Cristina B. Franco

Sa batan-ong edad, nakat-unan ni Sister Cristina B. Franco nga kon duna siyay pangutana, makaduol ra siya sa Langitnong Amahan sa pag-ampo alang sa tubag.

“Nahinumdom ko nga miadto ko ni mama dihang 11 anyos pa ko ug nangutana ko og usa ka pangutanang doktrinal,” miingon siya. “Gitubag niya ang akong pangutana apan iya kong giingnan, ‘Dili ang akong gisulti ang imong tuohan.’ Mao nga nag-ampo ug nangutana ko sa akong Langitnong Amahan kon kini tinuod ba.”

Gitubag ang iyang pag-ampo, ug sukad niana nasayud siya nga siya dunay Langitnong Amahan kinsa nahigugma kaniya ug motubag sa iyang mga pag-ampo.

Gipaluyohan niadtong Abril 1, 2017, sa Kinatibuk-ang Kapangulohan sa Primary, si Cristina Beatriz Fraga natawo niadtong 1958 kang Hugo R. ug si Maria A. Godoy Fraga sa Buenos Aires, Argentina.

Sa tres anyos pa siya, nanuktok ang mga misyonaryo sa pultahan sa balay sa iyang mga ginikanan. Human makatuon ug makasimba sulod sa mga walo ka bulan, nagpasakop sa Simbahan ang magtiayon ug nagsugod sa pagpadako sa ilang mga anak diha sa ebanghelyo. Sa Primary niya natagboan si Rodolfo C. Franco, usa ka bata nga nahimo niyang suod nga higala.

Sa iyang pag-18, ang pamilya ni Sister Franco namalhin sa Utah, USA. Nianang higayona, siya ug si Rodolfo nasayud nga gusto silang magminyo, apan nagkinahanglan pang moserbisyo og kadiyot si Rodolfo sa militar sa Argentine. Nagsinulatay sila, ug dihang nakompleto niya ang pagserbisyo sa militar, nagminyo sila niadtong Disyembre 15, 1978, sa Salt Lake Temple. Mga ginikanan sila sa tulo ka anak.

Nagsunod sa mga tunob sa amahan ni Sister Franco nga tighimo og relo, ang magtiayon nagtrabaho sa usa ka shop sa relo sa Salt Lake City hapit sa tulo ka dekada.

Si Sister Franco nakaserbisyo og daghang kapasidad sa Simbahan. Nakaserbisyo siya sa Primary general board gikan 2005 hangtud 2010 ug, sa panahon sa pagtawag kaniya sa Kinatibuk-ang Kapangulohan sa Primary, nagserbisyo siya uban sa iyang bana nga nag-preside sa Argentina Resistencia Mission.