Elder John C. Pingree Jr.

“Ang akong pagpamatuod nalig-on paglabay sa panahon, sa hinay-hinay, pinaagi sa pagkadawat og mga tubag sa pag-ampo, pagbati sa Espiritu samtang nagbasa sa mga kasulatan, paghinulsol, ug pagserbisyo sa Ginoo,” miingon si Elder John C. Pingree Jr., kinsa gipaluyohan niadtong Abril 1, 2017, isip General Authority Seventy.

Natawo niadtong 1966 sa Salt Lake City Utah, USA, nilang Carmen ug John C. Pingree Sr., iyang gipasidunggan ang debosyon sa iyang mga ginikanan sa pagtabang nga mahulma ang iyang kinabuhi.

“Sa adlaw human ko gihimugso, misulat kanako ang akong papa,” miingon si Elder Pingree. “Iyang gitagoan kana nga sulat, dihang mibiya ko para sa full-time nga misyon iya kining gipadala kanako. Ang sulat naglakip sa daghang pahina sa iyang pagpamatuod ug mga leksyon nga gusto niya nga akong makat-unan sa akong kinabuhi. Samtang akong gibasa, ang Espiritu mipamatuod kanako nga ang gitudlo ngari nako sa akong mga ginikanan mahitungod sa gipahiuli nga ebanghelyo ni Jesukristo tinuod.”

Si Elder Pingree nakaserbisyo sa Massachusetts Boston Mission, Spanish nga pinulongan.

Nakadawat siya og degree sa English ug political science gikan sa University of Utah ug degree sa master of business administration gikan sa Harvard Business School. Nakigminyo siya ni Anne Pugsley niadtong Marso 1990, ug nahimong ginikanan sa lima ka anak.

Hapit tanan niyang panarbaho nakatutok sa pagtabang sa uban. Presidente siya sa usa ka medical humanitarian aid nga organisasyon ug bise presidente sa duha ka health care nga kompanya.

Presidente siya sa Texas Houston Mission gikan 2011 hangtud 2014 ug nakaserbisyo isip Area Seventy, stake president, bishop, elders quorum president, ug teacher sa institute ug seminary.

“Ang Ginoo miingon, ‘Kon ikaw magtinguha, ikaw mao ang paagi sa pagbuhat og daghan nga kaayohan niini nga kaliwatan’ (D&P 11:8),” miingon si Elder Pingree. “Alang kanako, ang Ginoo nag-ingon,‘ako makagamit kanimo sa pagbuhat og maayo sa mga kinabuhi sa ubang mga tawo, kon ikaw motugot kanako.’ Kon mangita kita og mga oportunidad, ang Langitnong Amahan mogamit kanato sa pagpanalangin sa ubang tawo.”