Ang Pagpangalagad sa mga Apostoles sa Tibuok Kalibutan Nagpadayon

Ang mga propeta ug mga apostoles nagpadayon sa pagpangalagad sa tibuok kalibutan (tan-awa sa D&P 107:23). Sa milabayng unom ka bulan:

Sa Face to Face nga broadcast nga naggikan sa Palmyra, New York, USA, giawhag ni Presidente Henry B. Eyring ug Elder Jeffrey R. Holland ang kabatan-onan sa simbahan sa pag-angkon og personal nga pagpamatuod. “Dali kamo aron makaila kamo sa inyong kaugalingon nga tinuod kining mga butanga,” miingon si Presidente Eyring.

Sa Mexico, si Presidente Russell M. Nelson gipaila sa national National Chamber of Deputies (sa ubos nga balay balauranan sa Kongreso), ug gipasidunggan ang Simbahan sa maayong nabuhat niini sa pagpanalipud sa relihiyusong kagawasan ug paglig-on sa mga pamilya. Nakighimamat usab si Presidente Nelson sa mga miyembro ug mga misyonaryo ug miingon nga ang mga miyembro “mao ang aktibong pwersa alang sa kaayo sa ilang mga komunidad.”

Sa Arizona, USA, giawhag ni Elder Dallin H. Oaks ang tanang miyembro sa Simbahan nga panalipdan ang kagawasan sa relihiyon. (Pangita og daghan pang impormasyon diha sa religiousfreedom.lds.org.)

Si Presidente Dieter F. Uchtdorf namulong sa mga miyembro sa Parleys Creek (Swahili) Branch sa Salt Lake City, Utah, USA. Daghan sa mga miyembro sa branch mga refugee nga gikan sa mga nasud sa Africa, ug si Presidente Uchtdorf mismo kaduha nahimong refugee. “Hinumdumi kanunay nga bisan asa kita, ang ebanghelyo mao ang panimalay,” miingon siya.

Si Elder M. Russell Ballard ug D. Todd Christofferson mitambong sa seremonya sa pag-instalar sa bag-ong bishop sa Roman Catholic Diocese sa Siyudad sa Salt Lake ug gi-welcome siya sa komunidad.

Sa Yuta nga Balaan, si Elder Holland ug Elder Quentin L. Cook miapil sa usa ka delegasyon sa mga lider sa mga Santos sa Ulahing mga Adlaw ug sa kadagkoang mga Judeo gikan sa USA kinsa nagpundok sa usa ka makasaysayanon nga dapit sa Jerusalem sa paghandom sa ika-175 nga anibersaryo ni Elder Orson Hyde (1805–78) sa Korum sa Napulog Duha ka mga Apostoles nga mipahinungod sa yuta isip usa ka pundukanang dapit sa katawhang Judeo.

Si Elder Holland mibisita usab sa mga miyembro ug mga misyonaryo sa Japan, Korea, ug Guam, diin “among nahimo ang pagpaniguro kanila sa [mahayag] nga kaugmaon,” miingon siya. Nakita niya nga ang live nga broadcast sa mga debosyunal sa tibuok nasud “mitanyag kanamo sa posibling kinalapdang maabut sa among mga mensahe,” nga nagkonektar sa napulo ka liboang mga miyembro.

Sa New York, USA, si Elder David A. Bednar miapil sa usa ka forum mahitungod sa kaminyoon, nag-ingon nga usa sa dakong buluhaton sa atong panahon—nga makahiusa sa nagkalain-laing mga tinuohan sa komunidad—mao ang pagtabang sa mga tawo nga makasabut sa tinuod nga kahulugan ug katuyoan sa kaminyoon.

Samtang namisita sa mga Santos sa Ulahing mga Adlaw sa Japan ug Korea, miingon si Elder Bednar nga ang Simbahan nakasinati og hinay apan makanunayon nga pagtubo sa Asia. “Dili kapugngan kondili makapasalamat ka sa kakugi, kamadasigon, ug kamatinud-anon niining mga Santos sa Ulahing mga Adlaw,” miingon siya. Namulong usab si Elder Bednar sa liboan ka mga miyembro sa Simbahan ug gitudloan ang 7 sa 21 ka misyon nga mga misyonaryo sa Pilipinas.

Sa Mexico, gitambagan ni Elder Neil L. Andersen ang mga miyembro sa Simbahan sa pagbuntog sa mga babag nga nagpugong kanila sa pagtambong sa templo, pagbalaan sa Igpapahulay, ug paglig-on sa mga relasyon sa pamilya. Iya silang gidapit nga dad-on sa hingpit ang Manluluwas diha ilang kinabuhi.

Mibisita si Elder Quentin L. Cook sa Pilipinas, 20 ka tuig human siya miserbisyo didto sa bag-o pa siyang natawag nga General Authority. Miingon siya nga sukad niadto midoble ang gidaghanon sa Simbahan sa Pilipinas. “Diin ang mga branch kaniadto,” miingon siya, “karon mga stake na. Ang gagmayng mga bata nga among nailhan kaniadto karon mga returned missionaries na. Ang mga returned missionary karon mga stake president na. Dili katuohan ang makitang kalamboan sa Simbahan.”

Sa Bolivia ug Peru, gitambagan ni Elder Cook ang mga miyembro nga tutukan nila ang pagbaton og pagtuo sa Ginoo nga si Jesukristo. Miingon siya nga ang kabatan-onan ug mga young single adult didto maayo kaayo ug nagpakita og gugma para sa Manluluwas ug sa Iyang Pag-ula ug Pagkabanhaw.

Sa Africa West Area, miingon si Elder Gary E. Stevenson nga ang iyang pagbisita naghatag og oportunidad nga makapamalandong sa gugma ug kalipay sa mga Santos sa Ulahing mga Adlaw nga makita diha sa ebanghelyo, bisan sa “mga hagit ug kalisdanan” nga ilang giatubang.

Wala madugay, sa Uruguay, Chile, ug Argentina, namulong si Elder Stevenson atol sa usa ka komperensya sa Alang sa Kalig-on sa mga Kabatan-onan. Miingon siya nga daghan sa kabatan-onan “naghimo og mga desisyon nga magmisyon ug magpabiling makanunayon sa ilang tumong nga maminyo sa templo ug sa … [pag-angkon] og mas taas nga edukasyon.”

Gitambagan ni Elder Ronald A. Rasband ang mga miyembro ug mga misyonaryo sa Central America Area sa pagpabiling matinud-anon sa ilang mga pakigsaad ug sa pagsalig sa Ginoo atol sa gubot nga panahon. Gibisitahan niya sa ospital ang mga batang dunay kanser sa Guatemala, mihatag sa pinakamahinungdanong pakigpulong sa usa ka gipasiugdahan sa Simbahan nga symposium bahin sa kagawasan sa relihiyon sa El Salvador, ug nakighimamat sa presidente sa Nicaragua.

Sa Tonga, si Elder Dale G. Renlund nakighimamat sa rayna ug sa ubang mga sakop sa halangdong pamilya. Mibisita usab siya sa Australia ug New Zealand, diin gihangyo siya sa mga miyembro nga ipaabut ang ilang gugma kang Presidente Thomas S. Monson.