Ua Faamanatu e Ekalesia Soofaatasi a Samoa i le Eria o Hawkes Bay le Aso Tutoatasi

Sa potopoto faatasi ni faalapotopotoga faalelotu mai le tele o tapuaiga i le Ekalesia Katoliko a Sagato Paterika i Napier, Hawke’s Bay, Niu Sila, e faamanatu le 56 tausaga o Samoa o se malo tutoatasi.

Pe a ma le 350 tagata na auai i le sauniga faapitoa i le afiafi, o se tasi lea o le tele o gaoioiga na faia i Niu Sila ma Samoa atoa.

O le autu mo le sauniga na aumai mai le Esoto Mataupu 13 “Ua fai atu foi Mose i le nuu, ia manatua lenei aso, ua outou o mai ai nai Aikupito o le mea sa nofo pologa ai; aua o le aao malosi ua au mai ai outou e Ieova . . .”

Na saunoa taitai mai Le Ekalesia a Iesu Keriso o le Au Paia o Aso e Gata Ai e uiga i le auala na uunaia ai e le Faakerisiano tagata o Samoa, i totonu o atumotu ma i Niu Sila.

Na saunoa Epikopo William Ah Kiong, mai le Uarota Samoa a Heretaunga, “Ao faamanatu atu e Mose i tagata ina ia manatua lena aso, e tatau foi ona tatou manatua le taua o le Aso Tutoatasi o le Atunuu.” Sa ia faaauau pea, “E ui e eseese o tatou tapuaiga po o faatuatuaga tatou te o mai ai, ae ua tatou potopoto faatasi e faamanatu lo tatou atunuu matagofie o Samoa ma le mea sili ona taua, ua tatou potopoto o ni fanau o le Atua.”