Misinari wok: Stap Serem Wanem I Stap long Hat blong Yu
Long ol nara toktok, weaples yu stap long hem long wol ia, i gat fulap janis blong serem gud nius ia blong gospel blong Jisas Kraes.
Las manis, dia profet, Presiden Russell M. Nelson, i bin invaetem Olgeta Twelef Aposol blong travel wetem hem blong go mekem dedikesen blong Tempol long Rom Itali. Taem mi stap travel, mi tingbaot Aposol Pol mo ol wokbaot blong hem. Long taem blong hem, blong aot long Jerusalem go kasem Rom bae i tekem 40 dei. Tedei, long wan long ol plen we mi laekem, i no tekem 3 aoa.
Olgeta we oli stap stadi long Baebol oli biliv se Pol i bin stap long Rom taem hem i stap raetem sam long ol leta blong hem, we oli impoten blong mekem ol memba blong i kam moa strong long taem blong olgeta, mo tu, long taem blong yumi.
Pol mo ol nara memba blong olfala Jos, ol Fasfala Sent oli save gud long sakrifaes. Plante, oli mekem nogud tumas long olgeta, go kasem ded.
Long ol las 200 yia, ol memba blong Jos blong Jisas Kraes we i kambak, Ol Lata-dei Sent olgeta tu, oli eksperiensem ol nogud fasin we oli mekem long olgeta long fulap wei. Be nomata long ol nogud fasin ia (mo samtaem from hemia), Jos blong Jisas Kraes blong Ol Lata-dei Sent i gohed blong gro mo naoia i stap raon long ful wol.
I Gat Fulap Yet blong Mekem
Be, bifo yumi bekem wan kek, mo selebret, mo kongratuletem yumiwan long sakses ia, yumi mas andastanem gud gro blong Jos mo olsem wanem i impoten.
I gat samples seven mo haf bilian blong pipol long wol, komperem long samples 16 milian memba blong Jos blong Jisas Kraes blong Ol Lata-dei Sent—hem i wan smol grup nomo.1
Long semmak taem, ol namba blong ol man we oli biliv long Kraes long sam pat blong wol i stap go daon.2
Iven long Jos blong Lod we i kambak bakegen—taem membasip blong ful Jos i stap gro—i gat fulap tu we oli no klemem ol blesing blong stap pat long Jos evri taem.
Long ol nara toktok, weaples yu stap long hem long wol ia, i gat fulap janis blong serem gud nius ia3 blong gospel blong Jisas Kraes wetem ol man we yu mitim, stadi wetem, mo laef, wok, o pasem taem wetem.
Long yia we i pas, mi bin gat janis ia blong pat fulap wetem ol aktiviti blong misinari blong Jos long ful wol. Fulap taem mi bin stap tingting hevi mo prea abaot bigfala invitesen blong Sevya long ol disaepol blong Hem—yumi ol pikinini blong Hem—: “Yufala i mas go long ol man long olgeta ples long wol, [mo tijim olgeta], mo baptaesem olgeta long nem blong Papa, … blong Pikinini …, mo … blong Tabu Spirit.”4
Mi bin gat hadtaem smol wetem kwestin ia “?Hao nao yumi, olsem ol memba mo ol disaepol blong Kraes, i save mekem bigfala wok ia i hapen long ol evri dei laef blong yumi?”
Tedei mi invaetem yu blong tingting hevi long semmak kwestin ia long hat mo maen blong yu.5
Wan Presen blong Misinari wok
Ol lida blong Jos oli bin talemaot bigwan klia mo strong singaot ia se “!Evri memba i wan misinari!” blong fulap yia finis.6
Ol memba blong Jos blong Jisas Kraes—tugeta long ol taem bifo mo long taem blong yumi—oli bin serem gospel wetem ol fren mo olgeta we oli mitim wetem fulap paoa mo glad. Ol hat blong olgeta oli bin laet strong wetem testemoni blong Jisas Kraes, mo oli bin rili wantem ol narawan blong eksperiensem semmak glad we oli bin faenem long gospel blong Sevya.
Sam memba blong Jos oli gat talen ia blong hemia. Oli laekem blong stap olsem ol ambasada blong gospel. Oli wok strong wetem glad mo lidim wok olsem ol memba misinari.
Be, i gat ol narawan long yumi we oli fraetfraet. Taem oli tokbaot misinari wok long ol miting blong Jos, sloslo ol hed oli ben i go daon kasem taem oli haed biaen long ol stul blong sidaon, ol ae oli lukluk nomo ol skripja o i sat i stap blong mekem se oli no lukluk ol nara memba.
?From wanem hemia? Ating from yu filim nogud blong no mekem moa blong serem gospel. Maet bae yumi filim se yumi no save gud hao blong mekem. O maet bae yumi filim fraet blong mekem ol samting we yumi no yus long hem.
Mi andastanem hemia.
Be tingbaot, se Lod i neva askem ol misinari wok we oli stret evriwan. Be, Lod i askem blong mas gat wan hat mo wan maen we i wantem mekem samting.”7
Sapos yu stap mekem misinari wok finis wetem glad, plis gohed, mo stap olsem wan eksampol long ol narawan. Lod bae i blesem yu.
Be, sapos yu filim se yu no stap pulum savat taem i kam blong stap serem gospel mesej, ?bae mi talem faef tingting we yu save mekem blong no filim nogud blong pat long bigfala invitesen blong Sevya blong helpem Isrel i kam tugeta?
Faef Simpol Tingting
Faswan, kam moa kolosap long God. Fas bigfala komanmen hem i blong lavem God.8 Hem i wan stamba risen from wanem yumi stap long wol ia. Askem yuwan, “?Yu rili biliv long Papa long Heven?”
“?Mi lavem mo trastem Hem?”
Moa yu kam kolosap long Papa long Heven, moa bae laet mo glad blong Hem bae i saen insaed long yu. Ol narawan bae oli luksave se i gat wan samting i defren mo spesel abaot yu. Mo bae oli askem long yu.
Nambatu, fulumap hat blong yu wetem lav blong ol narawan. Hemia hem i nambatu bigfala komanmen.9 Traem blong lukluk tru evri man raon long yu olsem wan pikinini blong God. Givhan long olgeta—nomata we ol nem blong olgeta i kamaot long lis blong givhan brata o sista blong yu o no.
Laf wetem olgeta. Harem gud wetem olgeta. Krae wetem olgeta. Respektem olgeta. Hilim, leftemap, mo mekem olgeta i kam moa strong.
Wok had blong mekem semmak long lav blong Kraes mo gat sore blong ol narawan—iven long olgeta we oli no kaen long yu, we oli jikim yu mo wantem mekem nogud long yu. Lavem olgeta mo tritim olgeta olsem ol pikinini blong Papa long Heven.
Nambatri, wok had blong wokbaot long rod blong stap olsem ol disaepol. Taem lav blong yu long God mo ol pikinini blong Hem i kam bigwan, komitmen blong yu blong folem Kraes tu i kam moa bigwan.
Yu lanem ol wei blong Hem taem yu stap kakae gud long toktok blong Hem mo stap mekem mo folem ol tijing blong ol profet mo aposol blong yumi long tedei. Yu kam antap long fasin blong gat tras long yuwan mo gat strong paoa long tingting blong folem wei blong Hem taem yu toktok wetem Papa long Heven wetem wan hat we oli save tijim mo wan hat we i gat tingting i stap daon.
Blong stap wokbaot long rod olsem ol disaepol i nidim praktis—evri dei, smol smol, “ gladhat from wan gladhat”10 “wan laen, wan laen.”11 Sam taem tu step i go fored mo wan step i kambak biaen.
Impoten samting, i we yu no givap; gohed blong traem blong kasem i stret. Long en bambae yu kam moa gud, moa hapi, mo moa series. Blong tokbaot fet blong yu wetem ol narawan bae i kam moa isi mo nomol. I tru, bae gospel i wan impoten, spesel pat blong ol laef blong yu we bae i mekem yu filim i no nomol blong no tokbaot wetem ol narawan. Hemia bae i no hapen kwiktaem—hem i tekem wan efot blong laeftaem. Be bae i hapen.
Nambafo. Stap serem wanem i stap long hat blong yu. Mi no stap askem yu blong stanap long kona blong wan strit wetem wan maek mo singaot ol ves aot long Buk blong Momon. Wanem mi stap askem yu, hem i we, oltaem yu lukaotem janis blong tokbaot fet blong yu long wan nomol wei long ol storian blong yu wetem ol man—tugeta long fes mo long intanet. Mi stap askem blong yu “stanap olsem ol witnes”12 blong paoa blong gospel oltaem—mo taem i nid, yusum ol toktok.13
From “paoa blong God blong sevem olgeta man we oli bilif long Hem,” yu tu i save gat tras long yuwan, gat karej, mo gat tingting we i stap daon taem yu stap serem.14 Tras long yumiwan, karej, mo fasin blong gat tingting we i stap daon i maet luk olsem ol fasin we i no go tugeta, be i no tru. Oli soem invitesen blong Sevya blong no haedem ol fasin mo prinsipol blong gospel andanit long wan baket, be blong letem laet blong yu i saen, blong ol gud wok we yu stap mekem bae i leftemap Papa blong yu long Heven.15
I gat fulap nomol wei blong mekem hemia, stat long ol aksen blong stap kaen evri dei kasem ol testemoni blong wanwan man long Yutiub, Fesbuk, Instagram, o Twita kasem ol simpol storian wetem ol man we yu mitim. Long yia ya, yumi stap lan long Niu Testeman long ol hom blong yumi mo long Sandei Skul. I wan naesfala janis tru blong invaetem ol fren mo ol neba oli kam long jos mo long ol hom blong yu blong lanem abaot Sevya wetem yu. Serem ap blong Gospel Laebri wetem olgeta, we oli save faenem Kam Folem Mi. Sapos yu save long ol yangfala mo ol famli blong olgeta, givim buk Blong Ol Yut Oli Kam Strong long olgeta, mo invaetem olgeta blong kam mo luk hao ol yangfala oli stap wokhad blong laef folem ol prinsipol ia.
Sapos wan man i askem abaot wiken blong yu, no tingting tu taem blong tokbaot wanem yu bin eksperiensem long jos. Talem abaot ol smosmol pikinini we oli bin stanap long fored blong olgeta long jos mo singsing wetem strong tingting abaot hao oli stap traem blong kam olsem Jisas. Tokbaot ol grup blong ol yangfala we oli spenem taem blong helpem ol olfala long ol haos blong lukaot ol olfala blong helpem olgeta i mekem ol histri blong olgetawan. Tokbaot jenis ia we oli jes mekem long ol miting blong yumi long Sandei mo hao hem ia i blesem famli blong yu. O eksplenem from wanem yumi tokbaot bigwan se hemia, hem i Jos blong Jisas Kraes mo yumi ol Lata-dei Sent, semmak olsem ol memba blong Jos bifo we oli singaotem olgeta tu Ol Sent.
Long wanem wei we i nomol long yu, serem wetem ol pipol from wanem Jisas Kraes mo Jos blong Hem i impoten long yu. Invaetem olgeta blong “kam mo luk.”16 Afta, leftemap tingting blong olgeta blong kam mo help. I gat fulap janis tumas blong ol pipol oli help long Jos blong yumi.
Prea, be i no blong ol misinari nomo blong oli faenem olgeta we Lod i jusum. Mo prea evri dei wetem ful hat blong yu se bae yu faenem olgeta we bae oli kam mo luk, kam mo help, mo kam mo stap. Kipim ol fultaem misinari oli pat. !Oli olsem ol enjel, oli rere blong help!
Taem yu stap serem gud nius, we i gospel blong Jisas Kraes, mekem wetem lav wetem fasin blong stap wet longtaem. Sapos yumi wok wetem ol pipol wetem wan lukluk nomo se bae i no longtaem bae oli jam insaed long waet klos mo askem rod blong go long ples blong baptaes we i moa kolosap, yumi stap mekem i rong.
Sam we bae oli kam mo luk, ating, bae oli neva joenem Jos; sam bae oli kam sam taem afta. Hemia hem i joes blong olgeta. Be hemia i no jenisim lav blong yumi long olgeta. Mo hem i no jenisim ol strong hadwok blong yumi blong gohed blong stap invaetem wanwan man o woman mo famli blong kam mo luk, kam mo help, mo kam mo stap.
Nambafaef, trastem Lod blong i mekem ol merikel blong Hem. Andastanem se i no wok blong yu blong jenisim pipol. Hemia i wok blong Tabu Spirit. Wok blong yu hem i blong serem wanem i stap long hat blong yu mo laef folem ol bilif blong yu.
Yu no nid blong slakem tingting sapos wan man i no akseptem gospel mesej kwiktaem. Hem i no wan lus long yuwan.
Hemia i bitwin wan wan man o woman mo Papa long Heven.
Yu, hem i blong yu lavem God mo ol neba blong yu, we oli ol pikinini blong Hem.
Biliv, lavem, mekem.
Taem yu folem rod ia, God bae i wokem ol merikel tru long yu blong blesem ol pikinini blong Hem.
Ol faef tingting ia i blong helpem yu mekem wanem ol disaepol blong Jisas Kraes i bin mekem stat long taem bifo. Gospel mo Jos blong Hem, oli wan impoten pat tumas long laef blong yu mo huia yu mo wanem yu mekem. From hemia, invaetem ol narawan blong kam mo luk mo kam mo help, mo God bae i mekem wok blong Hem blong sevem man, mo bae oli kam mo stap.
?Be Olsem Wanem Sapos I Had?
“Be,” maet bae yu askem, “?wanem sapos mi mekem evri samting ia mo ol pipol i no ansa gud?” ?Wanem sapos oli no agri tumas wetem Jos? ?Wanem sapos oli nomo fren wetem mi?”
Yes, hemia i save hapen. Stat long taem blong bifo, ol disaepol blong Jisas Kraes oli no bin laekem mo agensem olgeta.17 Aposol Pita i talem: “Stap glad nomo taem [yu] stap serem ol harem nogud blong Kraes.”18 Olgeta Sent long bifo oli bin glad from “oli naf blong kasem sem long fes blong man, from nem blong Jisas.”19
Lod i wok long ol wei we i haed. Maet bae wok blong yu olsem hemia blong Kraes blong fesem man we i sakemaot yu, bae i save mekem wan strong hat i kam sofsof.
Olsem wan Aposol blong Jisas Kraes, mi blesem yu wetem tras ia long yuwan blong stap olsem wan laef testemoni blong ol gospel valiu, wetem karej ia, blong oltaem, oli luksave yu olsem wan memba blong Jos blong Jisas Kraes blong Ol Lata-dei Sent, wetem tingting we i stap daon blong help long wok blong Hem olsem saen blong lav blong yu long Papa long Heven mo ol pikinini blong Hem.
Ol dia fren blong mi, bae yufala i kasem glad blong save se yufala i wan impoten pat long kam tugeta blong Isrel we oli talem longtaem finis, we i stap rere long kaming blong Kraes long “paoa mo bigfala glori; wetem evri tabu enjel.”20
Papa long Heven i save yu. Lod i lavem yu. God bae i blesem yu. Wok ia i kam long Hem. Yu save mekem hemia. Yumi evriwan i save mekem hemia tugeta.
Mi testifae long hemia, long nem blong Jisas Kraes, amen.