo ou mafaufauga, lagona, ma uunaiga talu ai. Na ou le fiafia faapea na manatu lau fanau talavou na ou mafaufau e pule i le ola. Na ou lagona na ou faamaimauina le silia ma se tausaga o lou olaga.
Ma le isi, na ou fefe—ae maise lava ina ua toe oo mai aso pupuu o Setema. Na oo mai ni manatuaga ua tuanai malolosi lava ma na ou fefe o le a ou toe puapuaga foi i le faavauvau matautia. Ae na ou mafai ona vaaia le aao o le Alii i lou olaga ao taitaiina au i se fomai lelei ma amata ai togafitiga. Na ou iloaina na ou puapuagatia foi mai se faaletonu faalemafaufau mai se faalavelave (FFMF). Faatasi ai ma le taitaiga a lau fomai, na ou taulimaina ai le FFMF.
Ona ou oo lea i se vavega. I le maea ai o le tatalo malosi ma le sailiga e faaaoga le Togiola a le Faaola i lou olaga, na aveesea vave e le Alii ou lagona o le nofosala, manino, ma iloa gofie. O Lona siufofoga na faamatalaina faapea sa le manaomia lou tauaveina o le lagona nofosala ona o lou faavauvau e le o au na mafua ai. E tauaveina e Iesu Keriso lena avega mo au e ala i le mana o Lana Togiola. Na faatumuina au i le malamalama ma toe lagonaina le faamoemoe.
Ou te le iloa mafuaaga uma pe aisea na ou feagai ai ma luitau o le mai e lamatia ai le ola. E ui lava o loo ou tauaveina manatuaga uma, o tiga faalemafaufau ma faaletino e le o toe i ai. O aso uma ou te faafetai ai mo lou aiga, lou fomai, ma lou taimi iinei i le lalolagi. Ona o lou mai, na ou maua ai le malamalama ma le alofa mo isi. Na faateleina lou tulaga faalelagona ma faaleagaga ma na mauaina le malamalama faapea semanu ou te le aoaoina i se isi lava ala. Na ou oo i ni taimi taua tele faaleagaga faatasi ma lou Tama Faalelagi ma lou Faaola. O ou aafiaga na faamalosia ai au e talisapaia le olaga.