Sailiga o Etiene

Toe o ni nai vaiaso ae lei tuuvaa atu mo le misiona faafaifeautalai, na ou alu ai e asiasi i le aiga o se uo ua leva e le o se tagata o le Ekalesia. Na ou faamoemoe e nofo mo ni nai minute, ae ona o le mamafa o timuga, na umi atu ai ona ou nofo nai lo le faamoemoega na i ai. O lea na matou nonofo ai i lalo ma lau uo, ma lona tina, ma talanoa e uiga i le Ekalesia ma lau misiona o loo loma.

Na ou faamatalaina faapea atonu e tofia au e auauna atu i ni aai e pei o Rio de Janeiro, Belo Horizonte, po o Pasila.

Mo se mafuaaga, na filifili le tina o lau uo e tuu mai ia te au le tuatusi a lona uso e nofo i se taulaga e latalata i Rio de Janiero. Na ia fai mai e tatau ona ou alu e asiasi ia te ia pe afai e auina atu au iina.

Na ou alu atu mo lau misiona ia Iulai aso 7, 1982. Na ou auauna atu i le tele o aai eseese, e aofia ai se tasi e latalata i le nofoaga e nofo ai le uso o le tina o lau uo. Na ou mafaufau e asiasi ia te ia, ae o lona aiga e lei i ai i lau eria. Ou te lei tau atu i faifeautalai na tofia i lena eria e uiga ia te ia aua na ou faamoemoe pea o le a ou mafai ona alu au lava ia.

I lena taimi, na auauna atu faifeautalai mo le 18 masina. Na alu le taimi e aunoa ma lou vaai i le uso o le tina o lau uo ma lona aiga.

I ni tausaga mulimuli ane, ao auai i se gaoioiga a le uarota, na ou vaai ai i lau uo le lotu. Na ou iloaina na valaauliaina o ia e se tasi o ona tausoga, o se tina o le aiga na papatiso talu ai nei i le Ekalesia. Ona ou iloaina lea o Aunt Etiene faatoa see mai i la matou uarota mai le setete o Rio de Janeiro. Na vave ona ou fiafia i le uso o lona tina o Etiene, ma na ma fiafia e talanoa faatasi e uiga i o manatuaga o Rio de Janiero. I lou maasiasi, na ou iloaina o ia lena na ou manao e asiasi i ai i le taimi o lau misiona. Sa faatoa papatiso o ia, i le mavae ai o le maliu faafuasei o lana tane.

Ae faafetai ai, na ia faamagaloina au mo le le uunaia o isi faifeautalai e asiasi ia te ia. Ae ui i lea, na faanoanoa o ia i le taimi na ia le maua ai le olioli i faamanuiaga o le talalelei.

O faanoanoaga faapea e le gata e lagonaina e faifeautalai ae faapea foi i tatou uma lava pe afai tatou te le faalogo i uunaiga a le Agaga, pe o lona uiga o le valaaulia o uo e o mai i se gaoioiga a le Ekalesia po o le tuuina atu o se tagata i faifeautalai. Sei tatou o i le Alii ma fesili atu mo uunaiga. O le a Ia saunoa mai ia i tatou e ala mai i le leo, itiiti ma le filemu. O le a Ia tuuina mai ia i tatou le fesoasoani tatou te manaomia e fai ai le galuega faafaifeautalai ma le naunautaiga ma le alofa.