Paghimo sa Komperensya nga Kabahin sa Atong mga Kinabuhi

Pahina 86: Si Presidente Thomas S. Monson midapit kanato sa pagbasa sa Basahon ni Mormon matag adlaw, nagsaad, “Ang Espiritu Santo mopadayag sa kamatuoran niini nganha kaninyo.” Agig dugang sa inyong kaugalingon nga pagtuon, mahimo ninyong batasanon ang inadlaw nga pagtuon sa Basahon ni Mormon uban sa inyong pamilya. Mahimo ninyong himoan og drama o mga eksena aron sa pagtabang sa paghinumdom sa importanting mga bersikulo ug mga istorya. Adto sa friend.lds.org ug pangitaa ang 2016 nga Liahona magasin alang sa mga istorya, mga tsart sa pagbasa sa Basahon ni Mormon, ug dugang pa.

Pahina 117: Elder Gary E. Stevenson misulti kon sa unsang paagi ang iyang papa naminaw sa Espiritu Santo ug miluwas kaniya gikan sa usa ka bitin. Pangutan-a ang inyong mga ginikanan kon kamo aduna bay panaghisgutan sa pangutana, Sa unsang paagi ang Espiritu Santo motabang kaninyo? Ipakigbahin ang panahon nga ang Espiritu Santo mipasidan-an, mihupay, o mipamatuod kaninyo. Mahimo gani ninyo kini isulat ug makahimo og libro.

Pahina 87: Si Sister Joy D. Jones mitudlo nga makaandam kamo sa paghimo sa balaan nga mga pakigsaad unya pinaagi sa pagkat-on sa pagtuman sa saad sa karon. Paghimo og tumong ug mga saad sa pagsunod niini. Hangyoa ang usa ka kauban sa pagsusi nimo ug mosiguro nga imong tumanon ang imong saad.

Pahina 90: Si Elder Yoon Hwan Choi mihatag og tambag gikan sa iyang amahan: “Ayaw pagtan-aw sa palibut, kon dili hangad!” Usahay kita mabalda ug makalimot sa pag-focus sa Langitnong Amahan ug ni Jesukristo. Busa pahinumdumi ang imong kaugalingon sa paghangad! Mahimo kamong makataud og litrato ni Jesus sa inyong kwarto. Adto sa gawas ug tan-awa ang panganud. Paggahin og hilom nga panahon matag adlaw sa paghunahuna kabahin sa Langitnong Amahan ug ni Jesus ug mobati sa Espiritu.

Pahina 93 ug 117: Nakapangutana ba kamo sa inyong kaugalingon: Sa unsang paagi nako mabatunan kanunay ang Espiritu Santo uban kanako? Unsaon nako sa pag-ila ang Espiritu Santo? Sa unsa nga paagi makatabang ang Espiritu Santo kanako? Si Elder Ronald A. Rasband ug Gary E. Stevenson mitubag niini ug sa ubang daghang mga pangutana. “Kita adunay sagradong responsibilidad nga magkat-on sa pag-ila sa Iyang impluwensya diha sa atong kinabuhi ug molihok,” miingon si Elder Rasband. Sa unsang paagi ninyo matuman kana nga responsibilidad?

Pahina 33: Si Elder Ulisses Soares mikutlo sa kabahin sa tema sa Mutual nga mga kasulatan: “Mangayo siya uban sa pagtuo, sa walay pagduha-duha. Kay siya nga nagaduhaduha, sama sa balud sa dagat nga ginahandos ug ginakosokoso sa hangin” (Santiago 1:6). Unsaon ninyo sa paglikay sa pagduhaduha? Sugdi ang paglig-on sa inyong hugot nga pagtuo diha ni Jesukristo. Pagtuon pa og dugang mahitungod Kaniya. Hinumdumi ang mga panahon nga gibati ninyo ang Iyang gugma ug kalinaw.

Pahina 86 ug 9: si Presidente Thomas S. Monson midapit kanato, “Kon kamo wala magbasa sa Basahon ni Mormon kada adlaw, palihug himoa na.” Ug si Sister Carol F. McConckie nangutana: “Ato bang biyaan ang telepono, ang walay katapusang lista sa buhatunon, ug ang mga kabalaka nga mga kalibutanon? Ang pag-ampo, pagtuon, ug pagpaminaw sa pulong sa Dios makadapit sa Iyang gugma nga makapaayo ug makalimpyo sa atong mga kalag.” Pagplano og panahon matag adlaw sa pagbasa sa Basahon ni Mormon ug pagbutang og pahinumdom sa inyong planner o sa inyong cell phone.

Pahina 62: Unsa ang inyong mga tumong sa inyong kinabuhi? Mga tumong sa inyong trabaho, pamilya, ug gani sports ug lingaw-lingaw, apan “ang atong kinadak-an ug kinatas-an nga mga tumong kinahanglang mohaum sa mahangturong plano sa Langitnong Amahan,” mitudlo si Elder M. Russell Ballard. Kon sa unsang paagi nga ang inyong mga plano nahiangay sa plano sa Langitnong Amahan alang kaninyo? Sa unsang paagi kamo mas maka-focus sa tumong sa pagpuyo sa kahangturan uban sa Langitnong Amahan ug ni Jesukristo?

Pahina 39: Sayo niining tuiga, si Presidente Russell M. Nelson midapit sa mga young adult sa “pagpahinungod og porsyon sa ilang panahon matag semana sa pagtuon sa tanan sa gisulti ug gibuhat ni Jesus nga narekord diha sa [sumbanang mga basahon]” (“Mga Propeta, Pagpangulo, ug Balaan nga Balaod” [tibuok kalibutan nga debosyonal alang sa young adults, Ene. 8, 2017], broadcasts.lds.org). Iyang gisubli ang pagdapit sa kinatibuk-ang komperensya isip usa sa upat ka importanting mga elemento sa pagpaduol sa gahum sa Manluluwas sa atong kinabuhi. Tun-i ang pakigpulong ni Presidente Nelson aron makat-on kon sa unsang paagi kamo makagamit sa “gahum igo sa pag-atubang sa mga palas-anon, mga babag, ug mga tintasyon sa atong panahon.”

Mga pahina 100 ug 26: Gusto ba kamo og mapa sa dalan alang sa inyong kinabuhi? Mitudlo si Elder Dallin H. Oaks, “Tungod kay anaa kanato ang kamatuoran mahitungod sa Dios nga Kapangulohan ug sa atong relasyon Kanila, sa katuyoan sa kinabuhi, ug sa kinaiyahan sa mahangturon natong padulngan, kita adunay pinakatalagsaong giya ug kasiguroan sa atong panaw sa mortalidad.” Siya ug si Elder Weatherford T. Clayton mitudlo nga ang kahibalo sa plano sa kaluwasan makatabang sa atong mga hagit karon. Tun-i ang ilang mga mensahe ug pangutan-a ang Langitnong Amahan sa unsa nga paagi nga ang mahangturong kamatuoran makahatag og usa ka mapa sa dalan sa inyong kinabuhi.

Pahina 104: Ang kahadlok makapadasig, apan si Presidente Dieter F. Uchtdorf nagtudlo nga ang kahadlok “ dili gayud kini makausab nato nga mahimong mga tawo nga nagmahal sa matarung ug gustong mosunod sa Langitnong Amahan.” Sa unsang paagi nga ang tiunay nga gugma ni Kristo nga “ang balaanong gitakda nga tambal sa kahadlok?

Pahina 86: Samtang kita mainampuong magtuon ug mamalandong sa Basahon ni Mormon matag adlaw, si Presidente Thomas S. Monson miingon, “anaa kita sa posisyon nga makadungog sa tingog sa Espiritu, sa pagbatok sa tintasyon, sa pagbuntog sa pagduhaduha ug kahadlok, ug sa pagdawat sa tabang sa Langit sa atong mga kinabuhi.” Isip personal ug pamilya, paghimo og tumong sa pagbasa sa Basahon ni Mormon matag adlaw.

Pahina 39: Pag-apil sa mga hagit nga gihatag ni Presidente Russell M. Nelson ngadto sa mga young adult (tan-awa sa ibabaw sa “Alang sa Young Adult”). Sa unsang paagi kamo mopahiangay niini nga mga hagit sa inyong mga kaugalingon ug sa inyong pamilya? Ang paghisgot sa mga panalangin nga moabut gikan sa pagkat-on og dugang mahitungod sa Manluluwas.

Pahina 93 ug 117: Samtang kamo nagbasa sa mga pakigpulong ni Elder Ronald A. Rasband ug ni Elder Gary E. Stevenson, pangita og mga paagi sa kanunay makabaton sa Espiritu ug sa unsang paagi ang Espiritu makatabang kaninyo. Ilha ang mga paagi sa pagpalambo sa Iyang impluwensya sa inyong kinabuhi.

Mga pahina 39 ug 62: si Presidente Russell M. Nelson ug si Elder M. Russell Ballard miawhag sa mga miyembro sa pagtuon sa “Ang Buhi nga Kristo: Ang Pagpamatuod sa mga Apostoles” (tan-awa sa sulod sa atubangang hapin). Si Elder Ballard miingon, “Pagbutang og kopya diin inyo kining makita, ug paggahin og panahon sa pagribyu sa matag usa sa mga pamahayag nga makita niining dinasig nga pagpamatuod kang Kristo.” Isip usa ka pamilya, basaha ang “Ang Buhi nga Kristo” ug hisguti unsay inyong nakat-unan.

Pahina 127 ug 97: si Elder Quentin L. Cook mitudlo nga ang atong mga pundasyon sa hugot nga pagtuo natukod “hinay-hinay—usa ka patong, usa ka kasinatian, usa ka hagit, usa ka problema, ug usa ka kalampusan sa usa ka higayon.” Si Elder L. Whitney Clayton miingon: Ang paghimo sa gagmay nga inadlawng buhat sa pagtuo maoy labing maayong paagi sa paglig-on sa atong kaugalingon batok sa mga kagubot sa kinabuhi, bisan unsa pa kini. Unsa man ang inyong mabuhat kada adlaw aron sa paglig-on sa inyong pundasyon sa hugot nga pagtuo?