O Le Amoina o Avega i Luga o Tauau e LELEI, o le Faaaogaina o Solofanua e SILI ATU, Ae o Pikiapu ua SILISILI ATU ONA LELEI

I le 1903, i le aso 17 o Tesema, na faataunuu ai se miti a tagata soifua i le fatuaiina ma le fausiaina e Wilbur ma Orville Wright o le uluai vaalele e faaaoga ona apaau e lele ai [fixed wing] i le lalolagi ma faia ai se uluai malaga faatonutonu, malosi ma tumau, lea na i ai i luga o le ea mo le 12 sekone ma kavaina ai le 120 futu, po o le 37 mita, e tusa ma le afa o le umi o se vaalele tele o le 747. I tulaga faatonuina i lenei vaitaimi, o se malaga e matuai puupuu lava, ae i lena taimi, sa o se mea na ausia e toaitiiti na talitonu o le a mafai ona faia.

Sa ia Wilbur ma Orville ni matua o e na uunaia le taua o le aotauina, lotu, le taua o le galue malosi ma tulaga faatauaina o le aiga. Na tofu le auuso ma se vaega o ma’i tigaina. Sa eseese taimi na la aafia ai i faigata, le mautonu, ma e oo lava i le faanoanoa, mafaufau ai pe o le a faamanuiaina ea i la’ua i le fatuaiina o le uluai vaalele i le lalolagi. Sa la taumafaia ni matata eseese o ni lomitusi, lipeaina o uila, gaosia o uila, ma mulimuli ane, fatuaiina o se vaalele, i o la’ua olaga atoa. Soo se taimi lava la te pikiina ai se poloketi e galulue ai, sa la taulai atu ma galulue o se ‘au.

Sa tuuto atu e le auuso Wright i laua lava ina ia faia le mea e lei faia muamua lava e se tasi. Sa la faaaluina le taimi e faia ai a la’ua meaaoga. Sa la lotomaualalalo ma lava le atamai e talisapaia ai ma aoao ai e uiga i le galuega a isi na muamua atu. Ma sa la foia faafitauli i lea laina ma lea laina, o lea mataupu i luga o lea mataupu.

Sa la iloaina e tolu lava tulaga manaomia autu mo se masini e lele: 1. E tatau i le pailate ona mafai ona faafoeina le vaalele. 2. E tatau ona uunaia e apaau le masiiina i luga. 3. E tatau ona fafagaina e se afi ina ia tumau ai i luga o le ea. Na avea e le auuso Wright nei mataupu faavae o ni la taiala e faafoe ai ma aoaiina ai i la’ua i soo se mea la te faia ina ia ausia ai a la sini.

O mataupu faavae ma tulaga manaomia talitutusa e faaaogaina foi i la tatou faigamalaga i le olaga ma agai atu ai i le taunuuga o le ola e faavavau. E manaomia ona aoaoina, faataitaia ma ola ai ao e saunia e tulai ae ma gaosia se “uunaiga” i lou lava olaga. Sei iloga ua e maua se malamalamaaga faaleagaga po o ai oe o le a mafai ai ona e puleaina oe lava. A o e aoao e pulea oe lava, o le a e mafai lelei ai ona e pulea lou lava olaga. Afai e te manao e aveese le lalolagi, e tatau ona e muai aveeseina oe lava.

O le suiga mai le uluai vaalele lea na lele mo le na o le 12 sekone e oo mai i le asō, lea ua mafai ai e vaalele ona aveina le silia ma le 400 le pasese ma e mafai e pailate ona taofia nei masini tetele i le ea mo le fia sefulu itula e ofoofogia. I taumafaiga a le au Wrights, sa la talitonu e mafai ona i ai se vaalele e sili atu nai lo le vaalele lea sa la fausiaina muamua, ma sa la silafia lelei e mafai ona i ai se vaalele e mafai ona i ai i luga o le ea e silia ma le 12 sekone. I le na o le sefulu tausaga talu ai na fausia ai le Eapasi [Airbus] A380 mo le uluai taimi.

E lei taofia lava taumafaiga a tagata ina ia faaatoatoa le gaosiga ma le fausiaina o vaalele ma taumafai e ausia lona faamoemoega sili. E tatau ona tatou manatuaina e le lava mo se mea le na o le lelei, e i ai isi filifiliga e sili atu, ma o loo i ai lava foi isi e silisili atu ona lelei. Afai la e te lagona e te lelei, e le lava lena aua o loo i ai se mea e sili atu, ma afai e te lagona e sili atu, e le o lava lena aua o loo i ai se mea e silisili atu ona lelei. O le tele lava o taimi tatou te le mafai ai ona fafetaiaia pe ausia o tatou faamoemoega i le olaga ona e le o mafai ona tatou puleaina i tatou lava ma faia ni suiga taua i o tatou olaga.

O le tele o taimi, pe a tatou toafimalie tatou te lagona le faamalieina ma tumau ai i le tulaga lava e tasi e aunoa ma le taumafai ia faia se mea e sili atu, faaleleia ma faaatoatoaina i tatou lava ina ia mafai ona tatou maua le malosi e fesoasoani atu ai i isi. Na lapataia e Iesu Peteru ma fetalai atu; ‘Pe a liua mai oe, ona e faamalosi ai lea i ou uso’. Afai tatou te mananao e faaatoatoa isi, e tatau ona tatou muai faaatoatoaina i tatou lava. O le faaatoatoaina o i tatou lava, e manaomia ai le tatou suia o o tatou uiga masani po o mausa. Afai e le mafai ona tatou suia a tatou mausa, ona amata lea ona avea i latou ma se vaega o lo tatou natura. O le a avea ma se vaega o o tatou olaga. Na silafia e le Alii le tulaga gafatia o Peteru peitai a le mafai ona ia suia o ia lava, e le mafai ona ia fesoasoani atu i isi. “Ma na fetalai mai le Alii, . . . faauta, ua manao tele Satani ia te outou, ia lulu ia te outou pei o le saito: a ua ou faatoga mo oe, ina nei mavae lou faatuatua; a o oe foi, pe a liua mai oe, ona e faamalosi ai lea i ou uso.” (Luka 22:31–32)

O le a se mea ua tatou aoaoina mai lenei tausaga mai la tatou faigamalaga? O a ni suiga tatou te mananao ia faia i o tatou olaga e faaali atu ai o loo tatou alualu i luma faaletino ma faaleagaga mai le lelei i le sili atu i le lelei silisili atu? O a nisi o talitonuga ma agaifanua tuai tatou te aloese ai pe o le a le suia? Ona o lo tatou lava faamaualuga ma le ua maaa, ma e le o susuluina lava le malamalama o Keriso i o tatou agaga? Ou te mafaufau pe aisea ua fetalai mai ai le Alii “. . . ona sau lea o le amioleaga e toatasi lena, ma aveese mai [i tatou mai] le malamalama ma le upumoni, e ala i le le usiusitai, ma ona o le uputuu a o latou tama”. (MF&F 93:39)

Mai le pe a ma le 40 tausaga talu ai, o le toatele o tagata i Samoa sa masani ona tauaveina pe amoina a latou fua o faatoaga i ato e lalagaina ma tautau mai i itu taitasi o se amo i luga o o latou tauau. E le o aiga uma na i ai se solofanua e fesoasoani ia i latou e fesiitai mai ai fua o faatoaga. Peitai, o le suiga mai le amoina o uta i luga o o latou tauau i solofanua na faasolosolo malie ese atu ma tatou le matauina ai seia oo ina toetoe lava o aiga uma ua faaaogaina solofanua mo lena faamoemoega. I le asō, o le vave o le suiga mai solofanua i loli pikiapu po o taavale faigaluega e matuai ofoofogia lava.

Sa faamatalaina se tala e uiga i se tamalii mai lo matou nuu o le sa malaga i Niu Sila mo le tolu masina i le faatoa mavae lava o le afa fulifao i le 1966. Na toe foi mai o ia i Samoa ma se loli pikiapu na faameaalofa i ai ia te ia e lona atalii ina ia fesoasoani e faaitiitia lana avega i galuega faigata sa ia faia i le faatoaga ao faaaoga ai lana solofanua.

O le ono masina talu ona ia toe foi mai, na maliu ai o ia. E ui ua ia maua nei se taavale e fesoasoani ia te ia i le faatoaga, ae sa fiafia lava lenei tamalii e faaaoga lana solofanua mo galuega i le faatoaga. E ui sa ia maua se taavale e fesoasoani i le faafaigofieina o lana galuega, ae sa ia fiafia lava i uiga masani tuai o le faaaogaina o le auala sili ona faigata, leaga ma tele le taimi e alu ai e galue ai i le faatoaga.

Pe a ou mafaufau i lenei tamalii, ou te fesili ifo ia te au lava po o a nisi o uiga masani tuai o ou manao pea e taofi ma faaaoga i lo’u olaga? O i ai ni uiga masani tuai o loo o’u taofimau pea i ai e tatau ona ou lafoaia? Ou te valaauliaina outou ina ia fesili ifo ia te oe lava i lena lava fesili e tasi. A e mauaina ni uiga masani tuai e tatau ona aveesea, ia taulai atu loa ina ia lafoaiese atu. E pei o le solofanua, e mafai ona taofia lo tatou faaaogaina ma aoao ina ia faaaoga ni uiga masani fou e sili atu, e pei o pikiapu mo se suiga silisili atu ona lelei.

O le amoina o avega lapopoa i ato mamafa i luga o amo e faaaoga ai o tatou tauau sa lelei. Mulimuli ane, o le faaaogaina o solofanua ua sili atu peitai o le faaaogaina o pikiapu po o taavale faigaluega ua silisili atu ona lelei i le aveina o uta po o avega mamafa mai le faatoaga i le taimi nei i Samoa. O le suiga o le olaga o se tasi mai le lelei i le sili atu po o le mai le sili atu i le silisili atu ona lelei o la tatou lava na tiutetauave. O se faamanatu la, ia tatou aloese mai vaega toafimalie o tatou saofafai ai, aloese mai le faamaualuga, o tatou talitonuga ma agaifanua tuai lea e taofia i tatou mai le alualu i luma faaleagaga.

I se tasi aso, sa ou aveina mai ai se pikiapu mai Sauniatu, o le aoga a le Ekalesia pe a ma le ono maila i totonu mai le auala autu i le nuu o Lufilufi. O lenei nuu e pe a ma le ivasefulu maila i le itu i sasae o Apia. I lo’u agai mai i le auala autu, sa ou pikiina ai se tamalii o loo amoina se avega mamafa i luga o ona tauau. Sa oso o ia i luga i tua ma sa alu loa le taavale. I sina taimi mulimuli ane, sa ou tilotilo atu i le faata i tua ma i lo’u te’i, o loo tu pea lenei tamalii i tua o le pikiapu ma o loo amoina pea lana avega i luga o ona tauau. Sa ou faapea o le a ia tuuina i lalo lana avega i luga o le pikiapu, nofo i lalo ma faamalolo ona tauau seia tuu o ia i lona nuu.

O nisi taimi e avea le “tuueseina” o a tatou aganuu ma tu ma aga masani lea e feteenai ma mataupu faavae o le talalelei ma se luitau maoae mo le toatele ua avea ma tagata o le talalelei. Ua aoaoina i tatou e le talalelei a Iesu Keriso i mataupu faavae sili ona lelei e fesoasoani ia i tatou e suia ai o tatou olaga. Ua i ai nisi aganuu ma tu masani ia e mafai ona taofia i tatou mai le faaleleia o i tatou lava mai le lelei i le sili atu po o le sili atu i le silisili atu ona lelei. O le oso i luga o le pikiapu, e lei mafaufau lava lenei tamalii o le tuuina i lalo o lana avega i luga o le pikiapu ma saofai i lalo o se mea e sili atu ona lelei e fai.

Mafaufau e uiga i nisi mataupu faavae o le talalelei ua e iloa ma e tatau ona fesoasoani ia i tatou ina ia maua ai se uunaiga faaleagaga i o tatou olaga. O le faatuatua, agamalu, auauna atu, salamo, alofa, tatalo ma le faamagalo atu, o isi ia. E mafai ona latou fesoasoani ia i tatou ia faia ni suiga mautu mai le lelei i le sili atu i le silisili atu ona lelei. O mataupu faavae nei o le faaolataga, o tulafono ia faaSelesitila. Afai e le mafai ona tatou ola i nei tulafono, e le mafai ona tatou ola i le mamalu selesitila (MF&F 88:22).

Na amata le auuso Wright i se auala lotomaualalo tele. Sa la amata ma le tele o luitau i o la’ua olaga, ae sa la talitonu e le o le mea e amata ai ae o le mea o loo la agai atu i ai e taulia. O le gauai atu i mea itiiti ma faatauvaa i le olaga o le a aveina atu ai oe i mea silisili ona maoae. O le toatele o tamalii ma tamaitai iloga i le lalolagi na o mai mai ni amataga faatauvaa ma itiiti ma e latou te lei tumau ai i le avea ai ma ni tagata lelei, sa latou taumafai i le mea sili latou te mafaia ina ia avea ai ma tagata silisili atu ona lelei.

O lo tatou Alii o Iesu Keriso na amata mai se amataga maualalo. Na Ia faaali mai ia i tatou le auala sili e toe foi atu ai ma ia toe nonofo faatasi ai ma Ia. Na Ia togiola mo a tatou agasala ma tatalaina le faitotoa mo i tatou ina ia faaeaina pe afai tatou te tausia Ana poloaiga. E le mafai ona suitulaga le togiola a Iesu Keriso mo la tatou lava tiutetauave o le tausia o poloaiga e faasaoina ai i tatou.