O Leo o Le Au Paia o Aso e Gata Ai
O Lau Tagata Suesue e Le Vaaia
Na faamanuiaina au i ni matua ofoofogia. O lou tina o se tagata o le Ekalesia, ma e ui o lou tama e le auai, na ia lagolagoina i maua ia ma gaoioiga o le Ekalesia. Ao tuputupu ae, na ou tatalo i aso uma ina ia mafai ona auai lou tama i le Ekalesia.
Ina ua ou maua lou faamanuiaga faapeteriaka i le 16 tausaga, na folafola mai ia te au o le a avea au o se faatosinaga i le fesoasoani i lou tama ia auai i le Ekalesia. Na ou talanoa ia te ia e uiga i mea na ou aoaoina i le seminare. Na ou tau atu ia te ia e uiga i tusitusiga paia na e tau mai ai le taua o le papatiso ma faamauina e ulu atu ai i le malo o le Atua (tagai Ioane 3:5). Faatasi ma loimata, na ou tau atu ia te ia e uiga i faamanuiaga o le malumalu lena o le a mafai ai mo i matou ona faatasi e faavavau.
Sa ou auai i se aoga laitiiti i Arisona, ISA. Na i ai ni au uo lelei i le aoga maualuga e ui lava na o au le tagata o le Ekalesia i lau vasega. I le taimi lena, o Peresitene Tavita O. Makei (1873–1970) sa avea ma perofeta. Na masani ona matou faalogo i ana fautuaga mo “tagata uma o le Ekalesia [ia avea ma] faifetautalai” (tagai Aoaoga a Peresitene o le Ekalesia: Tavita O. Makei [2011], mataupu 6). I se tasi taumafanafana na ma valaaulia ai ma lou uso o Marilyn ni uo e fai ni lesona faafaifeautalai. Na latou faia ni lesona se lua ma na le toe fiafia loa. Na ma faanoanoa, ae na lei faauma ai la matou faauoga.
Na ou alu i le kolisi i le faaiuga o lena taumafanafana. I le taimi o le kuata o le tautoulu, na ou maua ai se tusi mai lou tama. Na ia tusi mai: “O se faamanuiaga silisili mo au le avea ma ulu o se aiga o ni teine ofoofogia. Ona o a oulua molimau malolosi uma o le talalelei ma fonotaga ma le fiafia i isi tagata talavou i le taumafanafana talu ai, na amata moni lava ona ou fiafia i le Ekalesia. Ao ou i ai i fafo o le fale ma valiina ao outou faia ma tamaiti na fonotaga i totonu, na faamaonia mai ia te au ua umi tele ona ou i ai i fafo ma vaavaai i totonu. Ou te faafetai i le Tama Faalelagi i le tele o taimi mo lo lua tina ma le mea moni faapea na ola ae o ia i le Ekalesia ma le ala na ia tausia ai oulua tamaitai.”
Na vave ona papatisoina lou tama, ma i se tausaga mulimuli ane na faamauina ai lo matou aiga mo le taimi nei ma le faavavau i le Malumalu o Mesa Arisona.
E ui lava na leai ni a ma uo na auai i le Ekalesia, o le tagata e sili ona taua i o matou olaga na auai. Tatou te le iloa le ala o le a faamanuiaina ai i tatou pe a tatou mulimuli i le fautuaga a le perofeta.