Elder Adilson de Paula Parrella

Dihang otso anyos pa si Elder Adilson de Paula Parella, nagsugod sa pagtudlo ang mga misyonaryo sa iyang pamilya bahin ni Propeta Joseph Smith ug sa Gipahiuli nga ebanghelyo.

“Bisan bata pa ko, wala na koy pagduha-duha nga si Joseph Smith nakakita gayud sa Dios ug ni Jesukristo,” miingon si Elder Parella, kinsa gipaluyohan niadtong Abril 1, 2017, isip General Authority Seventy. “Wala gayud ako magduha-duha sukad niadto.”

Natawo si Elder Parrella niadtong 1962 sa Guarujá, Brazil, sa baybay sa Atlantic duol sa São Paulo, kang Fioravante ug Vany de Paula de Paula Parella.

Ang duha niya ka magulang nga lalaki nakaserbisyo og misyon. Ang ilang mga ehemplo ug ang ehemplo sa mahigugmaong bishop nga si Angelino Borges de Freitas, kinsa mitudlo kaniya unsaon nga mahimong usa ka tighupot sa Aaronic Priesthood, nakapaisugda diha kaniya og tinguha sa pagserbisyo og full-time nga misyon. Ang pagserbisyo niya og misyon naghatag og dugang panabut “sa pagkatinuod sa Dios ug sa Iyang Anak ug nga kitang tanan mga anak sa Dios.”

Human makaalagad sa Brazil Porto Alegre Mission, si Elder Parrella mieskwela sa Brigham Young University sa Provo, Utah, USA, diin iyang naangkon ang bachelor’s degree sa communication ug usa ka master of business administration. Nagtrabaho siya isip tigdumalang direktor sa Kodak Polychrome Graphics ug isip partner sa Korn‘s Ferry International. Bag-o lang partner siya sa Caldwell Partners.

Nakigminyo siya ni Elaine Finholdt niadtong Disyembre 1988 sa São Paulo Brazil Temple. Ginikanan sila sa lima ka anak nga lalaki.

Si Elder Parrella nakaserbisyo sa pagka-branch president, bishop, high councilor, counselor sa stake presidency, Area Seventy ug presidente sa Brazil Belo Horizonte Mission sugod 2009 hangtud 2012.

Sukad iyang nahimamat ang mga misyonaryo, ang iyang kinabuhi nahimong usa ka biyahe aron masabtan ang pagbati nga iyang nasinati sa nag-edad pa siya og otso anyos. Ang pagsimba, ang padayong pagkat-on sa pulong sa Dios, ug paningkamot nga masunod ang mga sugo nakatabang nga mapalapad ang iyang panan-awon gikan sa daklit nga panan-aw sa kamatuoran nga gihatag kaniya sa bata pa. “Kini gayud ang gingharian sa Dios dinhi sa yuta,” miingon siya.