Faataatiaeseina o le Olaga Sa Ou Fuafuaina

Ata

scale

Ata na tusia e Carolyn Vibbert

I le ono po o le fitu o o’u tausaga, sa ou iloa ai sa ou manao ia avea ma se tagata e suesuea ogasami. Sa ou taulai atu i la’u sini, galue malosi, ma ou sao atu i se kolisi lelei. Sa ou aveina ni nai kosi mo suesuega o meaola eseese [sulosi]. Ae a o faasolo pea a’u aoaoga, sa oo ina ou tosina atu i le tino o le tagata, ae maise lava i le tulaga o sela ola. Sa tonu o le a avea a’u ma se tagata e suesuea faama’i i le suesueina o tino maliu.

E le’i leva ae ou fetaui i la’u tane o le lumanai, ma tonu ai ma te faaipoipo. Sa i ai lava o se vaega o la’u fuafuaga le faia o se aiga, ae e ui sa ou iloa e mafai ona avea a’u ma se fomai maoae ma se tina maoae, sa ou lagonaina e le mafai ona ou maoae i ia mea uma e lua i le taimi e tasi. Talu ai o le aiga e taua i le ata o le faaolataga a le Alii, o lea na ou filifili ai e avea muamua ma se tina. Sa ou faapea, o le taimi lava e aooga ai la’u fanau, ona mafai loa lea ona ou toe alu foi a’u i le aoga.

Ina ua alu lau uii i le aoga faataitai, sa ou amataina loa le faagasologa o talosaga mo se polokalama o le Fomai [PhD] i suesuega o taumafa paleni, i le Iunivesite o Texas i Austin. A o lei auina atu la’u talosaga, sa ou iloa ai ua ou maitaga ae lei fuafuaina i la’u tamaitiiti lona fitu. Sa 40 ma ona tupu lo’u matua, ma e oo ane i le taimi e aoga ai le tamaitiiti lenei, o le a toeitiiti lava atoa lo’u 50.

Sa ou mafaufau ane, “Ua fai si tuai ona amata se matata fou lea e umi se taimi e aoga ai.”

O le taimi lava lea sa ou vaaia ai a’u miti mo se matata i le olaga, ua solofa ifo i lalo. A o amata ona ou faavaivai, sa oo mai i lo’u mafaufau ma lo’u loto se mau: “E le sili lava le alofa o se tasi i lenei alofa, ia tuuina atu e se tasi lona ola e sui a’i ana uo” (Ioane 15:13). Sa ou mafaufau lava o lenei mau e faauiga i se tagata e oti mo se isi tagata, ae o lenei ua sili atu le loloto o lona uiga.

Sa ou iloaina, o le alofa aupito sili e mafai ona ou faaalia, o le faataatiaese lea o le olaga sa ou fuafuaina mo a’u lava, ae tuu atu lo’u taimi ma le malosi e tausi ai la’u fanau. Sa ou lagonaina o le mea lena mo a’u, o le mea lenei e finagalo le Alii ou te faia. Ioe, na semanu e mafai ona ou fesoasoani i ni tagata e toatele i le avea ai ma se fomai, ae ua ou iloa foi, o le aafiaga silisili e faavavau e mafai ona ou maua, o loo i olaga ia o la’u lava fanau.