Vasega Suisui ma se Avanoa Lona Lua
E alala le tusitala i Salta, Atenitina.
Na ou misia le avanoa e faasoa atu ai le talalelei i lau faiaoga ta piano. Pe o le a ou mulimuli ma le faamaoni i le isi uunaiga?
Ina ua 18 ou tausaga, na siitia atu lo matou aiga mai Atenitina i saute i Atenitina i matu, lea na auauna atu ai lou tama o se peresitene o le misiona. O nai masina muamua na faigata ona faamasani ai lou aiga ma au. Na lei i ai ni a matou uo, o lea na matou amata ai ona vaavaai mo gaoioiga e auai ai. Na ou saini mo vasega ta piano.
O lou faiaoga ta piano, o Mabel, o le faiaoga sili lea ua ou maua. Na ou matuai fiafia i vasega, ma na amata ona ou vave lelei i lou mafaia ona tata. Ae ui i lea, o Mabel sa mai i le kanesa ma sa ia maua se taimi faigata. Na ia faaaluina le tele o taimi e asiasi ai i faamalologa, fomai, ma patele i nofoaga eseese. Na faataotolia o ia i le falemai mo ni nai tami, ae na toe manuia o ia ma toe foi mai e aoao ma le agaga lava lea e tasi ma le naunautaiga.
Mai lea aso i lea aso, vasega i lea vasega, na ou manao e faasoa atu ia te ia le faamoemoe i le fuafuaga a le Atua, le faamoemoe lena e tuu mai e Iesu Keriso faatasi ma Lona mana, ae ou te lei iloa pe faapefea.
Ina ua amata vasega ina ua uma aso malolo o le taumafanafana, na toe mai foi Mabel. Ina ua fai sina umi e lei faalogo ia te ia, na ou valaau atu ma tuua se savali ma fesili atu po o a mai o ia. O le aso na sosoo ai na tau mai ai e lana tama teine ia te au ua maliu Mabel. Na ou lagonaina se faanoanoaga maoae. Na ou iloa sa tatau ona ou faasoa atu le talalelei ia te ia ae na ou tuu ese lena taimi mo se taimi umi lava ma ua ou le maua ai le avanoa.
Na amata ona ou avea ni vasega suisui, ma sa i ai se isi ou faiaoga lelei tele. E talitonu o ia i le Atua ae auai i se lotu ese. I se tasi o vasega, na talanoaina ai le talalelei, ma ina ua ia fesili mai po o le a le lotu ou te auai, na ou tali atu o au o se tagata o Le Ekalesia a Iesu Keriso o le Au Paia o Aso e Gata Ai. Na ia foliga le mautonu i le igoa, ma na ou faamanino atu, “E iloa foi e tagata i matou o Mamona.” Na vave lava ona ia fiafia ma fai mai, “Ou te fiafia i Mamona!” ma se ataata i ona foliga.
Na ia faaauau, “E mafai ona ou iloa o oe o se Mamona,” ma na ia amata ona lisi mafuaaga pe aisea. Na ou fiafia na ia vaaia na ou tauivi e ola i le talalelei. Na ia fesili puupuu mai e uiga i le papatisoga i le Ekalesia. Ao ou faamatalaina atu, na vave ona ia fai mai, “E le mafai ona ou papatiso i lau lotu aua na ou ola ae i se lotu ese.” I le faalogo atu ia te ia o tau mai ia te au ona talitonuga, na ou aoaoina le tele o mea e uiga i mea e mafai ona ou faasoa atu ia te ia. Na ou lagonaina le lagona filemu ae mausali e tuu atu ia te ia se Tusi a Mamona, ma na ou iloaina o le Agaga o loo tautala mai ia te au.
Na ou aumaia se Tusi a Mamona, ma tusi i se fasi pepa ia te ia se tusi puupuu ae faamaoni faatasi ma lau numera telefoni i le isi itu, ina nei i ai ni ana fesili. Na ou tuuina le fasi pepa i totonu o le tusi, afifi, ma tuu i ai se lipine i luga. Na ou tuuina atu ia te ia i le isi vasega. Na matuai fiafia o ia e taliaina ma faafetai mai ia te au.
I le vaiaso atoa na ou mafaufau ai pe na faapei ona uiga faaalia i le tatalaina o le meaalofa—pe na ia fiafia i ai pe leai. O le isi vasega na ou tuai laitiiti ai ma na faateia i lona uiga faaalia ao ou ulu atu i le potu. Na ia opo atu au ma fai mai ma le malosi, “Na ou fiafia i ai, fiafia i ai, fiafia i ai! O le tusi na e aumai ia te au e matagofie, amata mai le faatomuaga ina ua ia talanoa mai e uiga i papatusi. E matua moni lava! E i ai ni mau matagofie. Na ou amata ona faitau, ma ua afa lau faitau. Ua le mafai ona ou taofia le faitauina!”
I le faalogo mai i le tele o le fiafia, na faliu mai i tua le vasega e vaai po o le a le mea ua tupu. O se tasi o au uo i le vasega, lea na ou talanoa i ai e uiga i le Tusi a Mamona, na fesili mai pe aumai e lenei tusi le filemu. Na tali atu lou faiaoga, “Na oo mai ai ia te au le manao e tagi, e le mai le faanoanoa ae mai le faamanuiaina.” Sa le mafai ona ia taofia le ataata ma opo pea au.
Sa ou lagona le fiafia tele. I le taimi lena, na ou malamalama ai e le mafai ona tatou faamasinoina pe o ai ua saunia e talia le afioga a le Atua. E le mafai ona tatou iloa pe faapefea ona tatou tatalaina le loto o se tagata. Afai e uunaia i tatou e le Atua e faasoa atu, e manaomia lo tatou faatinoina aua e sili atu Lona silafia nai lo i tatou.