Ata

taking a test

Ata na tusia e Matthew Shipley

Ina ua ou lesitala i se vasega faafilosofia i le aoga maualuga, sa fai si popole teisi o lo’u tama. I le faafilosofia, e fesiligia ai mea uma, e aofia ai le i ai o le Atua. Sa aoao i matou e le matou faiaoga i mea sa faasagatau i mea tau lotu ma teena ai le i ai o le Atua.

Sa fesili mai se tasi o suega o le faafilosofia, “Aisea ua tatou o mai ai i le lalolagi?” O le tali sa tatau ona ou tuuina atu o le, ina ia mafai ona tatou iloa ai o tatou gafatia uma ma fai mea e manao ai le laloagi natura tatou te faia. Ou te lei tusia le tali lena aua e le o le mea lena ou te talitonu i ai.

Nai lo o lena, sa ou tusia ai, “Ua tatou o mai i le lalolagi ina ia tofotofoina ma ia toe foi atu e nonofo faatasi ma lo tatou Tama oi le Lagi e faavavau ma o tatou aiga.”

Mulimuli ane, sa valaau mai le faiaoga ou te alu atu i luma ma fesili mai pe na ou iloa le tali sao i le fesili. Sa ou fai atu i ai sa ou iloaina, ae e le mafai ona ou tusia se mea sa ou iloaina e le sao.

Sa ia fesili mai pe o au o se tagata lotu ma po o le fea le lotu ou te auai ai. Sa ou tau atu ia te ia, o au o se tagata O Le Ekalesia a Iesu Keriso o le Au Paia o Aso e Gata Ai. Sa fai mai o ia, e leai ma se tamaitiiti aoga lotu ua ia iloaina sa lava le lototele e tu atu mo ona talitonuga ma tusi ai se tali faapea.

Sa ia faapea mai, “Ou te lei tuuina atu le togi atoa ia te oe ona o lau tali e le o le tali sao lea.” “Ae na ou tuuina atu ia togi ia te oe ona o lou lototele e tusi i lalo le mea e te talitonu i ai.”

Sa ou fiafia ona sa ou tali e tusa ai ma ou tautinoga ma e tusa ai ma upumoni o le talalelei ua ou iloa ma o loo ou taumafai e ola ai.

Ata

riding a bike with the temple in view

O ni taumafanafana ua mavae, sa o ai alii talavou o le matou uarota e tietie uila i luga o le mauga. Sa fai si ou fefe ona o lou taimi muamua lea. O lau uo o Iakopo o se tietie uila atamai tele, o lea sa ou fuafua ai ia ou pipii lava ia te ia.

Ina ua uma se malologa puupuu i luga o le tumutumu, sa amata loa ona matou toe foi ifo i lalo o le mauga. O au sa aupito sili ona tuai o le vaega ma sa ou mamao lava i tua, ae maise lava ina ua uma ona ou pau faalua i luga o pioga tu. Sa faatali mai Iakopo e fesoasoani ia te au i taimi taitasi sa ou pau ai, ma sa ma taumafai ai ia maua atu le vaega.

A o faasolo ina goto le la, sa mautinoa lava ua ma leiloloa. Na silia ma le afa itula talu ona ma iloa atu le matou vaega, ma ua faasolo ina pogisa tele o lea sa tau le mafai ona ma iloa atu le auala. Sa ou tatalo, ma talosaga i le Tama Faalelagi mo se fesoasoani ma le lototele ma te o ai pea. Ona tonu lea ia i maua ma Iakopo e faaauau ona ma tietie atu i se itu faapitoa. A o ma oo atu i se tulimanu, sa ma vaaia ai se vaaiga sa sili ona matagofie ma faafiafiaina—o le Malumalu o Draper Iuta! Sa faamalamalamaina e le sulu sa atagia mai i le malumalu lo ma auala, ma sa mafai ona ma taunuu saogalemu atu i o matou taitai ma uo.

Soo se taimi lava ou te vaaia ai le malumalu, e faamanatu mai ai ia te au le toafilemu ma le fesoasoani e maua mo i tatou iina. Soo se taimi lava ou te lagona ai le leiloa i le pogisa o le lalolagi, e mafai ona ou tepa atu i le malumau mo le sulu ou te manaomia.

Ata

making a friend

Sa matou saofafai i se laulau e aai ai faatasi ma au uo, ae ou maitauina loa se tamaitiiti fou—o Mikaele. Sa filifili o ia e nonofo faatasi ma se vaega o ni tama matutua atu, o e na amata ona latou taufaalili ia te ia. Sa ou iloa mulimuli ane, o Mikaele e i ai si faaletonu o lona mafaufau.

Sa ou fesili atu ia Mikaele pe fia nofo i o matou tafatafa ma au uo. Sa ia teena, atonu ona o le fefe i tagata i toe ulagia o ia.

O le aso na sosoo ai, sa ou faailoa atu ai o ia i au uo. Na mafai ona ou iloa sa fiafia o ia ona ou te lei fiu ia te ia. E ese le tele o ana tala e faamatala. O ia o se tama maoae!

O aso taitasi, sa ou iloa ai ua amata ona avea Mikaele ma se tagata fiafia lava. Sa amata ona tulimatai o ia i le aai faatasi ma ana uo. O le saofafai ai ma Mikaele i le malologa, sa vave ona fatuina ai se faauoga anoa. Sa le gata ina fesoasoani ia Mikaele, ae sa fesoasoani foi ia te au.

O le lagona mai le auauna atu i isi, o se tasi o lagona aupito sili ona matagofie i le lalolagi.